މިއަދު ހެނދުނު އިންޑިއާގެ ނޫސްތަކުގައި އެންމެ ވަރުގަދައަށް ފެތުރިގަތް ޚަބަރަކީ މީގެ ދޮޅު މަހެއްހާ ދުވަސްކުރިން ކައިވެނިކުރި އިންޑިއާގެ މަޝްހޫރު ލަވަކިޔުންތެރިޔާ ނޭހާ ކައްކަރު ބަލިވެއިންކަން ހާމަކުރި ޚަބަރެވެ.
މި ޚަބަރު ފެތުރިގެން އައީ ނޭހާގެ އިންސްޓަގްރާމަށް މިއަދު ހެނދުނު ދޫކޮށްލި ފޮޓޯގެ ސަބަބުން ނެވެ. މި ފޮޓޯގައި އޭނަގެ ބަނޑު ބޮޑުކަމަށް ދައްކައެވެ. އަދި ނޭހާ އާއި އޭނަގެ ފިރިމީހާ ރޯހަންޕްރީތު ސިންގް ނޭހާގެ ބަޑުގައި ހިފަހައްޓާލައިގެން ތިބެއެވެ. ފޮޓޯ ދޫކޮށްލަމުން އޭގައި ލިޔެލާފައި ވަނީ ހަމައެކަނި ހޭޝްޓެގެކެވެ. "ޚަޔާލް ރައްކާ ކަރް" މި ހޭޝްޓެގާއިއެކު ފަހުން ރޯހަންޕްރީތުގެ އިންސްޓަގްރާމްގައި ވެސް މި ފޮޓޯ ވަނީ ހިއްސާކޮށްފައެވެ.
View this post on Instagram
އިންޑިއާގެ ނޫސްތަކާ ހަވާލާދީ ރާއްޖޭގެ ގިނަ ނޫސްތަކުންވެސް މި ޚަބަރު ވަނީ ގެނެސްދީފައެވެ. އެހެންނަމަވެސް މިއަދުގެ ވަގުތެއްގައި މުމްބާއީ އެއަރޕޯޓުން ނޭހާގެ ދެމަފިރިން ފެންނަ ފޮޓޯތަކަކާއި ވީޑިއޯ އާންމު ވުމުން ނޭހާ މަންމަ އަކަށް ވާންއުޅޭކަމާމެދު މިވަނީ ސުވާލު އުފެދިފައެވެ.
މި ފޮޓޯތަކުން ފެންނައިރު، އިންސްޓަގަރާމް ފޮޓޯގައި ފެންނަވަރުގެ ބޮޑު ބަނޑެއް ނޭހާގެ ހުރިކަމަށް ފާހަގައެއް ނުކުރެވެއެވެ. ނަމަވެސް ހިނިތުންވުމާއެކު ފޮޓޯނަގާމީހުނާ ދިމާއަށް ދެމަފިރިން ހުއްޓިލައިގެން ތިބިއިރު ނޭހާގެ އަތުން ބަނޑު ކޮންމެވެސް ވަރަކަށް ފޮރުވަން މަސައްކަތް ކުރާކަން ފާހަގަވެއެވެ.
މި ފޮޓޯތަކާއެކު ދެން، ގިނަ މީހުންގެ އުފެދުނު ސުވާލަކީ ހަގީގަތުގައިވެސް ނޭހާ ބަލިވެއިނީތޯ ނުވަތަ ޕްރޮމޯޝަނަލް މާކެޓިންގ ސްޓަންޓެއްތޯ އެވެ. ގިނަމީހުނަށް ގަބޫލު ކުރެވުނީ އެއީ އެދެމީހުންގެ ކުރިއަށް އޮތް ލަވައެއްގެ ޕްރޮމޯޝަނަލް ޕޯސްޓެއްގެ ގޮތުގައެވެ. އަދި ލަވައިގެ ނަމަކީ "ޚަޔާލް ރައްކާ ކަރް" ކަމަށްވެސް ބައެއް މީޑިއާތަކުން އަނަނީ ބުނަމުންނެވެ.
އެހެން ނަމަވެސް ނޭހާ ބަލިވެއިންހެން ހީވާގޮތަށް އިންސްޓަގްރާމަށް ލީ ފޮޓޯއަށް ގިނަ ސަޕޯޓަރުންނާއި، ފަންނާނުންގެ އިތުރުން އެ ދެމީހުންގެ ގާތް މީހުންވެސް ގެންދާނީ މަރުހަބާގެ އެކި ޝުޢޫރުތަކާއެކު ކޮމެންޓް ކުރަމުންނެވެ. އޭގެ ތެރޭގައި ނެހާގެ ބޭބެ ޓޯނީ ކައްކަރު ވެސް ވަނީ " ބޮޑުބޭބެއަކަށް ވާން އުޅެނީ" ކަމަށް ބުނެ ކޮމެންޓްކޮށްފައެވެ.
View this post on Instagram
މި ވާހަކަތަކާއެކު ބައެއް މީހުނަށް މިކަން ވަރަށް މަޖާކަމަކަށްވެ، 24 އޮކްޓޯބަރުގައި ކައިވެނިކުރި ނޭހާ މިހާ އަވަހަށް ބަޑުބޮޑު ވުމުން އެކަމަށް "މީމް" ތައް ހަދައިގެން ދައުރުކުރަންވެސް ވަނީ ފަށާފައެވެ. އެހެންކަމުން ނޭހާ ބަލިވެއިނީތޯ ނުވަތަ ނޫންތޯ އަދި މިއީ ޖަވާބު ނުލިބި އޮތް ސުވާލެކެވެ.
