ރައީސް ޑރ މުހައްމަދު މުއިއްޒު މިހާރު ދެކުނުގެ އަތޮޅުތަކަށް ކުރައްވަމުން އަންނަ ދަތުރުފުޅުގައި ގދ ތިނަދޫ ސިޓީއަށް ވަޑައިގަތުމުން އެމަނިކުފާނަށް އެސިޓީއިން ހޫނު މަރުހަބާއެއް ކިޔައިފި އެވެ.

ރައީސް މުއިއްޒު ތިނަދޫ ސިޓީއަށް ވަޑައިގެންނެވީ މިއަދު ހަވީރު 17:30 ހާއިރު އެވެ. އެގޮތުން އެމަނިކުފާނަށް ތިނަދޫއިން މަރުހަބާ ދެންނެވީ ތިނަދޫ ސިޓީ ކައުންސިލްގެ ރައީސް ސައުދު އަލީ އާއި ސިޓީ ކައުންސިލްގެ މެމްބަރުންގެ އިތުރުން ސަރުކާރުގެ އިސް މަގާމުތަކުގައި ތިއްބެވި ތިނަދޫއަށް ނިސްބަތްވާ ބޭފުޅުންނެވެ. އަދި ގިނަ އަދަދެއްގެ ރައްޔިތުން ވަނީ ރައީސަށް މަރުހަބާ ދަންނަވަައި ރައީސާއި ސަލާން ކުރުމަށް ތިނަދޫ ޖެޓީ ސަރަހައްދަށް އެއްވެފައި އެވެ.

ރައީސްގެ މި ދަތުރުފުޅަކީ ވެރިކަމާއި ހަވާލުވެވަޑައިގެންނެވި ފަހުން ތިނަދޫ ސިޓީއަށް ވަޑައިގަންނަވާ ފުރަތަމަ ދަތުރުފުޅެވެ. އެގޮތުން މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގައި ރައީސް މުއިއްޒުއަށް ތިނަދޫއިން ވަނީ މެޖޯރިޓީ ލިބިފައި އެވެ..

ރައީސް ތިނަދޫއަށް ކުރައްވަމުން އަންނަ ރަސްމީ ދަތުރުފުޅުގެ ތެރެއިން މިރޭ ތިނަދޫ ރައްޔިތުންނާއި ބައްދަލުކުރެއްވުމަށް ވަނީ ހަމަޖެހިފައިއެވެ. އެގޮތުން ތިނަދޫގައި ރައީސް ބާއްވާ ޖަލްސާ އޮންނާނީ ތިނަދޫ ސްކޫލުގައި އެވެ. މީގެ އިތުރުން ރައީސް މިރޭ ތިނަދޫ ކައުންސިލާއި ގދ އަތޮޅު ކައުންސިލާއިވެސް ބައްދަލުކުރުމަށް ވަނީ ހަމަޖެހިފައި އެވެ.

ރައީސް ތިނަދޫއަށް ފަހު ދެން ވަޑައިގަތުމަށް ހަމަޖެހިފައިވަނީ ގދ ގައްދޫ އަށެވެ. އެގޮތުން ގައްދޫއަށް ރައީސް ވަޑައިގަންނަވާނީ މާދަމާ ހެނދުނު އެވެ.