ރާއްޖޭގައި ތިބި އިންޑިއާގެ ސިފައިން ފޮނުވާލުމަށް ފަހު އިންޑިއާ އިން ހަދިޔާކޮށްފައިވާ ދެ ހެލިކޮޕްޓަރާއި ޑޯނިއާ މަތިންދާ ބޯޓު ދުއްވަން އިންޑިއާގެ މަދަނީ މީހުން ގެންނަނީ ދެ އަހަރު ދުވަހަށް ކަމަށާއި އެ ތަނުން ދެ ޕްލެޓްފޯމްގެ މީހުން އެއް އަހަރު ފަހުން ރާއްޖެ ދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
"ވަގުތަށް" ދެއްވި ހާއްސަ އިންޓަވިއުއެއްގައި ރައީސް މުއިއްޒު އިއްޔެ ވިދާޅުވީ އިންޑިއާ ސިފައިން ތިބެން ޕްލެޓްފޯމްތައް ގާއިމުކޮށްފައި ވަނީ ވެސް އިންޑިއާ ސަރުކާރާއި ރާއްޖޭގެ ސަރުކާރާ ދެމެދު ގާއިމު ކުރި އެއްބަސްވުމެއްގެ ދަށުން ކަމަށެވެ. ހަމައެއާ އެކީގައި ސިފައިން ތިބުމަކީ ރައްޔިތުންނާއި ސަރުކާރުން ވެސް ގަބޫލު ކުރާ ސިޔާސަތެއް ނޫން ކަމަށްވާތީ އެ ސިފައިންތައް ފޮނުވާލުމުގެ މަސައްކަތް ކުރިއަށްދާ ކަން އެމަނިކުފާނު ވަނީ ފާހަގަ ކުރައްވައިފައެވެ.
އިންޑިއާ ސިފައިން ފޮނުވާލުމަށް ފަހު، އެންމެ ރަނގަޅު ގޮތަކީ މި އުޅަނދުތައް ދިވެހިން އޮޕަރޭޓް ކުރަން ނަމަވެސް ޓެކްނިކަލީ މިކަން ކުރަން ވަގުތުތަކެއް ނަގާނެތީ ސިވިލިއަނުން ވަކި މުއްދަތެއް ވަންދެން ބައިތިއްބަން ދެ ގައުމުން އެއްބަސްވީ ކަމަށް ވެސް ރައީސް ވިދާޅުވިއެވެ.
ރާއްޖޭގައި ތިބި އިންޑިއާ ސިފައިން ފޮނުވާލުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އެމަނިކުފާނު ވެރިކަމަށް ވަޑައިގެންނެވި އިރުގައި ރާއްޖޭގެ ތިން ސަރަހައްދެއްގައި 89 އިންޑިއާ ސިފައިން ތިބި ކަމަށްވެއެވެ. އެއީ ހދ. ހަނިމާދޫ އާއި ލ. ކައްދޫ އާއި އައްޑޫ ސިޓީގައެވެ. އެ ތިން ޕްލެޓްފޯމްގެ ތެރެއިން އައްޑޫގެ ގަމުގައި ހެލިކޮޕްޓަރު ދުއްވަން ތިބި އިންޑިއާގެ ސިފައިން ވަނީ މި މަހު ރާއްޖެ ދޫކޮށް ގޮސްފައެވެ. އެމީހުންގެ ބަދަލުގައި މިހާރު ތިބީ މަދަނީ މީހުންނެވެ.
ރާއްޖެ އާއި އިންޑިއާ އިން އެއްބަސްވެފައި ވަނީ މި އަހަރުގެ މެއި 10 ގެ ކުރިން ހަނިމާދޫ އާއި ކައްދޫގައި ތިބި އިންޑިއާ ސިފައިން ފޮނުވާލުމަށް ފަހު އެ ތަންތަނަށް ވެސް މަދަނީ މީހުން ގެންނަން އެއްބަސްވެފައެވެ.
ރައީސް ޑރ. މުއިއްޒު ވިދާޅުވީ ދިވެހިން ޓްރެއިންކޮށްފައި ދިވެހިންނާ އުޅަނދުތައް ހަވާލު ކުރުމަކީ އެމަނިކުފާނު ބޭނުންވާ ގޮތް ކަމަށެވެ.
"ދިވެހިން ޓްރެއިންކޮށްފައި ދިވެހިންނާ ހަވާލު ކުރުމަކީ އަޅުގަނޑު އަބަދުވެސް ގަބޫލު ކުރާ ގޮތަކީ. އަދި އެގޮތަށް އިރާދަކުރެއްވިއްޔާ ހަމަޖެހިގެން ދާން ވާނެ ކަމަށް އަޅުގަނޑު ވާނީ ވަރަށް ފަހުން ފޮރިން މިނިސްޓަރާއި ކަމާބެހޭ ބޭފުޅުންނާ ވާހަކަ ދެއްކެވި އިރުގައި ވެސް ދަންނަވާފައި." ރައީސް ވިދާޅުވިއެވެ.
"އެބޭފުޅުން ވިދާޅުވި މިއީ ވަރަށް ޓެކްނިކަލް ހުނަރުތަކެއް ހުންނަން ޖެހޭ ކަމެއްވީމަ، ތިމަންނަމެންގެ މީހުން ވަގުތީ ގޮތުން ފޮނުވުން ފަސޭހަ ވާނެ ކަމަށް. އެހެންވީމަ އެގޮތުން މަދަނީ މީހުންނަށް ބަދަލު ކުރީ. އެގްރީމަންޓް ހެދިފައި އޮތީ. އެގްރީމަންޓޭ މި ދެންނެވީ ތިން ބައްދަލުވުން ބޭއްވި ލެޓާ އޮފް އެކްސްޗޭންޖްގައި ވަނީ ސޮއި ކުރެވިފައި،"
ރައީސް ފާހަގަ ކުރެއްވި ގޮތުގައި ތިން ޕްލެޓްފޯމްގެ ތެރެއިން ދެ ޕްލެޓްފޯމްގެ ސިވިލިއަނުން ރާއްޖޭގައި ތިބުމަށް ހަމަޖެހިފައި ވަނީ އެއް އަހަރު ދުވަހުގެ މުއްދަތަކަށް ކަމަށެވެ. އަދި އަނެއް ޕްލެޓްފޯމްގައި ތިބި ސިވިލިއަނުން ދެ އަހަރު ދުވަހު ތިބުމަށް ހަމަޖެހިފައިވާ ކަމަށް ވެސް ރައީސް ވިދާޅުވިއެވެ.
ރާއްޖެ އާއި އިންޑިއާއާ ދެމެދު ސޮއިކުރި ލެޓާ އޮފް އެކްސްޗޭންޖުގައިވާ ގޮތުން ކައްދޫ އާއި ގަމުގައި ތިބުމަށް ހަމަޖެހިފައިވާ މަދަނީ މީހުން އަންނަ އަހަރުގެ ފެބްރުއަރީ 15 ގެ ނިޔަލަށް ރާއްޖޭގައި ތިބޭނެއެވެ. އަދި ހަނިމާދޫގައި ތިބުމަށް ހަމަޖެހިފައިވާ މަދަނީ މީހުން ފެބްރުއަރީ 15، 2026 ގެ ނިޔަލަށް ރާއްޖޭގައި ތިބޭނެ އެވެ.
