ހޮސްޕިޓަލްގެ އައިސީޔޫގެ ބޭރުގައި ހުރި އަންހެނަކު ބާރަށް ރޮމުން ދިޔައެވެ. އޭނާގެ ގިސްލުމާއި ހިތާމައަށް އުޑުވެސް ކަރުނަ އަޅާނެ ފަދައެވެ.

"ހުރިހާ ކުދިން ބައްދައިގެން ތިބިނަމަ. އެއްވެސް ކުއްޖަކު ދުރަށް ނުދިޔަނަމަ. އަހަރެންގެ ކުދިން އަހަރެންނަށް ނުގެއްލުނީސް" އެއަންހެން މީހާ ރޮމުން ގޮވަމުން ދިޔައެވެ.

އޭނާގެ އޮތީ ހުސް ނަމައެވެ. ދަތުރު ނުދިޔަ ނަމައެވެ. ފިނޮޅު ނޫން ތަނަކަށް ދިޔަ ނަމައެވެ. ހުރިހާ ކުދިން ބޮއްކުރާގައި ތިބި ނަމައެވެ. ކުދިންގެ ބައްޕަ އެކުދިންނާއި އެކު ދިޔަ ނަމައެވެ. އެއީ އުދަ ރާޅެއްގައި ފަސްދަރީން ގެއްލުނު މަންމައެއްގެ ރުއިމެވެ. ހިތާމައެވެ. ޝަކުވާއެވެ.

ޒިޔާދު އާއި ސަމާގެ ކައިވެނި ކުރެވުނީ، 2004 ވަނަ އަހަރުގެ ޑިސެމްބަރު މަހުގެ 24 ވަނަ ދުވަހުގައެވެ. ކައިވެނީގެ އުފަލަށް މާލެއިންނާއި ދުރުރަށް ރަށުން މަޑިފުއްޓަށް އާއިލާގެ މީހުން އައެވެ. އެއީ ރަށުގައި ބޭއްވުނު އެންމެ ބޮޑު ކައިވެނި ޕާޓީއަށް ވާނެއެވެ.

ޒިޔާދު އާއި ސަމާ ބައްދަލުވީ، ޓީޗަރ ޓްރޭނިންގ ހަދަމުން ދިޔައިރު، ކޮލެޖުންނެވެ. ތިން އަހަރުގެ ކޯސް ނިމުނު އިރު ދެމީހުންގެ ދެމެދުގައި އޮތް އެކުވެރިކަން ލޯތްބަށް ބަދަލުވެ ކައިވެނީގެ ގުޅުމާއި ހަމައަށް އޮތީ އާދެވިފައެވެ، ސަމާއަކީ، މާލޭ މީހެއް ނަމަވެސް އޭނާ ބޭނުންވީ، ޒިޔާދާއި އިނދެގެން އޭނާގެ ރަށަށް ދާށެވެ. ކޯސް ނިމުމަށްފަހު ޚިދުމަތް ކުރާނެ ސްކޫލެއްގެ ގޮތުގައި މަޑިފުށީ ސްކޫލު ކަނޑައެޅީވެސް އެހެންވެއެވެ.

ޒިޔާދު އާއި ސަމާގެ ކައިވެނި ޕާޓީ އޮތީ، ޑިސެމްބަރު 24 ވަނަ ދުވަހުގެ ރޭ މަޑިފުށީ ބަނދަރު ސަރަހައްދުގައެވެ. އެކައިވެނީގެ ހަފްލާގައި ޝޯވ ދިނުމަށް ރާއްޖޭގެ މަޝްހޫރު ފަންނަނާނުންވެސް އެރަށަށް އައެވެ. އޭގެ ތެރޭގައި ލަވަކިޔުންތެރިންނާއި ނެށުންތެރިން ހިމެނެއެވެ. އެއީ މަޖާ އުފާވެރި ރެއެކެވެ. އެކަމަކު އެރޭގެ ނިމުންވެސް އައީ ބިރުވެރި ހާދިސާއަކުންނެވެ.

ހަމަރީތި ރީތިކޮށް މޫސުމް އޮތް އެރޭގައި މެންދަމު، 12 ޖަހައި ޝޯވ ނިންމާލަން ކައިރިވެފައި ވަނިކޮށް ބާރުގަދަ ހޮނު ގުގުރިއެއް ޖެހީއެވެ. ހޮނުއެޅީ ސްޓޭޖުގެ ދަގަނޑު ފްރޭމަށެވެ. އެއާއިއެކު މުޅިތަނުން ކަރަންޓް ކެނޑުނީއެވެ. ހަނދުވަރުގެ ފަނޑުއަލި ނެތްނަމަ ކަނު އަނދިރީގައި އަދި އެހެން ހާދިސާތައްވެސް ހިނގީހެވެ. އުޑުމަތީގައި ވިލާކޮޅެއްވެސް ނެތި، ރީތި ހަނދުވަރު އޮތް ރެއެއްގައި ކުއްލިއކަށް ހޮނު ގުގުރިއެއް ޖެހުމުން އެންމެންވެސް ތިބީ ހައިރާންވެފައެވެ.

އެހާދިސާ އާއި ގުޅިގެން އެތައް ބަޔަކަށް ބިރުވެރިކަން ކުރިމަތިވިއެވެ. ބޯދާ އަދި ޚުރާފާތުގެ ޤަބޫލުކުރުންތައް ޤަބޫލު ކުރާ ހަރު ފުރައިގެ އަންހެންވެރިން ވާހަކަ ދައްކަން ފެށީ، ޒިޔާދާއި ސަމާގެ ކައިވެންޏަކީ ސުންޕާ ކައިވެންޏެއް ކަމަށް ބުނެއެވެ. އެރޭގެ ހާދިސާގައި އެއްވެސް މީހަކަށް ޖިސްމާނީ ގެއްލުމެއް ނުލިބުނު ނަމަވެސް، ނަފްސާނީ ގޮތުން އެތައް ބަޔަކަށް ގެއްލުންވެ ހިތް ބިރުގަތެވެ. ޒިޔާދާއި ސަމާ މަސައްކަތް ކުރީ އާއިލާގެ މީހުންނާއި ގާތް މީހުން ހިތްހަމަޖައްސައި ދެވޭތޯއެވެ. އިލްމީ ގޮތުންނާއި ބުއްދީގެ ހަމަތަކުން ދަލީލު ދައްކައިގެންނެވެ.

ހަނދުކޭތަ ހިފުމާއި،ބިންހެލުމާއި. އަލިފާން ފަރުބަދަ ގޮވުމާއި، ތޫފާންތައް ޖެހުމާއި، ވިދާ ގުގުރުމަކީ، ވަކިމީހެއްގެ ސުންޕާކަމުން ނުވަތަ މާތްކަމުން ދިމާވާ ކަންކަމެއް ނޫނެވެ. އެއީ ޤުދުރަތީ ނިޒާމްގެ ތެރެއިން ރޭވިގެން ހިނގަމުންއަންނަ އެހެން އިންސާނަކަށް އެކަމަށް ބާރު ނުފޯރުވޭނެ ކަންކަމެވެ. ކާމޭޒުމަތީގަޔާއި ޖޯލިފަތީގައިވެސް އެންމެން ދެއްކީ އެވާހަކައެވެ. އެހެންކަމުން އެބިރުވެރިކަމާއި ހާސްކަމުން ސަލާމަތް ވުމަށް ދަތުރަކު ދިޔުމަށް ހުށައެޅީ ޒިޔާދެވެ.

ދަތުރު ދިޔުމުގެ ޚިޔާލަށް އެންމެން ތާއީދު ކުރިއެވެ. ދަތުރުދާން ކަނޑައެޅީ ކައިރީގައި އޮތް ފިނޮޅެވެ. ދެ ގުރޫޕަކަށް ބަހާލައިގެން ދަތުރު ދިޔުމަށް ރޭވި އިރު ފުރަތަމަ ބުރުގައި ދާން ނިންމީ ޒިޔާދާއި ސަމާ އާއި އާއިލާގެ ތިބި ޒުވާނުންނެވެ. ޒިޔާދުގެ މަންމަ އާއި ސަމާގެ މަންމަ އާއި ބޮޑުދައިތަމެން. މެންދުރަށް ކައްކައިގެން ހިފައިގެން އަންނަ ގޮތަށް ނިންމީ، ރަށު ބޯޓުން އަނެއް ދުވަހު ސަމާގެ އާއިލާގެ އިތުރު ބަޔަކު ރަށަށް އަންނާތީއެވެ.

ފަތިހު ފަތިހާ ތެދުވެ ޒިޔާދާ ސަމާ އާއި އެހެން ކުދިންނައި ގޮވައި ހޭލެއްވިއެވެ. ދަތުރުދާން އެއްޗެހި ހަމަކޮށް ހެނދުނު 7 ޖެހުމުގެ ކުރިން އެމީހުން ކުޑަ ޑިންގީގައި، ފިނޮޅަށް ފުރީ މައިން ބަފައިންނާއި، ގޭގެ ބޮޑެތި މީހުން މެންދުރަށް ފިނޮޅަށް އައުމަށް ވައުދު ކުރުވާފައެވެ. އެކަމަކު އެމީހުންނަށް އެކަމަށް ވައުދު ކުރެވުނީ ކީއްވެކަންވެސް ޒިޔާދަކަށް ނޭނގެއެވެ. ކޮންމެވެސް ނޭނގޭ އިހުސާސްތަކެއް އޭނާގެ ހިތުގައި ވެއެވެ. އެއީ ކުރީރޭގެ ހާދިސާގެ ބިރުވެރިކަން ކަމެއް ނުވަތަ ދާން އުޅޭ ދަތުރާއި މެދު އޮތް ކަން ބޮޑުވުން ކަމެއް އޭނާއަކަށް ނޭނގެއެވެ.

ސަމާގެ ދެކޮއްކޮ އާއި ޒިޔާދުގެ ހަތަރުކޮއްކޮ އާއި އަދި ދުރުތާ ތިމާގެ ކުއްޖަކާއިއެކު، ފިނޮޅަށްދާން އެމީހުން ފުރީ ހެނދުނު ހަތްގަޑި ބައިވާން އުޅެނިކޮށެވެ. އެއީ ޑިންގީގައިވެސް ފަސް ވަރަކަށް މިނިޓުން ދެވޭހައި ކައިރީގައި އޮތް ބޮޑު ފިނޮޅެކެވެ. ވައްލަ އާއި ކުރަނގި މާރަނގަ އަދި ބޮޑުގާދޫނި ނިދަން އަރާ ފިނޮޅެކެވެ. ގަހެއް ރުކެއް ހެދިފައި ނެތަސް ފިނޮޅު އެއްކޮށް ގިރައިލާ މޫސުމެއް މިހާރު ނާންނާތީ، ކުދި ކުދި ގަސްތައް ވަނީ ހެދެން ފަށާފައެވެ. އަދި ދޭތެރެ ދޭތެރެއިން އެފިނޮޅަށް ވެލާވެސް އަރައެވެ.

ޑިންގީ ދުއްވަން އިނީ ޒިޔާދެވެ. ސަމާ އާއި އެހެން ކުދިން ތިބީ ޑިންގީގެ ތެރޭގައި ލަވަ ކިޔާ މަޖާކުރާށެވެ. ފިނޮޅާއި ގާތްވި އިރު ޒިޔާދުގެ ލޮލުގައި އަޅައި ގަތީ ފިނޮޅުގެ ގުންޑޮޅީގައި ލޫދެމުން ދިޔަ އެއްޗެކެވެ. ފިނޮޅާއި ގާތްވަމުން ދިޔަ ވަރަކަށް ޒިޔާދުގެ ކަންބޮޑުވުން އިތުރުވިއެވެ. އަނބުރާލާފައި ރަށަށްދާންވެސް ހިތަށް އެރިއެވެ.

ފިނޮޅުގައި އެއޮތީ ކޮން އެއްޗެއްހޭ ސަމާ އެހުމާއި އެކު ހުރިހާ ކުދިންގެ ސަކަރާތްވެސް ހުއްޓިއްޖެއެވެ. ޒިޔާދު ޑިންގީގެ ދުވެލި މަޑުކޮށްލުމުން އެންމެވެސް ފަރުވާތެރިކަމާއިއެކު އެއީ ކޮންއެއްޗެއްތޯ ބަލަން ފެށިއެވެ. އެކަކު ބުނީ އެއީ ވެލައެއް ކަމަށެވެ. އަނެއްކުއްޖަކު ބުނީ ކިނބުލެއް ކަމަށެވެ. އެއީ ސީލް އެކޭ ބުނެފައި ބާރަށް ހޭން ފެށީ އެންމެ ކުޑަޔަށް ހުރި ކޮއްކޮއެވެ.

ފިނޮޅުގެ ފަސްގަނޑަށް ޑިންގީ ބީއްސާލި އިރުވެސް އޭތި އޮތީ ހަމަ އެތަނުގައެވެ. ޑިންގީ ފަސްގަނޑުގައި ބީހުމާއި އެކު ޒިޔާދު ބަހައްޓާފައި ދެންތިބި އެންމެން ފުންމާލައިގެން އެދިމާއަށް ހިނގައްޖެއެވެ. ޑިންގީގެ ނަގިލި އަޅާފައި ޒިޔާދު އެނބުރިލި އިރު އެ އެތި އޮތްތަނާއި ހަމައަށް އެކުދިން ގޮސްފައި، ދޮންބޭ ހަމަ އަސްލުވެސް މީ ސީލްއެކޭ ކިޔާފައި ކުދިވެރިން ގޮވަން ފަށައިފިއެވެ.

ޒިޔާދަށް އެހިސާބަށް ދެވުނު އިރު ސީލް މޫދަށް ފައި ބަނީއެވެ. އޭގެ ފިޔަފަތުން އުކައިގަތް ލޮނުގަނޑު އައިސް ޖެހުނީ ޒިޔާދުގެ މޫނުގައެވެ.

ހުރިހާ ކުދިންނާއި އެކު ސަމާ އާއި ޒިޔާދު ދެން އަވަސްވެ ގަތީ ހުހާ ކުދިން ގޮވައިގެން ހެނދުނުގެ ނާސްތާ ކުރާށެވެ. ރަށުން ގެނައި ކާބޯތަކެތި ކުނަލެއް މަތީގައި އަތުރާފައި އެންމެންވެގެން ސައިބޯން ތިއްބެ ދެއްކި ވާހަކައިގެ ތެރެއިން، އެއްކުޖަކު ރޭގައި އޭނާއަށް ފެނުނު ހުވަފެނެއްގެ ވާހަކަ ބުނުމުން އެންމެންވެސް އެމީހަކަށް ފެނުނު ހުވަފެނެއްގެ ވާހަކަ ފަށައިފިއެވެ. އެއްކުއްޖަކު ބުނީ އޭނާއަށް ހުވަފެނުން ފެނުނީ ސުވަރުގޭގެ ފެންގަނޑެއްގައި ފަތާތީ ކަމަށެވެ. އަނެއް ކުއްޖަކު ބުނީ އޭނާއަށް ހުވަފެނުން ފެނުނީ، ގޮނޑު ދޮށުގައި މަސްބާނަން ހުއްޓައި ކަމަށެވެ. ދޮންބެ ދައްތައަށް ފެނުނީ ބޯޓަކުން ފުންމާލައިގެން ކަނޑުގައި ފަތާތީއެވެ. ދޮންބެ ދައްތައަށް ފަތަން ހުވަފެނެއްގައިވެސް ފަތަން އެނގިއްޖެނޫންހޭ ބުނެފައި ކޮއްކޮމެން ފެށީ ހޭށެވެ.

އެމީހުންގެ ވާހަކަތަކުން ޒިޔާދަށް ހަނދާންވީ އޭނާއަށް ރޭ ފެނުނު ހުވަފެނެވެ. ސާފް ބޯޑެއް ހިފައިގެން ރާޅާ އަޅަން އުޅެނިކޮށް އޭނާއަށް ފެނުނު ހުވަފެނުގައި ވީގޮތް މާ ރަނގަޅަށް ހަނދާން ނެތަސް ވަރަށް ބޮޑު ބިޔަރާޅެއް އޭނާއަށް ފެނުނުކަން ހަނދާންވެއްޖެއެވެ. އެރާޅުގެ ތެރޭގައި އޭނާ ގެނބުނީއެވެ.

ޒިޔާދު ވިސްނާލިއެވެ. ހުރިހާ އެންމެންނަށްވެސް ފެނުނީ ފެނެވެ. ނުވަތަ މޫދެވެ. މިވާން އުޅެނީ ކީއްބާވައެވެ. ޒިޔާދުގެ ނުތަނަވަސްކަން އިތުރުވިއެވެ. ކަންބޮޑުވިއެވެ. އެކަމަކު އޭނާ ހިތްހަމަ ޖައްސާލީ އެއީ ހުވަފެނަކީ ބިލާހެއް ކަމުގައި ބުނެ އުޅޭތީއެވެ. އަދި އޭނާއަށް ހުވަފެނުގައި ފެނުނު ކަމެއް ދުވަހަކުވެސް ދިމާވެފައި ނުވާތީއެވެ.

ސައިބޮއެގެން ހުރިހާ ކުދިންނާއި އެކު ސަމާ އާއި ޒިޔާދުވެސް ތިބީ ބީޗު ވޮލީ ކުޅޭށެވެ. އޭރު ނުވައެއް ޖަހައި ބޮޑު ވެއްޖެއެވެ. ޒިޔާދަށް ތަންކޮޅެއް ބާރަށް ޖެހުނު ބޯޅައެއް ދިޔައީ މޫދާއި ދިމާއަށެވެ. ބޯލައިގެ ފަހަތުން ދިޔައީ އެންމެ ކުޑަކޮއްކޮއެވެ. ފިނޮޅުގެ ގޮނޑުދޮށަށް ފައިބާފައި ދޮންބޭ އޭ  މަސްތައް މިއޮއްމަރުވަނީއޭ ކިޔާފައި އަޑުގެ ކޮޅަށް ހަޅޭލަވައިގަތީ އޭނާއެވެ. ޒިޔާދަށްވެސް ތަފާތެއް ފާހަގަކުރެވުނީ އެހިސާބުންނެވެ. މުޅި ފަޅުތެރޭގައި އެންމެ ލޮނުފެންތިކެއް ނެތި އޮތީ ހިކިފައެވެ. ކައިރީގަޔާއި ދުރުގައި ހކިފައިވާ ފަޅުތެރޭގައި އެތައް ސަތޭކަ މަހެއް މަރަށް ތެޅެނީއެވެ.

ޖީބުގައި އޮތް ފޯނު ނަގާފައި ޒިޔާދު ގުޅާލީ ބައްޕައަށެވެ. ކުއްލިއަކަށް ލޮނުގަނޑުހިނދި ފަޅުތެރެ މުޅިން ހިކިއްޖެކަމަށާއި މިއީ ކިހިނެއްވާކަމެއްތޯ އޮޅުން ފިލުވުމަށެވެ. ބައްޕައަށްވެސް ދޭނެ ޖަވާބެއް ނޭނގުނެވެ. އެކަމަކު ބައްޕަގެ ވިސްނުމާއި ތަޖުރިބާގެ އަލީގައި އެންގީ އަވަހަށް ހުރިހާ ކުދިން ގޮވައިގެން ޑިންގީއަށް އެރުމަށެވެ.

ޒިޔާދު ހުރިހާ ކުދިންނަށް ގޮވައި އެއްކޮށްގެން އަވަހަށް ޑިންގީ ކައިރިއަށް ދިޔައިރު ޑިންގީވެސް އޮތީ ހިކިފައިވާ ފަޅުތެރޭގައި ފަސްގަނޑުމަތީގައި އަރިވެފައެވެ. ހުރިހާކުދިން ގޮވައިގެން ޒިޔާދަށް ޑިންގީއާއި ހަމައަށް ދެވުނު އިރު، އޭނާއަށް ފެނުނީ އިރުމަތި ފަރާތުން ފަޅުތެރެއިން ތިރިތިރިން ފޮނުޖަހާފައި އަންނަ ރާޅަކާއި އެކު ދިޔަވަރު ފޫދެމުންދާތީއެވެ. އެމީހުންނާއި ހަމައަށް ލޮނުގަނޑު އައުމާއިއެކު ޑިންގީ ފުންވުމުން ހުރިހާ ކުދިން އަވަހަށް ޑިންގީއަށް އެރުވިއެވެ. ނަގިލި ނެގޭތޯ ވަލަށް ދަމަނިކޮށް ދޮންބޭއޭ ބަލާ ބަލާށޭ ކިޔާފައި ކުދިވެރިން ރޮއެގަތުމުން ޒިޔާދަށް އިރުމަތި ފަރާތް ބަލާލެވުނު އިރު، މުޅި އުދަރެސް ބައްދައި ނަގާފައިވާ ބިޔަ ރާޅެއް ފުއްޓަރުގެ ތޮށިމައްޗަށް މުގުރާލަނީއެވެ.  އެރާޅުގެ އުސް މިނުގައި ގައިމުވެސް ވިއްސަކަށް ތިރީހަކަށް ފޫޓު ހުންނާނެއެވެ. ރާޅާއި އެކު ދެމިގެން އައި ވަރުގަދަ އޮއެގަނޑުގެ ތެރޭގައި ނަގިލި ނުނެގިގެން އުޅެނިކޮށް ވަލަށް ވާންޖެހި ޑިންގީ ދިޔައީ ބަންޑުން ވެގެންނެވެ. ރާޅުގެ ގަދަފަދަ އަޑުފަށްގަނޑުގެ ތެރޭގައި ކުދިންނާއި ސަމާގެ ރުއިމާއި ހަޅޭކުގެ އަޑު ޒިޔާދަށް އިވުނެވެ. އެއަޑުތައް ބޫންވެ މާދުރުން އިވޭ އަޑެއްގެ ގޮތުގައި ވެގެން ދިޔައިރު ޒިޔާދުގެ ހޭހުސްވަމުން ދިޔައެވެ.

ރާޅުގަނޑު މައިތިރިވުމުން މީހުން ހޯދަން ނުކުން މީހުން އެފިނޮޅަށްވެސް އައެވެ. ޒިޔާދުގެ ބައްޕަ އާއި ބޮޑު ބޭބެ މެންނަށް ފެނުނީ ގާތަކުގެ ތެރޭގައި ތާށިވެފައި އޮތް ޑިންގީގެ ނަގިލީގެ ވައު ފައިގައި އޮޅި ހޭހުސްވެފައި އޮތް ޒިޔާދެވެ. ބަންޑުން އޮތް ޑިންގީއެވެ. ސަމާ އާއި އެހެން ހުރިހާ ކުދިން ގެއްލުނީއެވެ.

ޒިޔާދުގެ އުމުރުގައި ތަން ހުރީމާ ކަންނޭނގެއެވެ. ދޮޅުގަޑިއިރު ފަހުން ފެނުނު އިރުވެސް ޒިޔާދުގެ ވިންދުން ހުއްޓެވެ. ރަށަށް ގެނައި މަގުމަތީގައި ސީޕިއާރް ދިނުމުން އޭނާ ނޭވާލާން ފެށިއެވެ. އެކަމަކު މާލެ ގެނެސް އައިޖީއެމްއެޗުގެ އައިސީޔޫގައި އެޑްމިޓްކޮށްފައި އޮންނަތާ ހަފްތާއެއްވި އިރުވެސް އެނާގެ ހެއެއް ނާރައެވެ.

އާއިލާގެ އެންމެން އަބަދުމެ ކަހަލަގޮތަކަށް ތިބެނީ އައިސީޔޫގެ ބޭރުގައެވެ. ޒިޔާދު ހޭ އަރާނެ އިރެއްގެ އިންތިޒާރުގައެވެ. އަނެއް ހަކުދިންނާއި ސަމާއަށް ވީގޮތެއް ޒިޔާދު ބުނެދޭނެ އިރެއްގެ އިންތިޒާރުގައެވެ. އެކަމަކު ހަފްތާއެއްވީ އިރުވެސް އެއިން އެއްވެސް ކުއްޖެއްގެ ޚަބަރެއް ނެތުމާއި އެކު އެއިން އެއްވެސް ކުއްޖަކު މިހާރު ދުނިޔޭގައި ހުރެދާނެ ކަމުގެ އުއްމީދެއް ނެތެވެ.

ދުވަސްތައް ގުނެމުން ދިޔައީ، ޒިޔާދުގެ ހާލަތަށް ބަދަލެއް ނައިސް ހަމައެ ގޮތުގައެވެ. ޑޮކްޓަރުންނަށް ޒިޔާދުގެ ހާ ލަތާއި މެދު ދެވެނީ ހަމަ އެއްޖަވާބެކެވެ. މިނަވްރުފުޅުގައި ވާނަމަ އަލުން ހޭއަރައިފާނެއެވެ. ނުވަތަ މަރުވެދާނެއެވެ. ޒިޔާދުގެ އޮތީ ކޯމާއެއްގައެވެ. ކޯމާއިން އޭނާ ތެދުވާނެ އިރެއް ކަނޑައަޅައި ބުނާކަށް އެއްވެސް މީހަކަށް ނޭނގެއެވެ.

– ނިމުނީ –