ބޮލީވުޑްގެ މަޝްހޫރު އެކްޓަރ އަނުޝްކާ ޝަރްމާ ވިހެއުމަށް އޮސްޓްރޭލިއާއަށް އައުމަށް އޮސްޓްރޭލިއާގެ ކުރީގެ މަޝްހޫރު ކްރިކެޓް ކުޅުންތެރިޔާ ބްރެޓް ލީ ދައުވަތުދީފި އެވެ.
އިންޑިއާގެ ނޫހަކަށް ބްރެޓް ލީ ދިން އިންޓަރވިއުއެއްގައި، އަނުޝްކާ އާއި އޭނާގެ ފިރިމީހާ އަދި އިންޑިއާ ކްރިކެޓް ޓިމުގެ ކެޕްޓަން ވިރާޓް ކޯލީ އަށް އޭނާ ވަނީ އެ ދެމީހުންގެ ފުރަތަމަ ދަރިފުޅު ވިހެއުމަށް އޮސްޓްރޭލިއާ އަށް އައުމަށް ދަޢުވަތު ދީފައެވެ. އޭނާ ބުނީ އޮސްޓްރޭލިއާގެ ހުރިހާ ރައްޔިތުންވެސް އެ ދެމަފިރިންނާއި އެމީހުންގެ އަލަތު ދަރިފުޅަށް ހެޔޮހިތުން މަރުހަބާ ކިޔާނެ ކަމަށެވެ. އަދި އެއީ އަންހެން ކުއްޖެއް ނުވަތަ ފިރިހެން ކުއްޖަކަށް ވީނަމަވެސް މެ، ކަމަށް ބްރެޓް ލީ ވަނީ ބުނެފައެވެ.
އޭރު ދުނިޔޭގެ އެންމެ ބާރު އުކުންތެރިންގެ ތެރޭގައި ހިމެނުނު ބްރެޓް ލީ މިހެން ބުނެފައި މިވަނީ، މިހާރު އޮސްޓްރޭލިއާގައި ކުރިއަށްދާ ދެ ގައުމުގެ ޓެސްޓް މެޗްތަކެއްގައި ކުޅުމަށް އޮސްޓްރޭލިއާގައި މިވަގުތު ހުރި ވިރާޓް، އެއް މެޗް ކުޅުމަށްފަހު އަނބުރާ އިންޑިއާއަށް އައުމަށް ނިންމާފައިވާތީ އެކަމާގުޅޭގޮތުން ވާހަކަ ދައްކަމުންނެވެ.
View this post on Instagram
ވިރާޓް ނިންމާފައި ވަނީ މި މަހުގެ 21 ވަނަ ދުވަހު ނިމޭ ފުރަތަމަ ޓެސްޓް މެޗް ނިންމުމަށްފަހު އަނބުރާ އަންހެނުން އަނުޝްކާ ކައިރިއަށް އިންޑިއާއަށް ދިއުމަށެވެ. އެއީ އަންނަ މަހު ވިހަން ތައްޔާރުވެފައިވާ އަނުޝްކާއާއި އެކު ވަގުތު ހޭދަކުރަން އޭނާ ބޭނުން ވާތީ ކަމަށް ވިރާޓް ބުނެއެވެ.
މިއަހަރުގެ އޯގަސްޓް މަސްތެރޭގައި މިދެމަފިރިނަށް ދަރިއަކު ލިބެން އުޅޭކަން އިންސްޓަގްރާމް މެދުވެރިކޮށް ފޭނުންނާ ހިއްސާ ކުރަމުން ކޮށްފައިވާ ޕޯސްޓުގައި ބުނެފައިވަނީ ޖެނުއަރީ 2021ގައި އެ ދެމަފިރިން ތިންމީހުނަށް ވާނެކަމަށެވެ. އަދި އެ ޕޯސްޓަށްފަހު އަނުޝްކާ " މާބަނޑު" ފެންނަ އެތައް ފޮޓޯއެއް ސޯޝަލް މީޑިއާގައި ވަނީ ހިއްސާކޮށްފައެވެ. މީގެތެރެއިން އެންމެ ފާހަގަ ކޮށްލެވޭ ފޮޓޯ އަކީ މާބަނޑާއެކު އެކޮޅުކޮޅުން އޮވެ ވިރާޓްގެ އެހީގައި އަނުޝްކާ ޔޯގާ ޕޯސް އެއް ޖައްސާ ފޮޓޯއެވެ.
View this post on Instagram
އަނުޝްކާ އެންމެ ފަހުން ފެނިގެންދިޔައީ ޝާހްރުކް ޚާނާއެކު ފިލްމު "ޒީރޯ" އިންނެވެ. އޭގެ ފަހުން ފިލްމީ އެއްވެސް މަސައްކަތެއް މިވަގުތު އޭނާ ނުކުރި ނަމަވެސް ވިހެއުމަށްފަހު ވީއެންމެ އަވަހަށް މަސައްކަތަށް ނުކުންނަން އޭނާ ބޭނުންވާކަމަށް މީގެ ކުރިން ވަނީ ބުނެފައެވެ. އެގޮތުން ޖެނުއަރީ މަހު ވިހެއުމަށްފަހު މޭމަހުގެ ތެރޭ ފިލްމީ މަސައްކަތްތަކަށް ނުކުންނަން އަނުޝްކާ ވަނީ ނިންމާފައެވެ.
