އިންޑިއާގެ ކުޅަދާނަ ޑައިރެކްޓަރު ސަންޖޭ ލީލާ ބަންސާލީގެ ފުރަތަމަ ވެބް ސީރީޒް "ހީރާމަންޑީ: ދަ ޑައިމަންޑް ބާޒާރު" މިއަދު ނެޓްފްލިކްސް އަށް ދޫކޮށްލައިފި އެވެ.
މީގެ މައިގަނޑު ބަތަލާއިންގެ ތެރޭގައި ސޮނާކްޝީ ސިންހާ، މަނީޝާ ކޮއިރަލާ، އަދިތީ ރާއޯ ހައިދަރީ، ރިޗާ ޗައްޑާ، ސަންޖީދާ ޝެއިހް އަދި ޝަރުމިން ސޭގަލް ހިމެނެ އެވެ. "ހީރާމަންޑީ" ގެ ބަތަލުންގެ ތެރޭގައި ފަރުދީން ޚާނާއި ޝޭކަރް ސުމަން އާއި އޭނަގެ ދަރިފުޅު އަދިޔަޔަން ސުމަންގެ އިތުރުން ތާހާ ޝާހް ހިމެނެ އެވެ.
ވަރަށް ގްރޭންޑްކޮށް ހަދާފައިވާ މި ސީރީޒަކީ ބަންސާލީގެ ފިލްމުތަކުން އާންމު ފެންނަ އޭނަގެ ސިގްޗޭނާ ސްޓައިލާއި ވައްޓަފާޅި ވަރަށް ބޮޑަށް ދައްކުވައިދޭ ގޮތަށް ހަދާފައިވާ އެއްޗެކެވެ. "ހީރާމަންޑީ" ގައި ކިޔައި ދެނީ އިންޑިއާ އަށް މިނިވަންކަން ލިބުމުގެ ކުރިން ލާހޯރްގެ ރެޑް ލައިޓް އޭރިއާގައި އުޅުނު ޝާހީ ޖާރިޔާއިންގެ ވާހަކަ އެވެ.
މި ސީރީޒްގައި ހިތްގައިމު ރީތި ލަވަތަކެއް ހިމެނޭ އިރު، ލަވަތަކުގެ މިއުޒިކް ހެދީ ބަންސާލީ އަމިއްލައަށެވެ. ކާމިޔާބު އެތައް ފިލްމެއް ގެނެސްދީފައިވާ ޑައިރެކްޓަރުގެ އެންމެ ފަހުގެ ފިލްމަކީ 2022 ގެ "ގަންގޫބާއީ ކަތިއަވާޅީ" އެވެ.
ކޮމެންޓު ފޮނުވާ