ރާއްޖޭގެ އިގްތިސާދު ހަރުދަނާވާ ވަރެއްގެ މައްޗަށް ރާއްޖެއަށް ކުރިމަތިވެފައިވާ ޑޮލަރުގެ މައްސަލައަށް ހައްލު އަންނާނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރައީސް އޮފީހުން ބާއްވަމުންދާ "އަހާ" ސިލްސިލާގެ މިރޭގެ ޕްރޮގްރާމްގައި އާންމު މީހަކު ކުރި ސުވާލަކަށް ޖަވާބު ދެއްވަމުންނެވެ.
މިރޭގެ ޕްރޮގްރާމްގައި ވާހަކަ ދައްކަވަމުން ރައީސް މުއިއްޒު ވިދާޅުވީ ކުރީ ސަރުކާރުން ނުދީހުރި 9 ބިލިއަން ރުފިޔާ އެބައޮތް ކަމަށެވެ. އަދި އިގްތިސާދު ހަމަޔަކަށް އެޅުވުމަށް އެއްކަމަކަށް ފައިސާ ޗާޕްކުރުން ހުއްޓާލާފައިވާ ކަމަށާއި، އެ ނިންމުމަށް އައިއެމްއެފްއިންވެސް ތައުރީފުކޮށްފަ އެބައޮތް ކަމަށެވެ. ރައީސް މުއިއްޒު ވިދާޅުވީ ފައިސާ ޗާޕްކުރުން ހުއްޓާލުމަށް ނިންމި ނިންމުމަކީ ފަސޭހަ ނިންމުމެއް ނޫންކަމުގައެވެ.
ރައީސް އިތުރަށް ވިދާޅުވީ، ތެލަށްކުރާ ޚަރަދު ކުޑަކުރުމަށް އިއާދަކުރަނިވި ހަކަތައިގެ ޕްރޮޕޯސަލްއެއް މިހާރުވެސް ލިބިފައި އެބައޮތްކަމަށާއި، ވަރަށް އަވަހަށް އެއެއްބަސްވުމުގައި ސޮއި ކުރެވޭނެކަމަށް އުއްމީދު ކުރެވޭކަމުގައެވެ.
އާންމު މީހާގެ ސުވާލަށް ޖަވާބު ދެއްވަމުން ރައީސް މުއިއްޒު ވިދާޅުވީ، ސަރުކާރުގެ ސޮވެރިން ޑިވެލޮޕްމަންޓް ފަންޑުގައި ހުރި ފައިސާތައްވެސް ކުރީ ސަރުކާރުން އޮތީ މާރު ކޮށްލާފައި ކަމަށާއި، އެފަންޑުވެސް އަނބުރާ އިއާދަކުރަން ޖެހިފައިވާ ކަމަށާއި، އިގްތިސާދު ހަރުދަނާ ވާވަރަކުން ޑޮލަރުގެ މައްސަލައަށް ހައްލު އަންނަމުން ދާނެކަމުގައެވެ.
