ދެވަނަ ދަރިފުޅަށް ބަލިވެއިން، އިންޑިއާގެ މަޝްހޫރު ތަރި ކަރީނާ ކަޕޫރް ޚާން އޭނާއަށް އެންމެ ކަމުދާ އަންހެނަކީ ކޮބައިކަން، އެކަކުވެސް ނާހަނީސް އަމިއްލައަށް ބުނެދީފިއެވެ.
އިންސްޓަގްރާމްގެ ސްޓޯރީއަށް ދޫކޮށްލި ފޮޓޯއެއްގައި ކަރީނާ ބުނެފައިވަނީ، އޮސްކަރ އެވޯޑުވެސް ހާސިލްކޮށްފައިވާ، ހޮލީވުޑްގެ ތަރި ޕެނޯލޮޕޭ ކުރޫޒް އަކީ ހޮލީވުޑުން އޭނާއަށް އަބަދުވެސް ވަރަށް ކަމުދާ އަންހެނެއްކަމަށެވެ.
މީޑިއާތަކުން ބުނާ ގޮތުގައި ކަރީނާ އާއި ޕެނޯލޮޕޭ ކުރޫޒްއާ ވަރަށް އެއްގޮތް ކަންތަކެއްވެސް އެބަހުއްޓެވެ. އެގޮތުން ދެމީހުންނަކީވެސް ރީތިކަމަށް މަޝްހޫރު ދެމީހުންނެވެ. އަދި ދެމީހުންނަކީވެސް މަސައްކަތްކުރުމާއެކު މަންމައެއްގެ ޒިންމާވެސް އަދާކުރަމުންދާ ދެމީހުންގެ އިތުރުން ދެމީހުންނަކީވެސް މުނިފޫހި ފިލުވުމުގެ ދާއިރާއިން އާންމުން ވަރަށް ބަލައިގަންނަ ދެމީހުންނެވެ.
2 ވަނަ ދަރިއަށް ބަނޑު ބޮޑު އިރުވެސް ކަރީނާ ގެންދަނީ ފިލްމީ ދާއިރާގެ ބައެއް ކަންކަމުގައި ހަރަކާތްތެރި ވަމުންނެވެ. އޯގަސްޓް މަހު 2 ވަނަ ދަރިއަކު ލިބެން އުޅޭކަން އިއުލާން ކުރި ކަރީނާ އަންނަ މާޗު މަހު މި ދަރިފުޅަށް މަރުހަބާ ކިޔާނެ އެވެ.
ކަރީނާ ކަޕޫރު ޚާންގެ ކުރިއަށް ހުރި ފިލްމުތަކަށް ބަލާއިރު އޭނާ މިހާރު އިންތިޒާރު ކުރަމުންދަނީ އާމިރް ޚާނާއެކު ފެނިގެންދާ، ބޮލީވުޑް ފިލްމު "ލާލްސިންގް ޗައްޑާ" ރިލީސްކުރާ ދުވަހަކަށެވެ.
