ރާއްޖޭގެ އިގްތިސާދުގައި ބުންވަރު ޖެހޭ މިންވަރަކުން މި ފަސް އަހަރުގެ ތެރޭގައި ހުރިހާ ދާއިރާއެއްގެ ވެސް މުސާރަ ބޮޑުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސްގެ ޖަވާބު" ޕްރޮގްރާމްގެ މިއަދުގެ ސެގްމަންޓުގައި ފުވައްމުލައް ސިޓީ، ނިއުވެލީ، އަލީ ޝަފީއު ކުރި ސުވާލުގައި ވަނީ ފުލުހުންގެ މުސާރަ ބޮޑުކޮށްފައި އެހެނިހެން މުއައްސަސާތަކުގެ މުސާރަ ބޮޑުކުރާނީ ކޮންއިރަކުތޯ ސުވާލުކޮށްފައެވެ.
އެ ސުވާލުގެ ޖަވާބުގައި ރައީސް ވިދާޅުވީ ގައުމުގެ އިގްތިސާދު ހަރުދަނާވެ، އިގްތިސާދުގައި ބުންވަރު ޖެހޭ މިންވަރަކުންނާއި އާމްދަނީ ލިބޭ މިންވަރަކުން ހުރިހާ ދާއިރާއެއްގެ މުވައްޒަފުންގެ މުސާރަ ބޮޑުކޮށް ދިނުމަށް ވައުދުވެވަޑައިގެންފައިވާނެ ކަމަށެވެ. އެގޮތުގެ މަތިން ބައެއް ދާއިރާތަކުގެ މުސާރަ ބޮޑު ކުރެވިފައިވާ ކަމަށް ރައީސް ވިދާޅުވިއެވެ.
"މިހާރު އެވަނީ ބައެއް ދާއިރާތަކުގެ މުސާރަ ބޮޑުކުރެވިފައި، ޕޭ ހާމަނައިޒް ކުރެވިފައި، ފުލުހުންނާއި ސިފައިންގެ ވެސް އަދި އެހެން ދާއިރާތަކުގައި ވެސް" ރައީސް ވިދާޅުވިއެވެ.
ކުރިއަށް އޮތްތަނުގައި އެގޮތަށް ކުރިއަށްގެންދަވާނެ ކަމަށާއި އިގްތިސާދު ހަރުދަނާވާ މިންވަރަކުން އެކަންކަން ކުރުމަކީ ވައުދެއްކަމުގައިވާއިރު އެ ވައުދު ފުއްދަވާނެ ކަމަށް ވެސް އެމަނިކުފާނު ވިދާޅުވިއެވެ.
ފުލުހުންގެ މުސާރަ މި މަހުންގެ ފެށިގެން 35 އިންސައްތައަށް ސަރުކާރުން ވަނީ ބޮޑުކޮށްފައެވެ. އާ މުސާރައިގެ އޮނިގަނޑުގައި ހިމެނެނީ ބޭސިކް ސެލެރީގެ އިތުރުން، މަގާމުގެ އެލަވަންސް، ޖޮބް އެލަވަންސް އަދި ކުރާ މަސައްކަތާއި ގުޅޭގޮތުން އެލަވަންސެކެވެ.
ފުލުހުންނާއި ސިފައިންގެ މުސާރަ ބޮޑު ކުރާނެކަން ރައީސް ޑރ. މުހައްމަދު މުއިއްޒުވެސް ވަނީ އިންތިހާބު ތެރޭގައި ވައުދުވެވަޑައިގެންފައެވެ. އެގޮތުން އެމަނިކުފާނު ވިދާޅުވީ ފުލުހުންނާއި ސިފައިންގެ މުސާރަ ދެ ގުނައަށް ބޮޑު ކުރާނީ ފަސް އަހަރުގެ ދައުރަށް ބަހާލައިގެން ކަމަށެވެ.
