ޕީޕީއެމް/ޕީއެންސީ ލީޑާޝިޕްގައި ތިއްބެވި ބޭފުޅުންނަށް ވުރެ ކުރީގެ ރައީސް އަބްދުﷲ ޔާމީން އަށް އިހްލާސްތެރި އަނބިކަނބަލުން އަދި ދަރިކަލަކު ނުހުންނާނެ ކަމަށް ރައީސް ޑރ. މުހައްމަދު މުއިއްޒުގެ ހާއްސަ އެޑްވައިޒަރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިއަދު ވިދާޅުވެއްޖެއެވެ.
ޕީޕީއެމް/ޕީއެންސީން މިއަދު ބޭއްވި ޕެނަލް ޑިސްކަޝަނެއްގައި ވާހަކަ ދައްކަވަމުން އަބްދުއްރަހީމް ވިދާޅުވީ ޔާމީންގެ ހައްގުގައި ޕީޕީއެމް/ޕީއެންސީގެ ބޭފުޅުން ވެވަޑައިގެންނެވީ ވަަރަށް ބޮޑު ގުރުބާނީއެއް ކަމަށެވެ. އަދި އެ ބޭފުޅުން މިދިޔަ ފަސް އަހަރު އުޅުއްވީ ވަރަށް ހިތްދަތި ހާލެއްގައި ކަމަށް ވެސް ވިދާޅުވިއެވެ.
"ޕީޕީއެމް/ ޕީއެންސީއަށް ވުރެ އިހުލާސްތެރި އަންބަކު ދަރިއަކު ނެތް ޔާމީންގެ. ވަރަށް އަސަރުކުރި އަޅުގަނޑުމެންނަށް. ހާދަ ބޮޑު ގުރުބާނީއެެކޭ އަޅުގަނޑުމެންވީ. ހާދަ ހިތްދަތި ހާލެއްގައި އޭ އުޅުނީ. މަސައްކަތް އަޅުގަނޑުމެން ކުރީމާ އޭގެ އަގަކީ މުޅި ރައްޔިތުންގެ ކުރިމަތީގައި އަޅުގަނޑުމެން ބަދުނާމުކުރުންތޯ؟" އަބްދުއްރަހީމް ވިދާޅުވިއެވެ.
"އަޅުގަނޑު ސުވާލު އުފައްދަން ރައީސް ޔާމީން އެ ހުރިހާ ދުވަހު ޖަލުގައި އޮތްއިރު، މެޑަމް ފާތުން އެންމެ މުޒާހަރާއަކަށް ވަޑައިނުގަތީ، ޒޭން އެންމެ މުޒާހަރާއަކަށް ވަޑައިނުގަތީ ކީއްވެގެންތޯ، މިއީ ސުވާލު އުފައްދަން ޖެހޭ ކަންތައް، ކޮން ފާޑެއްތޯ ދެން އަޅުގަނޑުމެންނަށް ކިޔޭނީ،"
އަދުރޭ ވިދާޅުވީ، ރައްޔިތުންގެ މަޖިލީހުގެ އިންތިހާބު މިހާ ގާތްވެފައި އޮތްއިރު، 2023ގައި ނިންމި ނިންމުން ދަމަހައްޓަން ރައްޔިތުން ފުންކޮށް ވިސްނަން ޖެހޭ ކަމަށާއި، އެއީ ގައުމަށް އޮތް އެންމެ ރަނގަޅު ގޮތް ކަމަށެވެ.
"އިތުބާރު ނުހިފޭ މީހުން ދައްކާ ވާހަަކައިގެ މައްޗަށް ބުރަވެ، ކަން ކުރީމަ އޭގެ ހުރިހާ ގެއްލުމެއް އަންނާނީ ގައުމަށާއި ރައްޔިތުންނަށް،" އަބްދުއްރަހީމް ވިދާޅުވިއެވެ.
ޔާމީން ޖަލަށް ލުމުން މިނިވަންކުރުމަށް ގޮވާލައި ބޭއްވި މުޒާހަރާތަކާއި ކެމްޕެއިނު ހަރަކާތްތަކުގައި ޕީއެންއެފް އުފެއްދެވުމުގައި މިހާރު މަސައްކަތް ކުރެއްވި ބޭފުޅުން އުޅުއްވާފައި ނުވާތީ އަބްދުއްރަހީމް ވަނީ ފާޑު ވިދާޅުވެފައެވެ. އަބްދުއްރަހީމް ބޮޑަށް ފާޑު ވިދާޅުވީ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދަށާއި ކުރީގެ މިނިސްޓަރު މުހައްމަދު މަލީހް ޖަމާލް އާއި ކުރީގެ ޕޮލިސް ކޮމިޝަނަރު ހުސެއިން ވަހީދަށެވެ.
