މާލޭގެ މަގުމަތީގައި ކުނި ކަހަން ހުރި މީހެއްގެ ގައިގައި ރޭ ސައިކަލަކުން ޖެއްސުމަށް ފަހު ފިލައިފިއެވެ.
ފުލުހުން މިއަދު ބުނީ އިއްޒުއްދީން މަގުގައި ކުނި ކަހަން ހުއްޓާ ސައިކަލަކުން ޖެއްސުމުން އަނިޔާވީ 48 އަހަރުގެ ދިވެހި އަންހެނަކަށެވެ. އެމީހާ އަށް މިހާރު ފަރުވާ ދެމުން އަންނަނީ އައިޖީއެމްއެޗްގައެވެ.
ފުލުހުން ބުނީ، އެ މައްސަލައިގެ ރިޕޯޓް ލިބުނީ ރޭގެ 11:30 ވާން އުޅެނިކޮށް ކަމަށެވެ. ސައިކަލުން ޖެއްސި ދެ މީހުން މަޑުނުކޮށް، ފިލާފައިވާ ކަމަށް ފުލުހުން ބުންޏެވެ.
ފުލުހުން މިހާރު ދަނީ އެ ސައިކަލްގައި ތިބި މީހުން ހޯދުމުގެ މަސައްކަތް ކުރަމުންނެވެ.
މާލޭގެ މަގުތަކުގައި ކުނި ނެގުމުގެ މަސައްކަތް ކުރަނީ މާލެ ސިޓީ ކައުންސިލްގެ މުވައްޒަފުންނެވެ.
