އެމެރިކާގެ ނާއިބުރައީސް، މައިކް ޕެންސް، ލައިވްކޮށް ޓީވީގެ ކުރިމަތީގައި ކޯވިޑް19 ވެކްސިން ޖައްސަވައިފިއެވެ. ވެކްސިން ޖެހުމަށްފަހު، ޕެންސް ވިދާޅުވީ، "ކަމެއް ވިހެންވެސް ހީ ނުވާ" ކަމުގައެވެ.
ވައިޓް ހައުސްއިން ބުނެފައިވަނީ، ނާއިބު ރައީސް ލައިވްކޮށް ކެމެރާ ކުރިމަތީގައި ވެކްސިން ޖެއްސެވީ "އެމެރިކާގައި ވެކްސިން ޕްރޮމޯޓު ކޮށްދީ، އަދި ވެކްސިން ޖެހުމަށް ހިތްވަރުދީ، ވެކްސިނަކީ ރައްކާތެރި އެއްޗެއްކަން އެމެރިކާގެ ރައްޔިތުންނަށް ޔަގީން ކޮށްދިނުން" ކަމުގައެވެ.
ވައިޓް ހައުސްއިން ވަގުތުން ދުރަށް ދެއްކި މި އިވެންޓުގައި، ޕެންސްގެ އަބިކަބަލުންނާއި އަދި ސާޖަން ޖެނެރަލް ޖެރޮމް އެޑަމްވެސް ވަނީ، ވެކްސިން ޖައްސަވާފައެވެ.
ފާއިތުވެދިޔަ ހަފްތާގެ ހޯމަ ދުވަހު އެމެރިކާގައި ވަނީ ފައިޒާ-ބައޯއެންޓެކް ވެކްސިން އާންމުކޮށް ދޭން ފަށާފައެވެ.
އެމެރިކާގައި ބޭނުންކުރުމުގެ ހުއްދަ އެންމެ ފުރަތަމައަށް ދިން މިވެކްސިންއަކީ، ކޯވިޑް19އިން %95 ރައްކާތެރިކަން ފޯރުކޮށްދޭ ވެކްސިނެކެވެ.
އެމެރިކާގެ ސަރުކާރުން މިހާރު ގެންދަނީ، އެގައުމުގެ 50 ސްޓޭޓަށް ފުރަތަމަ 5 މިލިއަންގެ ޝިޕްމަންޓް ފޯރު ކޮށްދެމުންނެވެ.
އެމެރިކާގެ ފުޑް އެންޑް ޑްރަގް އޮތޯރިޓީގެ ވެކްސިން އެކްސްޕާޓުންގެ ޓީމުން، މޮޑާނާ ކުންފުނިންގ އުފެއްދި ކޯވިޑް19 ވެކްސިނަށްވެސް މިހާރު ފެހި ސިގްނަލް ދީފައިވުމާއެކު، ދެވަނަ ވެކްސިނެއްވެސް، އެމެރިކާގައި ބޭނުންކުރުމުގެ ހުއްދަ މިހާރުވަނީ ލިބުމުގެ މަގުމަތީގައެވެ.
އެމެރިކާގެ ސަރުކާރުން ކުރިން ބުނެފައިވަނީ، އެފްޑީއޭއިން ހުއްދަ ދޫކުރުމާއެކު، އެންމެ ފުރަތަމަވެސް، ވެކްސިންގެ 2.9 މިލިއަން ޑޯޒް ދޫކުރެވެނޭއެވެ. މިއީ ވެކްސިން ބޭނުން ކުރުމުގެ ހުއްދަ ލިބޭ ހަފްތާގައި ފައިޒާ/ބައޯއެންޓެކްއިން ތައްޔާރު ކުރުމަށް ހަމަޖެހިފައިވާ އަދަދުގެ %50އެވެ. އަނެއް %50 ރައްކާ ކުރެވޭނީ، ފުރަތަމަ ވެކްސިން ދޭ މީނުންނަށް 3 ހަފްތާފަހުން ދޭންޖެހޭ ދެވަނަ ޑޯޒް އެއްވެސް ދަތިކަމަކާ ނުލާ ދެވޭނެކަން ޔަގީން ކުރުމަށްޓަކައެވެ.
ފައިޒާއިން ބުނެފައިވަނީ، އެކުންފުނިން އީޖާދު ކޮށްފައިވާ ވެކްސިނަކީ %95 ރައްކާތެރި ވެކްސިނެއް ކަމުގައެވެ. އަދި، ތަހުލީލުތަކުން ދައްކާފައިވާ ގޮތުގައި، ވެކްސިންގެ ފުރަތަމަ ޑޯޒަށްފަހުވެސް، ވެކްސިން ޖަހާ މީހުން %85 ކޯވިޑް19 އިން ރައްކާތެރި ކޮށްދެއެވެ.
އެހެންނަމަވެސް، ތަފާތު ބޭސްތަކަށާއި އަދި، ވެކްސިންތަކަށް އެލާޖިކްވާ ފަރާތްތަކަށް ކޯވިޑް19 ވެކްސިން ދިނުން ރައްކާތެރި ނޫންކަމުގެ އިންޒާރު އިގިރޭސިވިލާތުން ވަނީ މިހަފްތާގައި ދީފިއެވެ.
އިގިރޭސިވިލާތުގެ ނޭޝަނަލް ހެލްތު އޭޖެންސީން މިއިންޒާރު ދީފައިވަނީ، އިގިރޭސިވިލާތުގައި މިވެކްސިން އެންމެ ފުރަތަމައަށް ދިން މީހުންގެ ތެރޭގައި ހިމެނޭ ދެމީހެއްގެ ކިބައިން ފެންނަން ނުޖެހޭ ބާވަރުގެ ސީރިއަސް އަލާމާތަތްކެއް ފެނުމާއި ގުޅިގެންނެވެ.
އެއޭޖެންސީން ނެރުނު ބަޔާނެއްގައި ބުނެފައިވަނީ، ކޯވިޑް19 ވެކްސިން ދީގެން، އެގައުމުގެ ދެ ސިއްޙީއެހީތެރިއަކަށް އުދަގޫތަކެއް ކުރިމަތިވެފައިވާ ކަމަށާއި، އަދި މި ދެމީހުންނަކީވެސް، އެލާޖިކް ވުމުގެ ރިކޯޑް އޮތް ދެމީހުންކަމަށެވެ. އެހެންމަވެސް، ފަރުވާ ދިނުމަށްފަހު، މިހާރެ ދެމީހުންވެސް ރަގަޅުވެފައިވާ ކަމަށްވެސް މިބަޔާނުގައި ބުނެފައި ވެއެވެ.
އެމެރިކާގައި މިހާތަނަށް އައިއިރު، ކޯވިޑް19ގައި 310،000 މީހުން މަރުވެ، 17 މިލިއަން މީހުންނަށް ވަނީ މިބަލި ޖެހިފައެވެ. އެމެރިކާއަކީ މުޅި ދުނިޔޭގައިވެސް ކޯވިޑް19ގެ ހާލަތު އެންމެ ގޯސް ގައުމެވެ.
އުމުރުން 61 އަހަރުގެ ޕެންސްއަކީ، އެމެރިކާގެ ސަރުކާރުގެ އޮފިޝަލުންގެ ތެރެއިން، މިހާތަނަށް ވެކްސިން ޖެއްސެވި އެންމެ ސީނިއަރ ބޭފުޅާއެވެ.
