އަންނަ މަހު އޮންނަ ރައްޔިތުންގެ މަޖިލިހުގެ އިންތިހާބުގައި ވެރިކަން ކުރާ މައި ޕާޓީ، ޕީއެންސީގެ ކެންޑިޑޭޓުންނަށް ތާއީދު ހޯދުމަށް ރައީސް ޑރ. މުހައްމަދު މުއިއްޒު މާލޭގައި ދޮރުން ދޮރަށް ހިންގެވުމުގެ ކެމްޕެއިން މިއަދު ފައްޓަވައިފިއެވެ.
ރައީސް ވަނީ ބުރާސްފައްޗާއި ހުކުރު ފިޔަވައި ކޮންމެ ދުވަހެއްގެ މެންދުރު 2:00 އިން 3:00 މާލޭގެ ގޭގެއަށް ޒިޔާރަތް ކުރައްވައި ރައްޔިތުންގެ ހާލު ބެއްލެވުމަށް ނިންމަވައިފައެވެ. އެމަނިކުފާނު އެންމެ ފުރަތަމަ ވަޑައިގަތީ ހެންވޭރު ހުޅަނގު ދާއިރާގެ ބައެއް ގޭގެއަށެވެ.
ރައީސް މާލޭގައި ކެމްޕެއިން ކުރައްވަން ފެއްޓެވި އިރު، ރައީސުލްޖުމްހޫރިއްޔާގެ ހައިސިއްޔަތުން އެމަނިކުފާނު ދާދި ފަހުން ވަނީ ރާއްޖޭގެ ވަރަށް ގިނަ ރަށްތަކަށް ވަޑައިގެން ރައްޔިތުންގެ ހާލު ބައްލަވައިފައެވެ. އަދި އެ ރަށްރަށުގެ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީއާ ވެސް ބައްދަލު ކުރެއްވިއެވެ.
އެމަނިކުފާނު ދަތުރުފުޅު ރޯދަ އަށް މެދުކަނޑާލެއްވި އިރު، 150 ރަށެއްގެ ކައުންސިލާ ބައްދަލު ކުރެއްވިއެވެ.
ރައްޔިތުންގެ މަޖިލިހުގެ އިންތިހާބު ބޭއްވުމަށް ހަމަޖެހިފައި ވަނީ އަންނަ މަހުގެ 21 ގައެވެ. ޕީއެންސީގެ ޓިކެޓުގައި މަޖިލީސް އިންތިހާބުގައި 89 ކެންޑިޑޭޓުން ވާދަކުރެއެވެ.
މަޖިލިސް އިންތިހާބުގައި 284،887 މީހުންނަށް ވޯޓުލުމުގެ ހައްގު ލިބިގެންވެއެވެ.
