ފައިސާ ލިބުނު ގޮތް ޑިކްލެއަރ ނުކޮށް ރާއްޖެއިން ބޭރަށް އެންމެ ގިނައިން ގެންދެވޭ އަދަދަކީ 10،000 ޑޮލަރު ކަމުގައި ހަމަޖައްސައިފިއެވެ.
ހޯމް މިނިސްޓްރީއާއި އެމިނިސްޓްރީއާއި ގުޅުންހުރި އިދާރާތަކުން މިއަދު ބޭއްވި ނޫސްވެރިންގެ ބައްދަލުވުމުހައި ވާހަކަ ދައްކަވަމުން ހޯމް މިނިސްޓަރ އަލީ އިހުސާން ވިދާޅުވީ ކަސްޓަމްސްގެ ކޭޝް ޑިކްލަރޭޝަން ގަވައިދަށް މިހާރު ގެނެސްފައިވާ އިސްލާހުގައި ވާގޮތުން ރާއްޖެއިން ބޭރަށް 10،000 ޑޮލަރަށްވުރެ މަތީ އަދަދެއް ގެންދާނަމަ އެފައިސާ ހޯދި ގޮތެއް ސަބިތުކޮށްދޭން ޖެހޭނެ ކަމަށެވެ.
މީގެކުރިން 10،000 ޑޮލަރަށް ވުރެ މަތިން ހިފައިގެންދާ މީހާ ތިމަންނާ މި ދަނީ މިވެނި އަދަދަކަށް ފައިސާ ހިފައިގެންނޭ ބުނެ ހަމަ ދާންވީ. އެ ޑިކްލިއާ ކުރެވުނީ. ނަމަވެސް ބައިނަލްއަގްވާމީ އިދާރާތަކުގައި މިކަމަށް މިންގަނޑުތަކެއް އޮވޭ. އެމީހާ 10،000 ޑޮލަރަށް ވުރެ މަތިން ހިފައިގެންދަންޏާ ސޯސް އޮފް އިންކަމް ޑިކްލިއާ ކުރަން ޖެހޭ. އޭނާ ކޮންތާކުން ހޯދި ލާރިއެއްތޯ ހިފައިގެން މި ދަނީ.
އިހުސާން ވިދާޅުވި އެވެ.
އިހުސާން ވިދާޅުވިއިރު، މިސަރުކާރު ވެރިކަމަށް އައިއިރު، ބިދޭސީން ރާއްޖެއަށް އެތެރެވެ، ކޮންމެ ހަފްތާއަކުވެސް ގެންދިޔައީ އެތައް ލައްކަ ޑޮލަރެއް ރާއްޖެއިން ބޭރުކުރަމުންދާ ކަމަށާއި، މިހާރު އެ ބީދައިން ދިވެހިންނަށްވެސް އަދި ބޭރު މީހުންނަށްވެސް ޑޮލަރު ބޭރު ނުކުރެވޭނެ ކަމުގައެވެ.
ބޭރު މީހަކު ވިޔަސް ދިވެއްސަކު ވިޔަސް ރާއްޖެ އިން ބޭރަށް 10،000 ޑޮލަރަށް ވުރެ ގިނައިން ހިފައިގެންދާ ކަމަށްވާ ނަމަ، ރަނގަޅަށް ޑިކްލައިކޮށް ކޮންތާކުން ކިހިނެއް ހޯދި އެއްޗެއްތޯ ގާނޫނީ އިމުގެ ތެރެއިން ބަލާއިރު ހަމަޖެހޭ ވާހަކައެއްތޯ އެމީހަކު އެ ދައްކަނީ ބަލާފައި އެ ޑިކްލަރޭޝަން ނިމުނީމަ ނޫނީ އެ ފައިސާ އަޅުގަނޑުމެން ދުލެއް ނުކުރަން.
މިނިސްޓަރު ވިދާޅުވި އެވެ.
އިހުސާން ވިދާޅު ގަވާއިދަށް ގެނެވުނު މި ބަދަލާއެކު، ރާއްޖެ އިން ބޭރަށް ބޮޑު އަދަދުން ކޭޝް ނުވަތަ ނަގުދު ފައިސާ ބޭރު ކުރުން ގާތްގަނޑަކަށް މިހާރު ހުއްޓުމަކަށް ގެނެވިފައިވާ ކަމުގައެވެ.
މިއަދުގެ ނޫސްވެރިންގެ ބަދަލުވުމުގައި ކަސްޓަމްސްއިން ބުނީ ރާއްޖެއަށް އެތެރެކުރާ ނުވަތަ ބޭރުކުރާ ނަގުދު ފައިސާ ރިޕޯޓް ކުރުމުގެ ގަވައިދު މީގެ ކުރިން އޮތްގޮތުން ރާއްޖެއިން ބޭރަށް ބޮޑެތި އަދަދުތަކުން ފައިސާ ބޭރުކުރާ ފަރާތްތަކާމެދު އެކަށިގެންވާ ފިޔަވަޅު އެޅިފައި ނުވާކަމުގައެވެ.
އެގޮތުން، ކަސްޓަމްސްގެ ޑެޕިއުޓީ ކޮމިޝަނާ ޖެނަރަލް އިބްރާހިމް މަފާޒު ވިދާޅުވީ 2015ގައި އަމަލުކުރަންފެށީ މިގަވައިދު ކުރިން އޮތްގޮތުން ހަމައެކަނި އެޅެން އޮންނަ ފިޔަވަޅަކީ ކަސްޓަމްސްއަށް އޮޅުވާލައިގެން ނުވަތަ ފޮރުވައިގެން ގިނަ އަދަދެއްގެ ފައިސާ ބޭރު ކުރަން އުޅޭ މައްސަލަތަކުގައި ފުލުހުން މެދުވެރިކޮށް ޖިނާއީ ތަހުގީގެއް ހިންގައި ދައުވާ ކުރުން ކަމުގައެވެ.
