ތައިލެންޑާއި ޔުނައިޓެޑް އަރަބް އެމިރޭޓްސް (ޔޫއޭއީ) އަށް އާސަންދަ ސްކީމްގެ ދަށުން ބަލި މީހުން ފޮނުވުމުގެ މަސައްކަތް މި އަހަރުގެ ތެރޭގައި ފެށިގެންދާނެ ކަމުގެ އުންމީދު އެބައޮތް ކަމުގައި ރައީސް ޑރ. މުހައްމަދު މުއިއްޒު، ދައުލަތުގެ މީޑިއާ، ޕީއެސްއެމްގައި ވިދާޅުވެއްޖެއެވެ.
ޕީއެސްއެމް އަށް ދެއްވި ހާއްސަ އިންޓަވިއުއެއްގައި ރައީސް ޑރ. މުއިއްޒު ވިދާޅުވީ ޔޫއޭއީ އާއި ތައިލެންޑްގައި އާސަންދަގެ ހިދުމަތް ފެށުމަށްޓަކައި ކަމާބެހޭ ފަރާތްތަކާ އެކުގައި މަޝްވަރާ ކުރަމުންދާ ކަމަށެވެ. އަދި ނިންމަން ޖެހޭ ކަންކަން ނިންމުމުގެ މަސައްކަތް ކުރަމުންދާ އިރު، އުންމީދަކީ މި އަހަރުގެ ތެރޭގައި ދެ ގައުމުގައި ވެސް އާސަންދަ ހިދުމަތް ހަމަޖެހި، ބަލި މީހުން ފޮނުވުމުގެ އިންތިޒާމު ހަމަޖެހުން ކަމުގައި ރައީސް ޑރ. މުއިއްޒު ވިދާޅުވިއެވެ.
ޔޫއޭއީ އާއި ތައިލެންޑަށް އާސަންދަ ސްކީމްގެ ދަށުން ބަލި މީހުން ފޮނުވަން ނިންމެވި ކަން ރައީސް ޑރ. މުއިއްޒު އިއުލާން ކުރެއްވީ ޗައިނާއަށް ކުރެއްވި ރަސްމީ ދަތުރުފުޅަށްފަހު، ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި ބޭއްވި ނޫސްވެރިންގެ ބައްދަލުވުމުގައެވެ. އެމަނިކުފާނު ވިދާޅުވީ އާސްނަދައިގެ ދަށުން މިހާރު ބޭސްފަރުވާ ކުރެވެނީ މަދު ގައުމަކުން ކަމަށާއި އެކަން ބަދަލުކޮށް މި ހިދުމަތް ފުޅާކުރުމަށް ނިންމާފައިވާ ކަމަށެވެ.
އާސަންދަ ސްކީމްގެ ދަށުން ބޭސްފަރުވާއަށް ރާއްޖެއިން ބޭރަށް ބަލިމީހުން މިވަގުތު ފޮނުވަނީ އަވަށްޓެރި އިންޑިއާއަށާއި ސްރީލަންކާއަށެވެ.
ތައިލެންޑް އަދި ޔޫއޭއީ އަށް އަށްވެސް އާސަންދަ ސްކީމްގެ ދަށުން ބަލިމީހުން ފޮނުވަން ރައީސް މުއިއްޒު ނިންމަވާފައިވާތީ، އެކަމާ ގުޅިގެން ކުރަންޖެހޭ މަސައްކަތްތައް ކަމާ ގުޅުންހުރި އެހެން އިދާރާތަކާއިއެކު ކުރަމުންދާ ކަމަށް އާސަންދަ ކުންފުނިން ވެސް ވަނީ މީގެ ކުރިން ބުނެފައެވެ.
