2024 ވަނަ އަހަރުގެ ބަޖެޓުން ޚަރަދު ކުރުމުގައި އިގްތިސާދު ކުރުމުގެ ގޮތުން ޚާއްސަ ފިޔަވަޅުތަކެއް އެޅުމަށް ނިންމާ ފިނޭންސް މިނިސްޓްރީން ދައުލަތުގެ އިދާރާތަކަށް އަންގައިފިއެވެ.
ފިނޭންސް މިނިސްޓްރީން ދައުލަތުގެ އިދާރާތަކަށް ފޮނުވި ސާކިއުލާގައި ގިނަ ފިޔަވަޅުތަކެއް ތަންފީޒުކުރުމަށް އަންގާފައިވާއިރު އޭގެ ތެރޭގައި އާ މުވައްޒަފުން ނުނެގުމަށާއި އަދި މުސާރަތައް ބޮޑު ނުކުރުންވެސް ހިމެނެއެވެ.
ފިނޭންސްގެ ސާކިއުލާގައި ތަންފީޒު ކުރަން އަންގާފައިވާ ފިޔަވަޅުތައް
- އެއްވެސް އާ މަގާމެއް ނުއުފެއްދުން
- މުސާރައިގެ އޮނިގަނޑުތަކަށް އެއްވެސް ބަދަލެއް ނުގެނައުން
- ދޭން ފަށާފައި ނުވާ އާ އެލަވަންސެއް އަހަރުގެ ތެރޭގައި ދޭން ނުފެށުން
- ޕްރޮމޯޝަން ފަދަ އެއްވެސް މަގާމެއްގެ ނަމަށް, ރޭންކަށް, މުސާރަ އަދި އިނާޔަތަށް ބަދަލު ނުގެނައުން
- ރަސްމީ ގަޑީގެ ބޭރުން ކޮންމެހެންް ކުރަން ޖެހޭ މަސައްކަތެއް ކުރުމަށް މެނުވީ އިތުރު ގަޑީގައި މަސައްކަތް ނުކުރުން
މީގެއިތުރުން 35،000ރ. އަށް ވުރެ ބޮޑު ހަރަދެއް ކޮށްގެން ދަތުރެއް ކުރާ ނަމަ ވެސް މިނިސްޓްރީގެ ހުއްދަ ހޯދަން ޖެހޭނެއެވެ. އަދި އޮފީސް ހިންގުމަށް ބޭނުންވާ ތަކެތި ގަތުމަށާއި މަރާމަތު ކުރުމާއި ތަމްރީނު ޕްރޮގްރާމުތަކަށް ކުރާ ހަރަދު 35،000ރ. އަށް ވުރެ މަތިވާ ނަމަ ވެސް އެ ހުއްދައާއެކު މަސައްކަތްތައް ކުރިޔަށް ގެންދިޔުމަށް ވަނީ އިދާރާތަކަށް އަންގާފައެވެ.
މިއަހަރު ބަޖެޓު ތައްޔާރު ކުރެވުނުއިރު ސަބްސިޑީ ހަރަދުތައް ކުޑަކުރުމުގެ ގޮތުން އެންމެ ބޭނުން ޖެހިފައި ތިބި މީހުންނަށް ސަބްސިޑީ ދޭން ބަޖެޓުގައި ކަނޑައަޅާފައިވެއެވެ.
