ރާއްޖޭގެ ތަރައްގީގެ މަޝްރޫއުތަކަށް ޗައިނާއިން އެހީތެރިވަމުންދާނެކަމަށާއި، ނަމަވެސް ރާއްޖޭގެ ދަރަނި އިތުރަށް ބޮޑުވުމަކީ ޗައިނާއިން އެދޭ ކަމެއް ނޫންކަމުގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޝިން ވިދާޅުވެއްޖެއެވެ.
ރާއްޖޭގެ މީޑިއާތަކަށް މަޢުލޫމާތުދެއްވުމަށް އިއްޔެ ބޭއްވުނު ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެމްބެސެޑަރ ވިދާޅުވީ ރާއްޖޭގެ ތަރައްޤީގެ އެކި މަޝްރޫޢުތަކަށް ޗައިނާއިން އެހީވުމުގައި ދެމިއޮންނާނެ ކަމަށެވެ. ނަމަވެސް ރާއްޖޭގެ ދަރަނި އިތުރުކުރުމަކީ ޗައިނާގެ ސިޔާސަތެއް ނޫނަކަމަށެވެ. މިގޮތުން ޗައިނާއިން އިސްކަންދޭނީ ލޯނު އެހީގެ ބަދަލުގައި ހިލޭ އެހީގެ ދަށުން ރާއްޖޭގެ މަޝްރޫޢުތަކަށް ފަންޑުކުރުމަށް ކަމުގައި އެމްބެސެޑަރ ވިދާޅުވިއެވެ.
ކުރީގެ ރައީސް މުޙައްމަދު ނަޝީދު, ޗައިނާއިން ރާއްޖެ ދަރަނީގެ ދަންތުރައެއްގައި ޖައްސަމުންދާކަމަށް ވިދާޅުވެފައިވުމުން އެކަމަށް އިޝާރާތްކުރައްވާ ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން އެމްބެސެޑަރ ވިދާޅުވީ ރާއްޖޭގެ ދަރަނި ބޮޑުވުމަކީ ޗައިނާ އިން ވެސް ކަންބޮޑުވާ ކަމެއްކަމަށާއި ޗައިނާއިން މިހާރުވެސް ރާއްޖެ އަށް ދޫކުރަނީ ހިލޭ އެހީ ކަމުގައެވެ. އެގޮތުން ޗައިނާގެ ހިލޭ އެހީދޭ ބައެއް މަޝްރޫޢުތައް އެމްބެސެޑަރ ފާހަގަކުރެއްވިއެވެ.
ޗައިނާއިން ހިލޭ އެހީ ދިނުމަށް ހަމަޖެހިފައިވާ ބައެއް މަޝްރޫޢުތަކުގެ ތެރޭގައި 17 ހޮސްޕިޓަލެއްގައި ލެބޯޓްރީގެ ވަސީލަތްތައް އިތުރު ކުރުމުގެ މަޝްރޫއާއި ވިލިމާލޭގައި ހަދާ 100 އެނދުގެ ހޮސްޕިޓަލްގެ މަޝްރޫއާއި ސިނަމާލެ ބްރިޖު މަރާމާތު ކުރުމުގެ މަސައްކަތް ފާހަގަކުރެވެއެވެ.
އެމްބެސެޑަރުގެ ވާހަކަފުޅުގައި ދަރަނި ދަންތުރައިގެ ވާހަކަ ދިވެހިން ޤަބޫލުނުކުރާނެކަމަށާއި އެވާހަކަ ބަޔަކު ދައްކަނީ ވަކި އެޖެންޑާއެއްގެ ތެރެއިން ކަމަށެވެ.
އެމްބެސެޑަރުގެ ވާހަކަފުޅުގައި ރާއްޖެއިން ނަގާފައިވާ ލޯނުތައް ޗައިނާއަށް އަނބުރާ ދެއްކުމުގައި ލުއިފަސޭހަ ގޮތްތަކެއް ކަނޑައެޅުމަށް ދެޤައުމުގެ ދެމެދުގައި މިހާރުވެސް ދަނީ މަޝްވަރާކުރެވެމުން ކަމުގައި ފާހަގަކުރެއްވިއެވެ.
