މާލޭގެ ގެސްޓްހައުސްއަކުން ފޭރެން އެހީތެރިވި ޓެކްސީ ޑްރައިވަރެއްގެ ބަންދަށް ކްރިމިނަލް ކޯޓުން 30 ދުވަސް ޖަހައިފިއެވެ.
މި މައްސަލައިގައި ހައްޔަރު ކުރީ އުމުރުން 36 އަހަރުގެ ފިރިހެނެކެވެ.
ކްރިމިނަލް ކޯޓުގެ އަމުރުގައި ބުނެފައިވަނީ ފޭރުމުގެ ކުށް ކުރިކަމަށް ތުހުމަތުކުރެވޭ މިންވަރުގެ ހެކި ގަރީނާ ފުލުހުން ހުށަހަޅާފައިވާ ކަމަށެވެ. އެގޮތުން ސިސީޓީވީ ފޫޓޭޖް ހުށަހެޅިކަން ފާހަގަކޮށްފައިވެއެވެ. ސީސީޓީވީ ފޫޓޭޖުން އެމީހާ ދުއްވަން އިން ޓެކްސީ މަޑުކުރުމުން ދެ މީހަކު ޓެކްސީން ނުކުމެގެން ގޮސް ގެސްޓްހައުސްއަށް ވަންނަ މަންޒަރު ފެންނަ ކަމަށް ކޯޓު އަމުރުގައިވެއެވެ. ކާރުން ނުކުތް މީހުން ދިޔައީ ކާރުގެ ދޮރު ނުލައްޕައި ކަމަށާއި، އެ މީހުން ގެސްޓްހައުސް ކައުންޓަރުން އެއްޗެހިތަކެއް ނަގައިގެން ދުވެފައި އައިސް އަލުން ކާރަށް އަރައިގެން ގޮސްފައިވާ ކަން ސީސީޓީވީ ފޫޓޭޖުން ފެންނަ ކަމުގައި ކޯޓު އަމުރުގައިވެއެވެ.
ޑްރައިވަރު ކޯޓުގައި ބުނެފައި ވަނީ، އޭނާ އަކީ ޓެކްސީ ކުރާ މީހެއް ކަމަށާއި އެއީ ބަޔަކު ބުނެގެން ކުރި ޓެކްސީ ދަތުރެއް ކަމަށެވެ. އަދި އަމަލީ ގޮތުން އެ ފޭރުމުގައި ބައިވެރިނުވާ ކަމަށް ބުނެފައިވެއެވެ.
ފުލުހުން ބުނެފައިވާ ގޮތުގައި ފޭރުމުގެ ހާދިސާ ހިނގި އިރު ޓެކްސީގެ ނަންބަރު ބޯޑު ނުފެންނަ ގޮތަށް ހުރީ އެއްޗެއް ހަރުކޮށްފައެވެ. އަދި ފަހުން އެހެން ސަރަހައްދަކަށް ގޮސް އޭތި ނައްޓާލާފައިވާ ކަމަށް އަމުރުގައިވެއެވެ.
