ފަލަސްތީނަށް ޔޫއެން މެމްބަރުންކަން ދިނުމާމެދު އަލުން ވިސްނުމަށް ސެކިއުރިޓީ ކައުންސިލަށް ގޮވާލާ ގަރާރު ޔޫއެންގެ އާންމު މަޖިލީހުގެ ބޮޑު އައުލަބިއްޔަތަކުން ފާސްކޮށްފިއެވެ.
އދ.ގެ ސަލާމަތީ މަޖިލީހުން ފަލަސްތީނުގެ މެމްބަރުކަން އަލުން މުރާޖައާ ކުރުމަށް ގޮވާލައި އދ.ގެ އާންމު މަޖިލީހުން ފާސްކުރި ގަރާރުގައި 143 ވޯޓު ލިބިފައިވާއިރު، ނުފެންނަ ކަމަށް ނުވަ ވޯޓު އަދި އެއްވެސް ކޮޅަކަށް ވޯޓު ދޭން ނުފެންނަކަމަށް 25 ވޯޓު ވަނީ ލިބިފަ އެވެ.
އެ ގަރާރުގައި ވަނީ ސަލާމަތީ މަޖިލީހުން "މި މައްސަލަ އަލުން މުރާޖައާ ކުރުމަށް" ގޮވާލާ، ފަލަސްތީނު އޮތޯރިޓީއަށް އދ.ގެ މެމްބަރުކަން ދިނުމަށް ބާރުއަޅައި، ފަލަސްތީނުގެ ދައުލަތަކީ އދ.ގެ މެންބަރުކަމަށް ޝަރުތު ހަމަވާ ދައުލަތެއް ކަމަށް ބުނެފައެވެ.
އދ.ގެ އާންމު މަޖިލީހުގެ ޖަލްސާ ފެށުމުގެ ކުރިން އދ.ގައި ހުންނަ އެމެރިކާގެ މިޝަނުން އިޝާރާތްކޮށްފައި ވަނީ ގަރާރު ފާސްކޮށް ސަލާމަތީ މަޖިލީހަށް މެމްބަރޝިޕް އެޕްލިކޭޝަން ފޮނުވައިފިނަމަ އެމެރިކާއިން އަނެއްކާވެސް އެ ގަރާރު ވީޓޯ ކުރާނެ ކަމަށާއި އޭޕްރީލް މަހު ކުރިމަތިވިފަދަ ނަތީޖާއަކާ އެގަރާރު ކުރިމަތިލާން ޖެހޭނެ ކަމުގައެވެ.
އެމެރިކާގެ މިޝަނުން ބުނީ ފަލަސްތީނު އޮތޯރިޓީއަކީ އދ.ގެ މެންބަރުކަމުގެ ޝަރުތު ހަމަވާ އޮތޯރިޓީއެއް ނޫން ކަމަށާއި އެ ގަރާރުގެ ސަބަބުން ފަލަސްތީނުގެ މެމްބަރުކަމާ މެދު ކުރިން އުފެދުނު ކަންބޮޑުވުންތަކަށް ހައްލެއް ނުލިބޭ ކަމަށެވެ.
މިދިޔަ އޭޕްރީލް މަހު ފަލަސްތީނު އޮތޯރިޓީން ވަނީ އެ އޮތޯރިޓީގެ މެންބަރުކަމަށް އެދުނު މައްސަލަ އަލުން ލޯންޗްކޮށް، އެ މަހުގެ ފަހުކޮޅު އެމެރިކާއިން ވަނީ ފަލަސްތީނުން މެމްބަރޝިޕްގެ ދަރަޖަ ހޯދުމަށް ކުރި މަސައްކަތް ވީޓޯކޮށްފަ އެވެ.
އެގަރާރާމެދު އޭރު ސަލާމަތީ މަޖިލީހުގައި ނެގި ވޯޓުގައި އެމެރިކާ ވީޓޯ ކޮށްފައިވާއިރު ގަރާރަށް ސަލާމަތީ މަޖިލިހުގެ 12 މެމްބަރަކު ތާއީދުކޮށްފައި ވެއެވެ. އެމެރިކާގެ ވީޓީގެ އިތުރުން އެ ގަރާރާ ދެކޮޅަށް ވޯޓު ދީފައިވަނީ އެންމެ މެމްބަރެކެވެ.
ފަލަސްތީނުގެ ބިޑަކީ ލަދުވެތި ހުށަހެޅުމެއް ކަމަށް ބުނެ އިޒްރޭލުން އެމެރިކާ ވީޓޯއަށް ތައުރީފުކޮށްފައިވާއިރު، ފަލަސްތީނު އޮތޯރިޓީގެ ރައީސް ވަނީ ވީޓޯއަކީ ބޭއިންސާފު، ނާތަހުޒީބު އަދި ބޭއިންސާފު ހުށަހެޅުމެއް ކަމަށް ސިފަކޮށްފަ އެވެ.
2011 ވަނަ އަހަރުގެ ސެޕްޓެމްބަރު މަހުވެސް ފަލަސްތީނު އޮތޯރިޓީއަށް މިނިވަން މެމްބަރު ގައުމެއްގެ ގޮތުގައި އދ.ގެ ރުހުން ނުދޭން އެ ޖަމިއްޔާއިން ނިންމާފައި ވެއެވެ. އޭގެ އަހަރެއްހާ ދުވަސް ފަހުން އދ އިން ނިންމީ ފަލަސްތީނު އޮތޯރިޓީގެ "ނޮން މެމްބަރ އޮބްޒާވަރު އެންޓިޓީ" ގެ ދަރަޖައި ބަދަލުގައި "ނޮން މެމްބަރ އޮބްޒާވަރ ސްޓޭޓް"އެއްގެ ދަރަޖަ ދިނުމަށެވެ. އެއީ އިޓަލީގައި ހުންނަ ކުރިޓިއަން ދީނުގެ ޕޯޕުގެ މައި މަރުކަޒު ކަމުގައިވާ "ވެޓިކަން"އަށްވެސް އދ. ގައި ދީފައިވާ ދަރަޖައެވެ.
ޔޫއެންގެ އާންމު މަޖިލީހުން ނިންމާ ނިންމުންތަކަކީ އެއަށް އަމަލުކުރުން މެމްބަރު ގައުމުތަކަށް މަޖުބޫރުކުރާ ނިންމުންތަކެއް ނޫނެވެ. ޔޫންއެން ނިންމުންތަކަށް އަމަލުކުރުން މެމްބަރު ގައުމުތަކަށް މަޖުބުރުވަނީ ސަލާމަތީ މަޖީލިހުން އެނިންމުންތަކަށް ތާއީދު ކުރުމުނެންވެ. އެމަޖިލިންސް އެކުލެވިގެންވަނީ ވޯޓޯގެ ބާރު އޮންނަ 5 ގައުމަކާއެކު 14 މެމްބަރު ގައުމުގެ މައްޗަށެވެ. ވީޓޯގެ ބާރު އޮންނަ 5 ގައުމަކީ އެ މަޖިލިހުގެ ދާއިމި މެމްބަރުންނެވެ. އެހެން މެމްބަރުންނަކީ ބަދަލުވަމުންދާގޮތަށް ތިއްބަވާ މެމްބަރުންނެވެ.
ވީޓީގެ ބާރު އޮންނަ 5 ގައުމަކީ، އެމެރިކާ، ރަޝިއާ، ޗައިނާ، އިނގިރޭސިވިލާ އަދި ފްރާންސެވެ.
