ކަރަންޓް ކެނޑުމުގެ މައްސަލަ މި ފަހުން ވަރަށް ބޮޑަށް ދިމާވެފައިވާ ކުޅުދުއްފުށީގެ ފެނަކަ ބްރާންޗް ހިންގުމާ ހަވާލުވެހުރި އިސްފަރާތް ސަސްޕެންޑް ކޮށްފިއެވެ.
ކުޅުދުއްފުށީ ބްރާންޗްގެ މި ވަގުތު އިސްވެރިއަކަށް ހުންނެވި އަބްދުލް ހަމީސް އިބްރާހިމް ސަސްޕެންޑް ކޮށްފައިވާއިރު، އޭނާ ހިމެނޭގޮތުން 3 މުވައްޒަފަކު ވަނީ ސަސްޕެންޑް ކޮށްފައެވެ. މި އެންމެންވެސް ސަސްޕެންޑް ކޮށްފައިވަނީ މަސައްކަތްތަކަށް އެއްބާރުލުން ނުދޭ ކަމަށް ބުނެ ދެ ހަފުތާގެ މުއްދަތަކަށެވެ.
ކުޅުދުއްފުށީ ބުރާންޗް ހިންގުމާ ހަވާލުވެހުރި އިސްފަރާތް ސަސްޕެންޑް ކުރުމަށްފަހު ބްރާންޗް ޗްހިންގުން މިހާރު ހަވާލުކޮށްފައި ވަނީ ބްރާންޗްގެ މެނޭޖަރުގެ މަގާމުގައި ހުންނެވި މަމްދޫހު އަލީއާ އެވެ.
ކުޅުދުއްފުށީ ފެނަކަ ބްރާންޗްގެ މުވައްޒަފުންތަކެއް ސަސްޕެންޑްކުރިކަން އެ ކުންފުނިން ވެސް މިއަދު ކަށަވަރުކޮށް ދީފައިވެ އެވެ. އަދި އެ މީހުން ސަސްޕެންޑްކުރީ ގިނަ މައްސަލަތަކާ ގުޅިގެން ކަމަށް ވެސް ބުނެފައިވެ އެވެ.
ނަމަވެސް މައްސަލައް ބަލަމުންދާތީ އިތުރު ތަފުސީލެއް ދެވެން ނެތް ކަމަށް ފެނަކައިގެ މެނޭޖްމަންޓުން ބުނެފައިވެ އެވެ.
ކަރަންޓް ކެނޑޭ މައްސަލައިގައި ކުޅުދުއްފުށީގައި ދާދި ފަހުން މުޒާހަރަކާތެއް ވެސް ކޮށްފައިވާ އިރު، އެ ސިޓީ އަށް އިހުމާލުވެފައިވާ ކަމަށް ބުނެ ފެނަކައިގެ މުވައްޒަފުންތަކެއް ވެސް އަޑު އުފުލާފައިވެ އެވެ.
ކޮމެންޓު ފޮނުވާ