ދުނިޔޭގައި ކުރަމުންދާ ހަނގުރާމަތައް ހުއްޓުވުމަށް މެދުވެރިއެއް ދައުރު އަދާކޮށް، ގަތަރުން ކުރަމުންދާ މަސައްކަތްތަކަށް ތައުރީފް ހައްގުކަމުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ، އަލީ އިހުސާން މުހައްމަދު ވިދާޅުވެއްޖެއެވެ.
ގަތަރުގައި ކުރިއަށްދާ ގްލޯބަލް ސެކިއުރިޓީ ފޯރަމްގައި ބައިވެރިވެވަޑައިގަތުމަށްފަހު މީޑިއާތަކާއި ވާހަކަ ދައްކަވަމުން ހޯމް މިނިސްޓަރު ވިދާޅުވީ، ދުނިޔޭގައި ހިނގަމުންދާ ހަނގުރާމަތައް ހައްލުކުރުމަށް ގަތަރުން މަސައްކަތް ކުރަމުންދާ ކަމަށެވެ. ގަތަރަކީ އެފަދަ މައްސަލަތައް ހައްލުކުރުމުގައި މެދުވެރިއެއްގެ ދައުރު އަދާކުރާ ގައުމެއް ކަމުގައިވެސް ވަޒީރު ވަނީ ފާހަގަކުރައްވާފައެވެ.
މިފަދައިން ހައްލު ހޯދުމަށް މަސައްކަތްކުރުމުގެ އިތުރުން، ގަތަރުން ހަނގުރާމަތައް މަދުކުރުމަށް ވެފައިވާ ވައުދުތަކަކީ ވަރަށް ތައުރީފު ހައްގު ކަމެއް ކަމުގައި އިހުސާން ވިދާޅުވިއެވެ.
ގަތަރުގެ ދޯހާގައި މިހާރު ކުރިއަށްދާ ގްލޯބަލް ސެކިއުރިޓީ ފޯރަމްގައި ގަތަރުގެ ބޮޑުވަޒީރު ޝެއިޚް މުހައްމަދު ބިން އަބްދުއްރަހްމާން އަލްތާނީ ވެސް ވަނީ ދުނިޔޭގެ ސިޔާސީ މަސްރަހުގައި ހުރި ގޮންޖެހުންތަކާއި އިންސާނިއްޔަތަށް ހުރި ނުރައްކާތަކާއި ގުޅޭ ގޮތުން ވާހަކަ ދައްކަވައިފައެވެ. މެއި 20 އިން 22 އަށް ކުރިއަށްގެންދާ މި ފޯރަމްގެ ތީމަކީ “ސްޓްރެޓަޖިކް ކޮމްޕެޓިޝަން: ދަ ކޮމްޕްލެކްސިޓީ އޮފް އިންޓަރޑިޕެންޑެންސް” އެވެ.
ހަނގުރާމަތައް ހުއްޓުވުމަށް މެދުވެރިއެއްގެ ދައުރު އަދާކޮށް ގަތަރުން ކުރަމުންދާ މަސައްކަތްތަކަށް ތައުރީފް ހައްގު އިހުސާން ވިދާޅުވެފައިވާއިރު، އިސްރާއީލުން ޣައްޒާގައި ކުރަމުންދާ ލާއިންސާނީ ހަނގުރާމަ ހުއްޓުވުމަށް، ހަމާސްއާއި އިސްރާއީލް ސުލްހަކުރުވުމަށް އެންމެ މުހިންމު ދައުރެއް އަދާކުރަމުންދާ ގައުމަކީ ޤަތަރެވެ.
