20ވަނަ ރައްޔިތުންގެ މަޖިލީހަށް އިންތިޚާބުވި އެމްޑީޕީގެ މެމްބަރުންނާއި ރައީސް ސާލިހު މިއަދު ބައްދަލުކުރައްވައިފިއެވެ. އެމްޑިޕީން ބުނެފައިވަނީ 20 ވަނަ މަޖިލީހަށް އިންތިޚާބުވި މެމްބަރުންގެ ތެރެއިން މި ބައްދަލުވުމުގައި ބައިވެރިވެވަޑައިގަތީ މިވަގުތު މާލޭގައި ތިއްބެވި މެމްބަރުން ކަމުގައެވެ.
އެގޮތުން މި ބައްދަލުވުމުގައި 20 ވަނަ މަޖިލީހަށް އިންތިޚާބުވި 9 މެމްބަރަކު ބައިވެރިވެވަޑައިގަތެވެ.
19 ވަނަ މަޖިލިސް ފެށިގެން އައިއިރު އެމްޑީޕީގެ ސުޕަރ މެޖޯރިޓީ އޮތެވެ. އެހެންނަމަވެސް އެމަޖިލިހުގެ މެދަކާހަމައިން އެޕާޓީ ބައިބައިވެ ޕާލަމެޓްރީ ގުރޫޕުން ބައެއް މެމްބަރުން އެމްޑީޕީން ވަކިވިއެވެ. އެއަށްފަހު އާ ސަރުކާރު ހުވާ ކުރުމާއެކު، އިތުރު 12 މެމްބަރަކު އެމްޑީޕީން ދޫކޮށް ވެރިކަންކުރާ ޕީއެންސީއަށް ދިޔައެވެ.
އަަދި ޖެހިގެން އައި މަޖިލިސް އިންތިޚާބުގައި އެމްޑީޕީއަށް ކާމިޔާބު ކުރެވުނީ އެންމެ 12 ގޮނޑިއެވެ. އޭގެ ތެރޭގައިވެސް ގިނައީ އަލަށް އިންތިޚާބުވި މެމްބަރުންނެވެ. 19 މަޖިލިހުގައި ތިއްބެވި މެމްބަރުންގެ ތެރެއިން 20 ވަނަ މަޖިލީހަށް އިންތިޚާބުވީ އެމްޑީޕީގެ އެންމެ 4 މެމްބަރުންނެވެ.
