ސިޔާސީ މަސްރަހުން ވަގުތީގޮތުން ދުރަށް ޖެހިވަޑައިގެންފައިވާ ކުރީގެ ރައީސް މުހައްމަދު ނަޝީދު ގާނާއަށް ދިރިއުޅުން ބަދަލު ކުރެއްވުމަށް ކުރިޔަށް އޮތް މަޖިލިސް އިންތިޚާބާއި ދިމާކޮށް މާލެ ވަޑައިގެންނެވުމަށްފަހު އެމަނިކުފާނުގެ މުޅި ފޯކަސްއަކީ އެމްޑީޕީއަށް މަޖިލިސް ލިބުނަ ނުދިނުން ކަމުގައި ހައްދަވައިފިއެވެ.
އެގޮތުން މިމަހުގެ 17 ވަނަ ދުވަހު މާލެ ވަޑައިގެންނެވުމަށް ނަޝީދު މިހާރު ގެންދަވަނީ މަޖިލިސް އިންތިޚާބުގައި ޑިމޮކްރެޓްސްގެ ޓިކެޓުގައި ވާދަކުރައްވާ އެޕާޓީގެ ކެނޑިޑޭޓުންނަށް ތާއީދު ހޯދުމުގެ ގޮތުން ކެމްޕޭން ޖަލްސާތަކުގައި ބައިވެރިވެވަޑައިގެންނަވަން ފައްޓަވާފައެވެ. އެގޮތުން ނަޝީދު ބައިވެރިވެވަޑައިގެންނެވި ފުރަތަމަ ޖަލްސާ ބޭއްވީ ވިލިމާލޭގައެވެ. ވިލިމާމެއަށް ޑިމޮކްރެޓްސްގެ ޓިކެޓްގައި ވާދަކުރައްވަނީ މުހައްމަދު ޝިފާޒް (ޝިއްޕެ) އެވެ.
އެ ޖަލްސާގައި ނަޝީދު ވިދާޅުވީ މަދުވެގެން 30 ގޮނޑި ޑިމޮކްރެޓްސްއަށް ދޫކޮށްލައޮފިނަމަ އެމްޑީޕީއާ އެއްވާން ތައްޔަރަށް ހުންނެވިކަމަށެވެ. އެހެންނަމަވެސް ނަޝީދުގެ އެ ވާހަކަތަކަށް އެމްޑީޕީގެ ގިނަ ބައެއްގެ ފާޑުކިޔުން އަމާޒުވެފައިވަނިކޮށް، ނަޝީދު ދެން ބޭއްވި ޖަލްސާގައި ވިދާޅުވީ ބޯހިޔާވަހިކަމުގެ ވައުދު ވެސް އެމްޑީޕީއަށް ނުފުއްދުނު ކަމަށާއި ވެރިކަން ނިމެން ގާތްވުމުން ރައްޔިތުންނަށް ގޯއްޗާއި ފުލެޓް ދިނުމުގެ ނަމުގައި ހިންގީ ބޮޑު އޮޅުވާލުމެއް ކަމަށެެވެ. އެމްޑީޕީގެ ބޯހިޔާވަހިކަމުގެ ސިޔާސަތު ނަޝީދު ސިފަ ކުރެއްވީ ބޮޑު "ސިހުރެއްގެ" ގޮތުގައެވެ.
އެ ޖަލްސާގައި ނަޝީދު ވިދާޅުވީ ރަައީސް ސޯލިހުގެ ސަރުކާރުގެ މެނިފެސްޓޯގައި އޮތީ ވެށިފަހި މާލެ ޕްރޮގްރާމު ހިންގުން ކަމަށާއި މާލޭ ސަރަހައްދުގައި އެނޫން ޕްރޮގްރާމެއް ހިންގުމެއް ނެތް ކަމަށެވެ.
އިންތިހާބަށް ކުޑަ ދުވަސްކޮޅަކަށް ވީމާ، މިއީ ބޯހިޔާވަހިކަމޭ ކިޔާފައި، އެއީ ސިހުރެއް. އޭރުގައި ވެސް އަޅުގަނޑުމެން ދެންނެވިން އެއީކީ ބޯހިޔާވަހިކަމުގެ ސިޔާސަތެއް ނޫނޭ. އެންމެ ފަހުން ބަލައިލި އިރުގައި ގޯތި ދީފައި ހުރީ ނަރުދަމާގެ މަތީގައި. ގާދޫކޮލުން ގޯތި ކަނޑާފައި އޮތީ، ކާށިދޫ ކަނޑުންނާ.
ނަޝީދު ވިދާޅުވި އެވެ.
އޭގެ އިތުރުން ނަޝީދުވަނީ ރައީސް ސާލިހުގެ ސަރުކާރުގެ މާލީ ސިޔާސަތަށްވެސް ވަރަށްބޮޑަށް ފާޑު ވިދާޅުވެ ވާހަކަ ދައްކަވާފައެވެ. އެގޮތުން ނަޝީދު ވިދާޅުވެފައިވަނީ 19 ވަނަ މަޖިލިސް އުފެދިގެން އައީ ދިވެހި ދައުލަތުގެ ދަރަނި އަލުން އަނބުރާ އެކުލަވާލާނެކަމުގެ ވައުދާއެކު ކަމަށާއި އެހެން ނަމަވެސް އެމްޑީޕީން ކަން ކުރީ މެނިފެސްޓޯއާ ދިމާ އިދިކޮޅަށް ކަމަށެވެ. އަދި ނަޝީދު ވިދާޅުވީ އެމްޑީޕީގެ ސަރުކާރުގައި ގައުމުގެ އުފެއްދުންތެރިކަން ދިޔައީ ދަށައް ކަމަށެވެ.
އަނެއްކާ އަނެއް ސުކޫކް ބޮންޑު ވިއްކެވި، ދަރަނި ދައްކަން ވެގެން އަނެއްކާ ދަރަންޏަށް ފައިސާ މި ނެގުނީ، ދަރަނީގެ ދަންތުރަ އިން ދިވެހިން އެއްގޮތަކަށް ވެސް ސަލާމަތް ވާގޮތް ނުވީ. މިއަދު އަޅުގަނޑުމެންގެ އުފެއްދުންތެރިކަމުގެ 120 ޕަސެންޓު އެހުރީ ދަރަނީގެ މިންވަރުގައި ދިވެހި ދައުލަތަށް ލިބޭ އެއްޗެއްގެ 20 ޕަސެންޓް އެދަނީ ދަރަނި އަނބުރާ ދެއްކުމަށް.
ނަޝީދު ވިދާޅުވިއެވެ.
ނަޝީދު ކުއްލިގޮތަކަށް 20 ވަނަ ރައްޔިތުންގެ މަޖިލިހުގެ މެޖޯރިޓީ އެމްޑީޕީއަށް ލިބުނަ ނުދިނުމަށް މަސައްކަތް ފެއްޓެވީ ފާއިތުވެދިޔަ ދުވަސްތަކުގައި ސޯޝަލް މީޑިއާގައި ރައީސް މުއިއްޒުގެ ސަރުކާރުގެ ސިޔާސަތުތަކަށް ތާއީދުކޮށް ވާހަކަ ދައްކަވަމުން ގެންދަވާފައެވެ. އެގޮތުން ނަޝީދު ގެންދެވީ ފަހަކަށް އައިސް ރައީސް މުއިއްޒުގެ މާލީ ސިޔާސަތުތަކަށް ސަނާ ކިޔުއްވާ ސޯޝަލް މީޑިއާގައި ވާހަކަ ދައްކަވާފައެވެ.
އެހެންނަމަވެސް ރައީސް މުއިއްޒި ވެރިކަމުގެ ހުވާ ކުރެއްވުމަށްފަހު ފާއިތުވެދިޔަ 4 މަހެއްހާ ދުވަހުގެ ތެރޭގައި އެ ޕާޓީން މަސައްކަތް ކޮށްފައިވަނީ ރައީސް މުއިއްޒުގެ ސަރުކާރާ ދެކޮޅަށް އަދި އެމްޑީޕީއާ ގިނަ ކަންކަމުގައި އެއް ޕްލެޓްފޯމެއްގައިކަން ފާހަގަ ކޮށްލެވެއެވެ.
އެހެންކަމުން ނަޝީދުގެ މިހާރުގެ ވިސްނުމާއި އަދި ޑިމޮކްރެޓްސް ޕާޓީން ފާއިތުވެ ކުރު މުއްދަތުގައި ހަރަކާތްތެރިވެފައިވާ ހަމަތަކާއި އުސޫލްތައް އުޑާއި ބިލާހާ ތަފާތުކަން ސާފުކޮށް ފެންނާން އެބައޮތެވެ.
ނަޝީދު އެމްޑީޕީއަށް މަޖިލިސް މެޖޯރިޓީ ލިބުނަ ނުދިނުމަށް ވަކާލާތުކޮށް ކެމްޕޭން ކުރައްވަމުން ގެންދަވާއިރު، ޑިމޮކްރެޓްސްއިން މަޖިލިހަށް ވާދަކުރައްވަމުން ގެންދަވަނީ މަދު ކެނޑިޑޭޓުންކޮޅެއްކަން ފާހަގަ ކޮށްލެވެއެވެ. އަދި އޭގެ ތެރެއިންވެސް އެޕާޓީއަށް ގޮޑިތަކެއް ނެގިދާނެކަމާމެދު ގިނަބަޔަކު ދަނީ ޝައްކު ކުރަމުންނެވެ.
ނަޝީދު ޑިމޮކްރެޓްސް ޕާޓީ އުފައްދެވީ އެމްޑީޕީއާއި ޚިޔާލުތަފާތުވެ އެޕާޓީނ ވަކިވި މަދު ބަޔަކު އިސްވެ ތިއްބަވައިގެންނެވެ. އަދި އެޕާޓީއަށް ފާއިތުވި ރިޔާސީ އިންތިޚާބުގައި އެންމެ 15،000 ވޯޓު ލިބިގެންދިޔައިރު، އެޕާޓީ އަދިވެސް އޮތީ 3،000 މެމްބަރުން ކިރިޔާ ހަމަވާ ޕާޓީއެއްގެ ގޮތުގައެވެ.
