އަންނަ ހަފްތާގައި ފެށުމަށް ހަމަޖެހިފައިވާ ރަމަޟާން މަހުގެ ކުރިން މަސްވެރިންނަށް ދޭން ޖެހޭ ހުރިހާ ފައިސާ އެއް ދިނުމަށް މަސައްކަތް ކުރަމުން އަންނަ ކަމުގައި ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރ. އަތޮޅުގެ ބައެއް ރަށްތަކަށް ރައީސް ޑރ. މުއިއްޒު މިހާރު ކުރައްވަމުން ގެންދަވާ ދަތުރުފުޅުގައި ރ. ދުވާފަރު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން އެމަނިކުފާނު ވިދާޅުވީ މަސްވެރިކަމުގެ ދާއިރާއަކީ އިއާދަކޮށް، ވަރުގަދަކޮށް، ފުޅާ ކުރަން ބޭނުންވާ އެންމެ ބޮޑު އެއް އިންޑަސްޓްރީ ކަމަށެވެ.
އެކަމަކު، މިހާތަނަށް އައިއިރު މަސްވެރިންނަށް ދޭން ޖެހޭ ގާތްގަނޑަކަށް 600 މިލިއަން ރުފިޔާ ދޫކޮށްފައިވާ ކަމަށް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މި ސަރުކާރު ވެރިކަމާ ހަވާލުވި އިރު، މަސްވެރިންނަށް 230 މިލިއަން ނުދައްކާ އޮތް ކަމަށެވެ. އެކަމަކު، މި ސަރުކާރުން ވެރިކަމަށް އައިސް އެ ފައިސާތައް ދީފައިވާނެ ކަމަށް ރައީސް ވިދާޅުވިއެވެ.
"މަސް ބާނާ ވަރަކަށް މިފްކޯ އިން ލާރި ދޭން ޖެހޭނެ. އެހެންވީމަ 230 މިލިއަންގެ އިތުރަށް ގާތްގަނޑަކަށް 400 މިލިއަން ދެވިއްޖެ މިހާރު. އަދިވެސް ޕެންޑިންގައި އެބަހުރި." ރައީސް ވިދާޅުވިއެވެ.
"ރޯދަ މަސް އަންނަންވާ އިރަށް މި ބަލަނީ ކޮންމެވެސް ކަހަލަ ފައިނޭންސިން މެކޭނިޒަމްއެއްގެ ތެރެއިން، އެ މަސައްކަތް ކުރަން އެބަ މިހާރު. ފިޝަރީޒް މިނިސްޓްރީ އާއި ސަރުކާރުގެ ބޮޑު ކުންފުންޏަކާ މަސައްކަތްކޮށްގެން ހަމަޖެހިފައި އޮންނަ ގާނޫނީ އުސޫލުގެ ތެރެއިން އަޅުގަނޑުމެން މި ބަލަނީ ފައިސާ ހަމަޖައްސަން. މިއީ ވައުދެއް ނޫން. މަސައްކަތް އެބަ ކުރަން މަސްވެރިންގެ ހުރިހާ ފައިސާއެއް ދީ ނިންމޭތޯ،"
