މަޝްހޫރު ލަވަކިޔުންތެރިޔާ އަދި ހޯސްޓު އަދިތިޔާ ނަރާޔަން އެންމެ ފަހުން އޭނާގެ އަންހެނުން ޝުވެތާ އަގަރްވާލް އާއިއެކު ހަނީމޫނަށް ގޮސްފިއެވެ.
ބުރާސްފަތި ދުވަހު ސޯޝަލް މީޑިޔާގައި އަދިތިޔާ ބުނެފައިވަނީ އެދެމީހުން ހަނީމުނަށް ގޮސް ތިބީ ސްރީނަގަރ ގައި ކަމަށެވެ. އަދިތިޔާ އޭނާގެ އިންސްޓަގްރާމުގައި އެދެމީހުންގެ ސެލްފީއެއް ހިއްސާކުރަމުން ލިޔެފައިވަނީ ހަނީމޫން ފެށިއްޖެކަމަށާއި މި އާދެވުނީ ދުނިޔެމަތީގެ ސުވަރުގެ ކަމަށްވާ ކަޝްމީރަށް ކަމަށެވެ. އަދި މިއީ ކަޝްމީރަށް އައި ފުރަތަމަ ފަހަރު ކަމަށް ވެސް ބުނެފައި ވެއެވެ.
މި ފޮޓޯގައި އަދިތިޔާ މުށި ކުލައިގެ ޖެކެޓެއް ލައިގެން ހުރިއިރު އަވި އައިނެއް އަޅާފައިހުއްޓެވެ. އަދި ޝުވެތާ ލައިގެން ހުރި ފިޔާތޮށި ކުލައިގެ މަތިކޮޅަކާއެކު ރަތް ކުލައިގެ ވޫލުން ވިޔެފައިވާ ތޮތްޕެއް ބޮލުގައި އަޅާފައިވެއެވެ. މި ދެމީހުން ސެލްފީ ނަގާފައިވަނީ ސްރީނަގަރގެ ރެސްޓޯރެންޓެއް ކައިރީގައެވެ.
މީގެ ދުވަސްކޮޅެއް ކުރިން އިންސްޓެންޓް ބޮލީވުޑަށް ދިން އިންޓަވިއުއެއްގައި އަދިތިޔާ ބުނެފައި ވަނީ ހަނީމޫނަށް ގައުމުން ބޭރަށް ނުދެވުނީ އޭނާގެ މަސައްކަތް ހުރި ގޮތުންކަމަށާއި އެހެންވެ ނިންމީ އިންޑިއާގެ 3 ތަނެއްގައި ކުޑަކުޑަ 3 ޗުއްޓީ ހަދާލާ ގޮތަށް ކަމަށެވެ. އަދި ހަނީމޫނަށް ރާއްޖެއަށް އަންނާނެ ކަމަށްވެސް އަދިތިޔާ ވަނީ ބުނެފަ އެވެ.
View this post on Instagram
އަދިތިޔާ ނަރާޔަން އާއި ޝުވެތާ އަގަރްވާލް ކައިވެނި ކުރީ ރައްޓެހިވެގެން އުޅޭތާ 10 އަހަރު ފަހުންނެވެ. އެދެމީހުން ފުރަތަމަ ދިމާވީ ފިލްމު "ޝާޕިތު" ގެ ޝޫޓިން ތެރެއިންނެވެ. އަދި ކައިވެންޏަށް ފަހު 5 ކޮޓަރީގެ ބޮޑު ގެއަކަށް ބަދަލުވުމަށް، މައިންބަފައިންގެ ގެޔާއި ކައިރިން 5 ކޮޓަރީގެ ގެއެއް ގަނެފައި ވާކަމަށްވެސް ރިޕޯޓްތައް ބުނެއެވެ.
