ރައީސް ޑރ. މުހައްމަދު މުއިއްޒު ނ. ކެނދިކުޅުދޫ އަށް ކުރެއްވި ދަތުރުފުޅުގައި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރި ކަމަށް ބުނެ، ނ. ކެނދިކުޅުދޫ ކައުންސިލުން ނެރުނު ބަޔާން ބާތިލްކުރަން ލޯކަލް ގަވަމެންޓު އޮތޯރިޓީ (އެލްޖީއޭ) އިން އެންގި މައްސަލައިގައި އެ އޮތޯރިޓީގެ އިސްވެރިން ރައްޔިތުންގެ މަޖިލިހުގެ ލާމަރުކަޒީ ކޮމިޓީ އަށް ހާޒިރު ކުރަން މިއަދު ނިންމައިފިއެވެ.
އެލްޖީއޭ އިން ބަޔާން ބާތިލްކުރަން އެންގި މައްސަލަ ކޮމިޓީ އަށް ހުށަހެޅުއްވީ ކެނދިކުޅުދޫ ދާއިރާގެ އެމްޑީޕީގެ މެމްބަރު އަހުމަދު އީސާއެވެ.
ސަރުކާރުގެ ކެންޑިޑޭޓުންނަށް ވޯޓު ދިނުމަށް ރައީސް މުއިއްޒު އެދިވަޑައިގަންނަވާފައިވާތީ އެކަމުގެ ކަންބޮޑުވުން ފާޅުކޮށް، އަދި ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރައްވާ ކަމަށް ބުނެ ކެނދިކުޅުދޫ ކައުންސިލުން ބަޔާން ނެރުމާ ގުޅިގެން އެލްޖީއޭގެ ރައީސް ޑރ. މަރިޔަމް ޒުލްފާ ސޮއިކުރައްވައި އެ ކައުންސިލްގެ ރައީސް މުހައްމަދު ރައޫފަށް ފޮނުއްވި ސިޓީގައި ވަނީ ބަޔާން ބާތިލް ކުރަން އަންގަވައިފައެވެ.
އެކަމަކު، ސިޓީ ބާތިލް ކުރަން، އެމްޑީޕީގެ ކޮންޓްރޯލް އޮންނަ އެ ކައުންސިލުން ވަނީ ދެކޮޅު ހަދައިފައެވެ.
އެލްޖީއޭ އިން ކައުންސިލްގެ ބަޔާން ބާތިލުކުރުމަށް އަންގާފައި ވަނީ ގާނޫނާ ހިލާފަށް ކަމަށް ބަންޑާރަ ނައިބު އަހުމަދު އުޝާމް ވެސް ވަނީ ވިދާޅުވެފައެވެ. އަދި ކައުންސިލެއްގެ ބަޔާނެއް ބާތިލްކުރަން އެލްޖީއޭ އަށް އެންގިދާނެ ކަމަށް ގަބޫލު ނުކުރެވޭ ކަމަށް އެލްޖީއޭ އިން ބުންޏެވެ.
އުޝާމްގެ ވާހަކަތަކާ ގުޅިގެން ޒުލްފާ ފަހުން ވިދާޅުވެފައި ވަނީ ކެނދިކުޅުދޫ ކައުންސިލްގެ ބަޔާނާ ގުޅިގެން އަޅާފައި ވަނީ އަވަސް ފިޔަވަޅެއް ކަމަށާއި އެއީ ލާމަރުކަޒީ ނިޒާމަށް ހަނިކަމެއް ގެނައުމަށް ކުރެއްވި ކަމެއް ނޫން ކަމަށެވެ.
