ހުއްދަ ނުހޯދައި ޑްރޯން އަރުވާނަމަ ފިޔަވަޅު އަޅާނެ ޑިފެންސް މިނިސްޓްރީން ބުނެފިއެވެ.
އެ މިނިސްޓްރީން ކުރި އިއުލާނެއްގައި ބުނެފައި ވަނީ ސިފައިން ސެކިއުރިޓީ ބަލަހައްޓާ ސަރަހައްދުތަކާއި އެއާޕޯޓްތައް ހިމެނޭ ސަރަހައްދުތަކުގައި އަންމޭންޑް އޭރިއަލް ވެހިކަލް (ޔޫއޭވީ) ނުވަތަ ޑްރޯން މިހާރަކަށް އައިސް ހުއްދަ ނުހޯދައި އުދުއްސާކަން ފާހަގަ ކުރެވިފައިވާ ކަމަށެވެ.
އެކަމަކީ ވައިގެ ދަތުރުފަތުރަށް އެކަމުގެ ސަބަބުން ނުރައްކަލެއް ކުރިމަތިވެދާނެ ކަމަކަށްވާތީ، ޑްރޯން އުދުއްސުމުގެ ކުރިން މިނިސްޓްރީން ހުއްދަ ހޯދުމަށް މީގެ ކުރިން ވެސް އަންގާފައިވާނެ ކަމަށް އެ އިއުލާންގައި ވަނީ ބުނެފައެވެ.
ޑިފެންސް މިނިސްޓްރީން ބުނި ގޮތުގައި ރާއްޖޭގެ ކޮންމެ ދިމާއެއްގައި ޑްރޯން އަރުވަން ބޭނުންވި ކަމަށްވި ނަމަވެސް މިނިސްޓްރީގެ ހުއްދަ ހޯދަން ޖެހޭނެއެވެ.
ހުއްދަ ހޯދުމަށް އެދި ފޯމު ހުށަހަޅާއިރު، ރަސްމީ ބަންދު ނޫން ތިން ދުވަސްކުރިން ހުށަހެޅުމަށާއި ހުއްދަ ނުހޯދާ މިކަންކުރާ މީހުންނާ މެދުގައި ފިޔަވަޅު ވެސް އަޅާނެ ކަމަށް ޑިފެންސް މިނިސްޓްރީން ބުނެފައިވެއެވެ.
މިނިސްޓްރީން ބުނީ ހުއްދަ ނުހޯދައި އުދުއްސާ ޑްރޯންތަކާ މެދު އަޅާ ފިޔަވަޅަކާއި ގުޅިގެން އެ ތަކެއްޗަށް ލިބޭ ގެއްލުމެއްގެ ޒިންމާ ނުނަގާނެ ކަމަށެވެ.
