މަސައްކަތްތެރިންގެ ހައްގުތައް ރައްކާތެރި ކުރުމަށްޓަކާ، މޭ-ޑޭގެ ގޮތުގައި އެންމެ ފުރަތަމަ ޚާއްސަ ދުވަހެއް ފާހަގަކުރަން ފަށާފައިވަނި އެމެރިކާގައެވެ. 19ވަނަ ގަރުނުގައި، އެމެރިކާއަށް އައި އިންޑަސްޓްރިއަލް ރިވޮލިއުޝަން (ކުރިން ދަނޑުވެރިކަން ކުރަމުން އައި ފަރާތްތަކުން، އިންޑަސްޓްރިއަލް މަސައްކަތްތަކަށް އެނބުރިގަތުން)ގައި، މަސައްކަތްތެރިންގެ ހާލަތު ދަށްވެ (މަސައްކަތުގެ މާހައުލުގެ ދެރަވަރު ކަމުންނާއި، އެކަށީގެންވާ ވަރަށްވުރެ ގިނައިރު މަސައްކަތް ކުރަންޖެހި) އެގައުމުގެ އެތައްހާސް ބަޔަކު ދުނިޔެ ދޫކޮށްފައި ވެއެވެ. އަދި މިރިވޮލިއުޝަންގައި، އެއްސިޓީ އަނެއް ސިޓީ ގުޅުވާލުމަށްޓަކާ ރެއިލްރޯޑުތައް ހަދާ، ކަފައާއި އޭގެ އޮތްތައް ވަކިކުރުމަށް މެޝިންތައް އީޖާދުކޮށް، ކަރަންޓާއި، އަދި މިނޫން ގޮތްގޮތުންވެސް އައި އާއީޖާދުތަކުގެ ނަތީޖާއެއްގެ ގޮތުން، ތަރައްގީގެ މުޅިން އާ ޒަމާނަކާއި އެމެރިކާ ކުރިމަތިލިއެވެ.

އެހެންނަމަވެސް، އެމެރިކާއަށް އައި މަސައްކަތްތެރިކަމުގެ މި އިންގިލާބު އެގައުމަށް އައިސްފައިވަނީ، މަސައްކަތްތެރިން ގުރުބާން ކޮށްގެންނެވެ. ނަތީޖާއެއްގެ ގޮތުން، މަސައްކަތުގެ މާހައުލުގެ ހާލަތު ދަށްވެ، އާދަޔާޚިލާފަށް ގިނައިރު މުވައްޒިފުން ލައްވާ މަސައްކަތް ކުރުވާ، އަދި އެމީހުންގެ މައްޗަށް ތަންފީޒު ކުރެވުނު އިންސާނިއްޔަތުކަމެއް ނެތް އުސޫލުތަކުގެ ސަބަބަނުން، ކޮންމެ އަހަރަކުވެސް އެތައް ހާސް ކުޑަކުދިންނާއި އަންހެނުން މަރުވެފައި ވެއެވެ.

މިގޮތުން، މަސައްކަތްތެރިންނާމެދު ކުރެވެމުންއައި އިންސާނިއްޔަތާއި ޚިލާފް އަމަލްތަކަށް ހުއްޓުވުމެއް ގެނައުމުގެ ގޮތުން، "ދަ ފެޑެރޭޝަން އޮފް އޯގަނައިޒްޑް ޓްރޭޑްސް އެންޑް ލޭބަރ ޔޫނިއަންސް" (ފަހުން، އެމެރިކާގެ ފެޑެރޭޝަން އޮފް ލޭބަރ ނުވަތަ AFL)ގެ ފަރާތުން އެމެރިކާގެ ޗިކާގޯގައި 1884ވަނަ އަހަރު ޚާއްސަ ކޮންވެންޝަނެއް ބާއްވާފައި ވެއެވެ.

މި ކޮންވެންޝަންގައި ދަ ފެޑެރޭޝަން އޮފް އޯގަނައިޒްޑް ޓްރޭޑްސް އެންޑް ލޭބަރ ޔޫނިއަންސްއިން ވަނީ، 1986ވަނަ އަހަރުގެ މޭމަހުގެ 1ވަނަ ދުވަހުން ފެށިގެން، މަސައްކަތްތެރިއަކު، ގާނޫނީގޮތުން ރަސްމީކޮށް މަސައްކަތް ކުރަންޖެހޭނީ އެންމެ ދިގުވެގެންވެސް ދުވާލަކު 8 ގަޑިއިރު ކަމުގައި ކަނޑައަޅާ އެކަން އިއުލާން ކޮށްފައެވެ.

އަދި ޖެހިގެން އައި އަހަރު، އެމެރިކާގެ އެންމެ ބޮޑު، ލޭބަރުންގެ ޖަމިއްޔާ ކަމުގައިވާ، "ނައިޓްސް އޮފް ލޭބަރ"އިން މި ނިންމުމަށް ތާއީދުކޮށް، ދެ ޖަމިއްޔާއިން އެކުވެގެން، ހައްގު ހޯދުމަށް މުޒާހިރާކުރުމަށް އެމެރިކާގެ މަސައްކަތްތެރިންނަށް ހިތްވަރު ދީފައި ވެއެވެ. ނަތީޖާއެއްގެ ގޮތުން، 1986ވަނަ އަހަރުގެ މޭމަހުގެ 1 ވަނަ ދުވަހު، އެމެރިކާގެ 300،000 މަސައްކަތްތެރިން، 13،000 ވިޔަފާރިއެއް ހުއްޓުމަކަށް ގެނެސް، މުޒާހިރާ ކުރުމަށް މަގުތަކަށް ނިކުމެފައި ވެއެވެ. އަދި ޖެހިގެން އައިދުވަހު އިތުރު މަސައްކަތްތެރިން، ހައްގު ހޯދުމަށް މަގުތަކަށް ނިކުމެ، މި މުޒާހިރާތަކުގައި 100،000 މީހުން ބައިވެރި ވެފައިވެއެވެ.

މިގޮތުން އެމެރިކާގައި ކުރެވެން ފެށި މުޒާހިރާތައް ފުޅާވެ، ސުލްހަވެރިކަމާއެކު ފެށިގެން އައި މުޒާހިރާތަކުގައި، އެ އަހަރުގެ މޭމަހުގެ 3 ވަނަ ދުވަހު އެމެރިކާގެ ޗިކާގޯގެ ފުލުހުންނާ ދެމެދު، "އެމްކޯމިކް ރީޕަރ ފެކްޓްރީ"ގައި ކުރިމަތިލުންތަކެއް ހިނގިއެވެ. އަދި މި ހަމަނުޖެހުންތަކުގައި އެތަކެއް މަސައްކަތްތެރިންނެއް މަރުވެ، ގިނަބަޔަކަށް އަނިޔާ ވުމާއި ދެކޮޅަށް، ޖެހިގެން އައި ދުވަހު، މަސައްކަތްތެރިން އެމީހުންގެ މުޒާހިރާ، ޗިކާގޯގެ ހެޕީމާރކެޓް ސަރަހައްދުގައި ބޭއްވުމަށް ހަމަޖެއްސިއެވެ.

މިއެއްވުމުގައި، މުޒާހިރާ ކުރަމުންދިޔަ މަސައްކަތްތެރިންނާއި، ފުލުހުންނާ ދެމެދު ހިގި ހަމަނުޖެހުންތަކުގައި، އެމެރިކާގެ ފުލުހުންގެ 7 އޮފިސަރަކާއި، މުޒާހިރާ ކުރަމުންދިޔަ 8 މީހަކު މަރުވެފައިވެއެވެ. މި ހަމަނުޖެހުމުގައި ފުލުހުން މަރުވެފައިވަނީ، މުޒާހިރާގެ ތެރެއިން، ކާކުކަން ނޭގޭ މީހަކު ފުލުހުންގެ ތެރެއަށް އެއްލި ބޮމެއްގެ ސަބަބުންނެވެ.

"ހެޕީ މާރކެޓް ރަޔަޓް"ގެ ނަމުން މަޝްހޫރުވެގެންދިޔަ މި މުޒާހިރާގެ ނަތީޖާއެއްގެ ގޮތުން، މިމުޒާހިރާތައް ހުއްޓުވުމަށް އެމެރިކާގައި ބާރުގެ ބޭނުން ކުރެވިގެން ދިޔައެވެ. މިގޮތުން 1886ވަނަ އަހަރުގެ އޮގަސްޓުމަހު، "ހެޕީ މާރކެޓް ރަޔަޓް"ގައި ބައިވެރިވި 8 މީހެއްގެ މައްޗަށް މުޅިގައުމުގެ ހަމަޖެހުން ނަގާލުމަށް މަސައްކަތް ކުރާ ކަމުގެ ދައުވާ އުފުލި، އެކަށީގެންވާ ހެއްކެއް ފެންނާން ނެތް، ބޭއިންސާފުންކަމަށް ގިނަބަޔަކު ގަބޫލުކުރި ޝަރީއަތެއް ކުރެވިގެން ދިޔައެވެ. މި ޝަރީއަތް ހިންގި ގާޒީއަކީ، އޭރު އެމެރިކާގެ ބޮޑެތި ވިޔަފާރިތަކާއި ގުޅުންއޮތް ގާޒީއެއްކަމުގައި ބެލެވިފައިވެއެވެ. އަދި ގިނަ ބަޔަކު ގަބޫލުކުރި ގޮތުގައި، އޭގެ ނަތީޖާއެއްގެ ގޮތުން އޭނާހުރީ ވަކިއަތަކަށް ބުރަވެ ނިމިފައެވެ.

ނަތީޖާއެއްގެ ގޮތުން، ދައުވާ އުފުލުނު 8 މީހުންގެ ތެރެއިން 7 މީހެއްގެ މައްޗަށް މަރުގެ ހުކުމް އިއްވުނެވެ. އަދި 8ވަނަ މީހާގެ މައްޗަށް 15 އަހަރުގެ ޖަލު ހުކުމެއް އިއްވުނެވެ. މި ޝަރީއަތުގައި މަރުގެ ހުކުމް އިއްވުނު 7 މީހުންގެ ތެރެއިން އެކަކު އަމިއްލައަށް ދަންޖެހި މަރުވިއިރު، 4 މީހުން ދަންޖައްސާ މަރާލެވުނެވެ. އަނެއް 3 މީހުންނަށް އޭގެ 6 އަހަރު ފަހުން މާފް ދެވުނުވެ.

"ހެޕީ މާރކެޓް ރަޔަޓް"އާއި މި މުޒާހިރާއާއި ގުޅިގެން ބޭއްވި، ދުނިޔެއަށް ހައިރާންކަން ގެނުވި ޝަރީއަތުގެ އަހަރުތަކެއް ފަހުން، ޔޫރަޕްގެ ސޯޝަލިސްޓު އަދި ލޭބަރ ޕާޓީތައް ގުޅިގެން މުޅި އާ އިއްތިހާދެއް ގާއިމްކޮށް، "ހެޕީ މާރކެޓް ޝަހީދުން"ގެ ޝަރަފުގައި މުޒާހިރާކުރުމަށް ގޮވާލާފައި ވެއެވެ. މި ގޮވާލުންތަކަށް އިޖާބަދީ، 1890ވަނަ އަަހަރު، އިނގިރޭސިވިލާތުގެ ލަންޑަންގައި ބޭއްވުނު މޭޑޭ ރެލީގައި 300،000 މީހުން ބައިވެރި ވެފައިވެއެވެ.

އެއަށްފަހު، މަސައްކަތްތެރިންގެ ހައްގުތަކާއި، އަދި ހައްގުތަކަށް ކުރެވުނު މުޒާހިރާތަކާއި ގުޅިގެންދިޔަ، މޭމަހުގެ 1ވަނަ ދުވަސް ދުނިޔޭގެ ގިނަ ގައުމުތަކުން މަސައްކަތްތެރިން ހައްގުތަކަށް ވާކާލާތުކުރާ ދުވަހުގެ ގޮތުގައި ފާހަގަ ކުރަން ފަށާފައި ވެއެވެ.

ރާއްޖޭގައި މޭޑޭ!

ދިވެހިރާއްޖޭގައިވެސް މޭޑޭއަކީ ކޮންމެ އަހަރަކުވެސް އެއްގޮތަކުން ނުވިއްޔާ އަނެއްގޮތަކުންވެސް ފާހަގަ ކުރުމަށް މަސައްކަތް ކުރެވެމުން އައިސްފައިވާ ދުވަހެކެވެ. އަދި ގިނަފަހަރަށް ރާއްޖޭގައި މިދުވަސް ފާއިތުވެދިޔަ ތަނުގައި ފާހަގަށް ކޮށްފައިވަނީ، ސިޔާސީ ފަރާތްތަކުން އިސްވެސް ތިބެގެންނެވެ. ނަތީޖާއެއްގެ ގޮތުން ކޮންމެ އަހަރަކުވެސް މި ދުވަސް ކުލަގަދަކޮށް ފާހަގަ ކުރުމާއި ދެކޮޅަށް، އަބަދުވެސް އޭރަކު އޮންނަ ސަރުކާރަކުން ބޮޑެތި ހުރަސްތަކާއި ގޮންޖެހުންތަކާ އޮންނަނީ ކުރިމަތި ލާންޖެހިފައެވެ.

މިދުވަސް އެންމެ ފަހުން އެންމެ ކުލަގަދަކޮށް ރާއްޖޭގައި ފާހަގަ ކޮށްފައިވަނީ، 2015ވަނަ އަހަރު، ރައީސް ޔާމިންގެ ސަރުކާރާ ދެކޮޅަށް އޭރުގެ އިދިކޮޅު ފަރާތްތަކުން އިންތިޒާމްކުރި ބޮޑު މުޒާހިރާގައެވެ. މިމުޒާހިރާއަކީ ފަހުގެ ތާރީޚެއްގައި މާލޭގެ މަގުތަކަށް މީހުން ޖަމާވެ ބޭއްވިގެންދިޔަ އެންމެ ބޮޑު މުޒާހިރާއަށް ވެގެން ދިޔައިރު، މި މުޒާހިރާ ވެގެންދިޔައީ، މުޒާހިރާއަށްފަހު އޭރުގެ ސަރުކާރުން އިދިކޮޅު އެތައް ބަޔަކު ހައްޔަރުކޮށް، އޭގެފަހުން ޖަލަށްލާ، އަދި އެމުޒާހިރާގައި އިސްކޮށް ހަރަކާތްތެރިވި، އޭރުގެ ސަރުކާރާ އިދިކޮޅު ސިޔާސީ އެތައް ފަރާތްތަކެއް ރާއްޖެ ދޫކޮށް ގައުމަށް ބޭރަށް އަމިއްލައަށް އަރުވާލެވެންވެސް މަޖުބޫރުވި މުޒާހިރާއެއްގެ ގޮތުގައެވެ.

އެއަށްފަހު ރައީސް ޔާމިންގެ ސަރުކާރުގައި އެކަށީގެންވާ ގޮތެއްގައި ރާއްޖޭގައި މޭޑޭ ފާހަގަ ކުރުމުގެ ފުރުސަތު އެސަރުކާރުން ދީފައެއް ނުވެއެވެ.
އަދި، ރައީސް ސާލިހުގެ ވެރިކަމުގައިވެސް އެކި އަހަރުތަކުގައި މޭޑޭ ފާހަގަ ކުރުމަށް މޯލްޑިވްސް ޓްރޭޑް ޔޫނިއަންއިން، މަސައްކަތްތެރިންގެ އަޑު އުފުލުމަށް އެއްވުންތައް ބާއްވާނެކަން އިއުލާން ކޮށްފައި ވެއެވެ. އެހެންނަމަވެސް މިހުރިހާ އެއްވުންތައްވެސް އިންތިޒާމު ކޮށްފައިވާ ގޮތަށް ނުބޭއްވޭނެކަމަށް ފުލުހުން އެންމެ ފަހުވަގުތު އަންގާ، ރައީސް ސާލިހުގެ 5 އަހަރުވެސް ދިޔައީ އެކަށީގެންވާ ގޮތެއްގައި މޭޑޭ ފާހަގަ ނުކުރެވިއެވެ.

ހަމަ އެފަދައިން ރައީސް މުއިއްޒުގެ ވެރިކަމުގައި އައި ފުރަތަމަ މޭޑޭ ރެލީ ފާހަގަ ކުރުމަށް މިއަދު 3:45 ގައި ހިނގާލުމެއް ބޭއްވުމަށް މޯލްޑިވްސް ޓްރޭޑް ޔޫނިއަން ކޮންގްރެސްއިން ވަނީ ހަމަޖައްސާފައެވެ. އަދި އެ ޖަމިއްޔާއިން ވަނީ މި ހިނގާލުމުގައި ވީހާވެސް ގިނަ މަސައްކަތްތެރިން ބައިވެރިވުމަށްވެސް ގޮވާލާފައެވެ.

މި ހިނގާލުން ބޭއްވުމާއި ގުޅޭގޮތުން ފުލުހުން އަދި އެއްވެސް ކަމެއް ފާހަގަ ކޮށްފައި ނުވާކަން ފާހަގަ ކޮށްލެވެއެވެ.

މަސައްކަތްތެރިންގެ ހައްގުގައި އަޑު އުފުލާނެ ބަޔަކު ނެތް!

މަސައްކަތްތެރިންގެ ހައްގުގައި އަޑު އުފުލާނޭކަމުގެ ވައުދަކީ، ކޮންމެ ރިޔާސީ އިންތިޚާބެއްގައިވެސް، ސިޔާސީ ފަރާތްތަކުން އެންމެ ބޮޑަށް އަޑުއުފުލާ، ވާ އެންމެ މުހިންމު އެއް ވައުދެވެ. އެހެންނަމަވެސް، ދިވެހިރާއްޖެ އަދިވެސް ފާހަގަވެގެން ގޮސްފައިވަނީ، މަސައްކަތްތެރިންގެ ހައްގުތައް ފުރިހަމަޔަށް ރައްކާތެރި ކުރެވިފައި ނުވާ ގައުމެއްގެ ގޮތުގައެވެ.

އެކަށީގެންވާ މުސާރައެއް މަސައްކަތްތެރިންނަށް ލިބި ނުދެވުމާއި، މަސައްކަތުގެ މާހައުލަށްވެސް އެކަށީގެންވާ ހެޔޮ ބަދަލުތައް އައިސްފައި ނުވާ ގައުމެއްގެ ގޮތުގައެވެ.

އެހެންނަނަމެވެސް، މަސައްކަތްތެރިންނަށް މިގޮތުން ކުރިމަތިވެފައިވާ ގޮންޖެހުންތައް ނައްތާލާ، މަސައްކަތްތެރިންނަށް އެކަށީގެންވާ މުސާރައެއް ފޯރުކޮށް ދިނުމުގެ މަގުސަދުގައި، ސަރުކާރުން ދާދިފަހުން، މަސައްކަތްތެރިންނަށް ލިބިދެވޭނެ އެންމެ ކުޑަ މުސާރައެއް އެކަށައެޅިނަމަވެސް، މިގެނައި ބަދަލުންވެސް އެންމެ އެކަށީގެންވާ ހެޔޮބަދަލު، މަސައްކަތްތެރިންގެ ހާލަތަށް އައިސްފައި ނުވާކަން މި ފުރުސަތުގައި ފާހަގަ ކޮށްލާން ޖެހެއެވެ. އަދި ހަމައެއާއެކު، ރާއްޖޭގެ އެކި ވަޒީފާތަކުގައި އަދިވެސް، ބޮޑު މުސާރާގައި (ބައެއް އޮފީސްތަކުގެ ވެރީންގެ ގޮތުގައިވެސް) ބިދޭސީން މަސައްކަތް ކުރަމުންދާ ދިއުމާއި، ރިސޯޓުތަކުގައި މަސައްކުރަމުންދާ އެތައްހާސް މުވައްޒިފުންގެ ކެއުމާއި، ބުއިމާއި، އެކަމަޑޭޝަނާއި، އެމީހުންނަށް ސާވިސް ޗާރޖު ލިބިދިނުންފަދަ އެތައް ކަމެއްގައި އަދިވެސް ބޮޑެތި އިހުމާލްތައް ހުރިކަމުގެ ޝަކުވާތައް ހުރީ އިންތިހާގައެވެ.

ހަމަ އެއާއެކު، މަސައްކަތްތެރިންނާމެދު ހުރި ބޮޑެތި އިހުމާލުތަކުގެ އިތުރަށް، ގިނަބަޔަކު ފާޅު ކުރަމުންދާ އެންމެ ބޮޑު އެއް ކަންބޮޑުވަމަކީ، ދިވެހިރާއްޖޭގައި މަސައްކަތްތެރިންގެ ހައްގުގައި އަޑު އުފުލާނޭ ބަޔަކު ނެތުމުގެ ކަންބޮޑުވުމާއި މާޔޫސްކަމެވެ. އަދި އަމުދުން އިދިކޮޅު ސިޔާސީ ފަރާތްތަކަކީ، މަސައްކަތްތެރިންނާމެދު ވެވޭ އިހުމާލުތަކުގައި ސަރުކާރު ޒިންމާދާރު ކުރުމުގެ މަސްއޫލިއްޔަތު އުފުލަންޖެހޭ ފަރާތަކަށް ވާއިރު، ފާއިތުވު މަޖިލިސް އިންތިޚާބުގައި އިނދިކޮޅު ސިޔާސީ ފަރާތްތަކަށް ލިބިގެންދިޔަ ބޮޑު ނާކާމިޔާބީއާއެކު، މަސައްކަތްތެރިންގެ ހައްގުތަކާއި ގުޅޭގޮތުން ސަރުކާރު ޒިންމާދާރު ކުރުވަންޖެހޭ އިނދިކޮޅު ފަރާތްތައް އަދިވެސް ތިބީ "ބިމަށް ތުން ހަރާލައިގެން"ކަން ފާހަގަ ކޮށްލެވެއެވެ.

އެހެންކަމުން، މިއަދު ދުނިޔޭގެ އެކި ކަންކޮޅުތަކުގައި މަސައްކަތްތެރިންގެ ހައްގުގައި އަޑު އުފުލެމުން ދާއިރު، ދިވެހިރާއްޖެއިން ފެންނާން ހުރީ ފަޅުކަމެވެ. މާޔޫސްކަމެވެ. ފެންނާން އޮތީ މަސައްކަތްތެރިންގެ ހައްގުގައި އަޑު އުފުލާނޭ ބަޔަކު ނެތްތަނެވެ. މިއީ ކޮޅުނެތްކޮޅަށް ހިތާމަހުރި މައްސަލައެއްކަމީ ކަށަވަރުވެ ޔަގީންވާން އޮތް ކަމެކެވެ.