ޖުޑީޝަލް ސާވިސް ކޮމިޝަން (ޖޭއެސްސީ) ނައިބު ރައީސްގެ މަގާމަށް ހައި ކޯޓުގެ ފަރާތުން އެ ކޮމިޝަނުގައި އިންނަވާ ފަނޑިޔާރު މުހައްމަދު ނިޔާޒު އައްޔަންކޮށްފިއެވެ.
މި މަޤާމުގައި ކުރިން ހުންނެވީ ފަނޑިޔާރު ހުސްނުއް ސުއޫދުއެވެ. ސުޕްރީމް ކޯޓުގެ ފަނޑިޔާރު އާއިޝަތު ޝުޖޫންގެ ބަދަލުގައި ސުޕްރީމް ކޯޓުގެ ފަރާތުން އެ ކޮމިޝަނަށް ހުސްނުއް ސުއޫދު އައްޔަންކުރެއްވުމުން ވައިސް ޗެއާޕާސަންގެ މަގާމު ވަނީ ހުސްވެފައެވެ.
ނިޔާޒަކީ މީގެކުރިން ހައިކޯޓުގެ ފަނޑިޔާރުކަންވެސް ކުރެއްވި ބޭފުޅެކެވެ. ނިޔާޒު ވަނީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރައްވާފައެވެ. އަދި 25 ޖެނުއަރީ 2018 ވަނަ އަހަރު ހައިކޯޓުގެ ފަނޑިޔާރުކަމުގެ ހުވާ ކުރައްވާފައި ވެއެވެ.
އޭގެ ކުރިން ހދ. ޖުޑީޝަލް ދާއިރާގެ އިސް މެޖިސްޓްރޭޓްކަމާއި، ހދ. ވައިކަރަދޫ ކޯޓުގެ މެޖިސްޓްރޭޓްކަމުގެ އިތުރުން ކުރީގެ ޖަސްޓިސް މިނިސްޓްރީގެ ޖަސްޓިސްގެ ލީގަލް އެސިސްޓެންޓުގެ މަޤާމުވެސް އޭނާ ވަނީ ފުރުއްވާފައެވެ.
ޖޭއެސްސީގައި ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި، ރައްޔިތުންގެ މަޖިލީހުގެ ރައީސާއި، ސިވިލް ސާވިސް ކޮމިޝަން (ސީއެސްސީ) ގެ ރައީސާއި، ރައްޔިތުންގެ މަޖިލީހުން ކަނޑައަޅާ އެ މަޖިލީހުގެ މެންބަރަކާއި، މަޖިލީހުން ކަނޑައަޅާ އާންމުންގެ މީހެއްގެ އިތުރުން އުއްތަމަ ފަނޑިޔާރާއި، ސުޕްރީމް ކޯޓުން ކަނޑައަޅާ ފަނޑިޔާރެއްވެސް އިންނަވާނެއެވެ. އަދި ހައި ކޯޓުން އިންތިހާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިހާބުކުރާ ދަށު ކޯޓެއްގެ ފަނޑިޔާރެއްވެސް ޖޭއެސްސީގައި ތިއްބަވައެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވަ އެވެ.
