ސައުދީ ރަސްގެފާނުގެ މެހުމާންދާރީގައި ރައީސް ޢުމްރާއަށް ވަޑައިގަތުމަކީ މަދުބަޔަކު ހަސަދަވެރިވާންވީ ކަމެއްތޯ؟
ރައީސް ޑރ. މުޢިއްޒުގެ ދެ ކަނބަލުން ސަޢުދީ ރަސްގެފާނުގެ މެހުމާންދާރީގައި ޢުމްރާއަށް ވަޑައިގަތުމަކީ މަދުބަޔަކު ހަސަދަވެރިވާންވީ ކަމެއްތޯ، ރައީސް މުއިއްޒުގެ އިސް އެޑްވައިޒަރު އަބުދުއްރަހީ ސުވާލު އުފައްދަވައިފިއެވެ.
އޭގެ އިތުރުން އެ ދަތުރުފުޅަށް ސަޢުދީ ސަރުކާރުން ޚާއްޞަ ޖެޓެއް ހަމަ ޖައްސަވައި ދެއްވުމަކީ ނުވަތަ މަދީނާއަށް ރައީސްގެ ދެ ކަނބަލުން ވަޑައިގަތުމުން މަދީނާގެ ގަވަރުނަރު ވަޑައިގެން ރިސީވް ކުރައްވާ އޮނަރގާރޑެއް އެރުވުމަކީވެސް ބަޔަކު ޙަސަދަވެރިވާންޖެހޭކަމެއްތޯވެސް އަބުދުއްރަހީމް ކުރެއްވި އެކްސް ޕޯސްޓުގައި އޭނާވަނީ ސުވާލު ކުރައްވާފައެވެ.
އަބުދުއްރަހީމް ވިދާޅުވީ އޭނާ ގަބޫލުކުރައްވާ ގޮތުގައި މިއީ ދިވެހީން އުފާކުރަންވީކަމެއް ކަމަށާއި، ޙަސަދަވެރި ވިޔަސް ހަގީގަތާ ކުރިމަތިލުމުގެ ހިތްވަރު ހުންނަންވާނެ ކަމުގައެވެ.
މާތްވެގެންވާ ދެ ޙަރަމްފުޅުގެ ޚާދިމް އަދި ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ ޚާއްޞަ މެހެމާން ދާރީގައި ކުރައްވާ ޢުމްރާ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުޙައްމަދު ފުރާވަޑައިގަތީ އިއްޔެއެވެ.
މިދަތުރުފުޅުގައި ރައީސުލްޖުމްހޫރިއްޔާގެ އަރިހުގައި މިނިސްޓަރ އޮފް އިސްލާމިކް އެފެއާޒް ޑޮކްޓަރ މުޙައްމަދު ޝަހީމް ޢަލީ ސަޢީދު، އިސްލާމީ މަރްކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފް، ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް ޢަބްދުﷲ ފަޔާޟް، މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ޕްރެޒިޑެންޝަލް އެފެއާޒް ޢަލީ ޢާރިފް، މިނިސްޓަރ އެޓް ދަ ޕްރެޒިޑެންޓްސް އޮފީސް ޢަބްދުﷲ ނާޞިރު ބައިވެރިވެވަޑައިގެންނެވިއެވެ.
ރައީސުލްޖުމްހޫރިއްޔާގެ ދެކަނބަލުންނާ އަރިހުގައި ވަޑައިގަންނަވާ ބޭފުޅުން މި ދަތުރުފުޅު ކުރައްވަނީ ސަޢޫދީ ސަރުކާރުން ފޮނުއްވި ޚާއްޞަ މަތިންދާ ބޯޓެއްގައެވެ.
