ވަރުން ދަވަން އާއި ނަތަޝާ ދަލާލް އަކީ ސްކޫލު ދައުރުއްސުރެ ވަރަށް ގާތް ދެ ރައްޓެހިންނެވެ. އަދި މިހާރު ދެމީހުން ލޯބީގެ ގޮތުން ގުޅިގެން އުޅޭތާވެސް އަހަރުތަކެއް ވެއްޖެއެވެ.
ވަރުން ދާދި ފަހުން އެދެމީހުންގެ ކައިވެންޏާ ބެހޭގޮތުން ވާހަކަދައްކާފައެވެ. ކަރީނާ ކަޕޫރް ޚާންގެ ޗެޓް ޝޯވ ގައި ކައިވެންޏާމެދު ވާހަކަދެކެވުމުން، އޭނާ ބުނެފައިވަނީ އެދެމީހުން ކައިވެނިކުރަން ނިންމިކަމަށާއި، ކައިވެނިނުކޮށް ލިވިން ރިލޭޝަންޝިޕެއްގައި އުޅެންވެސް ނަތާޝާ ޤަބޫލުކަމަށެވެ.
ނަމަވެސް ވަރުންގެ މައިންބަފައިންނަށް މިއީ މާ ރަނގަޅު ގޮތެއް ކަމަށް ނުފެންނަކަމަށާއި އެމީހުން ބޭނުންވަނީ އެދެމީހުން ވީހާވެސް އަވަހަކަށް ކައިވެނި ކުރުން ކަމަށް 33 އަހަރުގެ އެކްޓަރ ވަރުން ބުންޏެވެ.
ވަރުން ބުނިގޮތުގައި ކައިވެނިކުރަން ހިޔާލުކުރީ އޭނާގެ ބޭބެ އާއި ފަހަރި އަދި އެދެމީހުންގެ ދަރިފުޅު ނީރާ އެކު އުފަލުގައި އުޅޭތަންފެނުމުން ކަމަށެވެ. އަދި ނަތާޝާގެ މައިންބަފައިންނާއި ނަތާޝާވެސް ލިވިން ރިލޭޝަންއެއްގައި އުޅެން އެއްވެސް މައްސަލައެއްނެތް ކަމަށް ވަރުން ބުނެފައިވެއެވެ.
ރިޕޯޓުތައް ބުނާގޮތުގައި ވަރުން އާއި ނަތާޝާވަނީ މިއަހަރު ތައިލެންޑްގައި ކައިވެނި ކުރަން ނިންމާފައެވެ. ނަމަވެސް ކޮވިޑް 19 އާއި ގުޅިގެން ރޭވުންތައް ކެންސަލު ކުރަން ޖެހުނީއެވެ. އޭގެ ފަހުން އަދި އެދެމީހުން ކައިވެނިކުރާނެ ވަކި ދުވަހެއް ކަނޑައަޅާފައެއް ނުވެއެވެ.
ވަރުން ދަވަން މިހާރު ތައްޔާރުވަމުން ދަނީ ފިލްމު "ކޫލީ ނަމްބަރ 1″ ރިލީޒްކުރުމަށެވެ. މި ފިލްމާއި ބެހޭގޮތުން ވާހަކަ ދައްކަމުން ވަރުން ބުނީ، ފިލްމުގައި އޭނާ ކުޅުނު ރޯލުތަކަކީ އޭނާ ވަރަށް ހިތްހަމަޖެހޭ ރޯލުތަކެއް ކަމަށާއި ސާރާއާއި އެކު މަސައްކަތް ކުރަން ވަރަށް ފަސެހަކަމަށެވެ. އަދި ސާރާ އަކީ ވަރަށް ހުނަރުވެރި ކުއްޖެއްކަމަށްވެސް ވަރުން ބުންޏެވެ. އަދި އޭނާގެ ބައްޕަ ޑޭވިޑް ދަވަން ޑައިރެކްޓު ކުރި މި ފިލްމަކީ އޭނާއަށް ވަރަށް ހާއްސަ ފިލްމެއް ކަމަށްވެސް ވަރުން ވަނީ ބުނެފައެވެ.
