ރައީސް މުއިއްޒު ދާދިފަހުން އުތުރުގެ ހަތަރު އަތޮޅުގެ ރަށްތަކަށް ކުރެއްވި ދަތުރުފުޅުގައި، އެއްފަހަރާ 50 ރަށެއްގެ ކައުންސިލް އިިމާރާތް އަޅަން ފަށާ ދެއްވާނެކަމަށް ވިދާޅުވީ ހދ. މަކުނުދޫ ރައްޔިތުންނާއި ބައްދަލުކުރައްވާ ވާހަކަ ދައްކަވަމުންނެވެ.

ރައީސް މުއިއްޒުގެ އަޅުއްވާދެއްވާނެކަމަށް ވައުދުވި 50 ކައުންސިލު އިދާރާ ކަނޑައެޅުމުގައި ބޭނުންކުރާނެ މިންގަނޑުތަކާއި މާރކްސް ދެވޭނެގޮތް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާކްސް އިން ވަނީ އާއްމުކޮށްފައެވެ.

ކައުންސިލްތައް ކަނޑައެޅުމުގައި މާކްސްދޭ ގޮތް

• ރަށުގެ އާބާދީ / 20 މާކްސް
• ކައުންސިލުންގެ ވަސީލަތް / 20 މާކްސް
• ޢިމާރާތުގެ ހާލަތު (އިމާރާތުގެ އައުބައުމިން)  / 20 މާކްސް
• ކައުންސިލަރުން މަސައްކަތް ކުރާނެ ޖާގަ / 10 މާކްސް
• މުވައްޒަފުން މަސައްކަތް ކުރާނެ ޖާގަ / 10 މާކްސް
• އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުންގެ ޖާގަ / 10 މާކްސް
• ކަންގަތި އެވޯޑް ލިބިފައިވުން / 10 މާކްސް

ސަރުކާރުން އަޅާދޭ ކައުންސިލްތައް ކަނޑައެޅުމުގައި އެންމެ އިސްކަމެއްގެ ގޮތުގައި އޮތީ ރަށުގެ އާބާދީގެ ނިސްބަތަށެވެ. އެހެންނަމަވެސް ކައުންސިލަށް ބޭނުންވާ ވަސީލަތްތަކާއި އާބާދީއަށް މާކްސް ދިނުމަށް ކަނޑައަޅާފައި ވާއިރު މިހާރު ހުރި އިމާރާތުގެ ހާލަތަށާއި ހުރި ވަސީލަތްތަކަށްވެސް ހަމަ އެވަރަށް މާކްސް ދޭގޮތަށް ކަނޑައަޅާފައި ވެއެވެ.

މުވައްޒަފުން މަސައްކަތް ކުރާނެ ޖާގައާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުންގެ ޖާގަ އަދި ކައުންސިލަށް ކަންގަތި އެވޯޑް ލިބިފައިވާނަމަ ލިބޭ ގޮތަށް ކަނޑައަޅާފައިވަނީ 10 މާކްސްއެވެ.

ކައުންސިލްތައް ހޮވާނެ މިންގަނޑުތަކާއި މާރކްސް ދެވިފައިވާ ގޮތާމެދު އެއްވެސް ކޮމެންޓެއް އޮތްނަމަ މިމަހުގެ 28ގެ ކުރިން ހުށައެޅުމަަށް ލޯކަލް ގަވަރމެންޓް މިނިސްޓްރީން ވަނީ އެދިފައެވެ. ކޮމެންޓް ހުށައަޅަން ޖެހެނީ  [email protected]އަށްކަމަށް މިނިސްޓްރީން ބުނެފައި ވެއެވެ.