ޣައްޒާއަށް އިންސާނީ އެހީތެރިކަން އިތުރުކުރުމަށް މަގުފަހިކޮށްދީ، ހަމަނުޖެހުންތަކަށް ދެމެހެއްޓެނިވި ހައްލެއް ގެނައުމަށް މަޝްވަރާތަކަށް މަގު ފަހިކޮށްދޭ ގޮތަށް ހަނގުރާމަ ހުއްޓާލުމަށް އެއްބަސްވުމުގެ ބާރު މިހާރު އޮތީ ހަމާސްގެ އަތްމަތީގައި ކަމަށް އެމެރިކާގެ ޚާރިޖީ ވަޒީރު އެންޓަނީ ބްލިންކެން ވިދާޅުވެއްޖެއެވެ.
ފަލަސްތީނުގެ ހަނގުރާމަވެރި ޖަމާއަތުން ގާހިރާގައި ބޭއްވި މަޝްވަރާތައް ނިންމާފަ ދިޔައީ، ރަމަޟާން މަހާ ދިމާކޮށް ހަނގުރާމަތައް މެދުކަނޑާލުމަށް އެއްބަސްވުމަކަށް އައުމުގެ މަގްސަދުގައެވެ. އިޒްރޭލާއި ހަމާސް އިން އެއްބަޔަ އަނެއްބަޔަކު ކުށްވެރިކުރަނީ 40 ދުވަހުގެ ހަނގުރާމައިގެ ބަދަލުގައި ހަމާސްއިން އަދިވެސް ހިފަހައްޓާފައި ތިބި ބައެއް މީހުން މިނިވަން ކުރަން ޖެހޭ ގޮތަށް އެއްބަސްވުމަކަށް ނާދެވުމުންނެވެ. އަދި އިސްރާއީލުގައި ބަންދުކޮށްފައި ތިބި ފަލަސްތީނު ގައިދީން ވެސް ދޫކޮށްލާނެ އެވެ.
ތުރުކީގެ ޚާރިޖީ ވަޒީރު ހަކަން ފިދާންއާ ބައްދަލުކުރެއްވުމުގެ ކުރިން ބްލިންކެން ވިދާޅުވީ ވޮޝިންޓަނުން އަދިވެސް ބާރު އަޅަނީ ހަނގުރާމަ ހުއްޓާލުމަށް ކަމަށެވެ. "މައްސަލައަކީ ހަމާސް. މައްސަލައަކީ ހަމާސް އިން ނިންމާނީ އެންމެންނަށް ވެސް ފައިދާވާނެ ގޮތަށް ހަނގުރާމަ ހުއްޓާލަންތޯ ނުވަތަ ނޫންތޯ،" ބްލިންކެން ވިދާޅުވި އެވެ. "ބޯޅަ އޮތީ އެމީހުންގެ ކޯޓުގަ. އެކަމަށް ވަރަށް ބޮޑަށް މަސައްކަތް ކުރަމުން މިދަނީ، އެމީހުން ކުރާ ކަންކަން އަޅުގަނޑުމެން ބަލާނަން."
ޣައްޒާގެ ޞިއްޙީ އިދާރާތަކުން ބުނެފައިވަނީ މިދިޔަ އޮކްޓޯބަރު މަހުގެ 7 ވަނަ ދުވަހު އިސްރާއީލުގެ ދެކުނުގައި ހަމާސް ޖަމާއަތުން ދިން ޙަމަލާއަށް ރައްދުދިނުމުގެ ގޮތުން އިސްރާއީލުން އަސްކަރީ ކެމްޕޭން ފެށިފަހުން މިހާތަނަށް ފަލަސްތީނުގެ 30،000 އަށްވުރެ ގިނަ މީހުން ޝަހީދުވެފައިވާ ކަމަށެވެ. ހަމާސްގެ ހަމަލާގައި 1200 މީހުން މަރުވެ 253 މީހުން ވަގަށް ނަގާފައިވެއެވެ.
