ފަލަސްތީނުގެ ސިވިލް ޑިފެންސްގެ ޓީމުތަކުން ބުދަ ދުވަހުގެ ނިޔަލަށް ނާސިރު ހޮސްޕިޓަލުން 324 މީހެއްގެ ހަށިގަނޑު ފެނިފައިވާ ކަމަށް އދ.ގެ އިންސާނީ އެހީދޭ އިދާރާ، އޯސީއެޗްއޭއިން ބުނެފި އެވެ.
ފަލަސްތީނުގެ ސިވިލް ޑިފެންސްއާ ހަވާލާދީ އޯސީއެޗްއޭ އިން ބުނީ ހޮސްޕިޓަލުގައި ވަޅުލާފައި ތިއްބާ ފެނުނު މީހުންގެ ތެރޭގައި އަންހެނުންނާއި އުމުރުން ދުވަސްވީ މީހުންނާއި ބަލި މީހުން ހިމެނޭ ކަމަށާއި، ވަޅުލާފައިވާ މީހުންގެ ތެރެއިން ކާކުކަން ފާހަގަކުރެވިފައި ވަނީ ވަރަށް މަދު ބައެއްގެ ކަމަށެވެ.
އދ.ގެ އިންސާނީ ހައްގުތަކާ ބެހޭ ވެރިޔާ ވޮލްކަރ ތުރުކް ވަނީ މި މަރުތަކުގެ މިނިވަން، ހަރުދަނާ އަދި ދެފުށް ފެންނަ ތަހުގީގެއް ހިންގުމަށް ގޮވާލައްވާފައެވެ.
"ބައިނަލްއަގްވާމީ އިންސާނީ ގާނޫނުގެ ދަށުން ހޮސްޕިޓަލްތަކަށް ވަރަށް ހާއްސަ ހިމާޔަތެއް ލިބެން ޖެހޭ ކަމަށާއި އާންމުންނާއި ބަންދުމީހުން އަދި ހަނގުރާމަ ކުރާ އެހެން މީހުން ގަސްދުގައި މަރާލުމަކީ ހަނގުރާމައިގެ ޖަރީމާއެއް،" ތުރުކީ ވިދާޅުވި އެވެ.
އިސްރާއީލުން ޢައްޒާއަށް ދެމުންދާ އުދުވާނީ ހަމަލާތަކުގައި މިހާތަނަށް ވަނީ 34،000 އަށްވުރެ ގިނަ މީހުން ޝަހީދު ކޮށްލާފައެވެ.
