ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑްރިންގެ ކުށުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނަށް އިންސާފު ލިބެން ޖެހޭ ކަމަށާއި އެކަމަށް ހުރަސް އަޅާނެ މީހަކު މި ސަރުކާރުގައި ނުހުންނާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އައްޑޫ ސިޓީ އަށް ކުރައްވަމުން ގެންދަވާ ދަތުރުފުޅުގައި ފޭދޫގައި ބޭއްވި ޖަލްސާގައި ރައީސް މުއިއްޒު ވިދާޅުވީ ރާއްޖެ އަށް ހަމަޖެހުން އަންނާނީ ބަދަލު ހިފުމުގެ ރޫހު ނިމުމަކަށް އައިސްގެން ކަމަށެވެ. އަދި ސިޔާސީ ގޮތުން އެއްވެސް މީހަކަށް އަނިޔާއެއް ދިނުމަކީ އެމަނިކުފާނު ކުރައްވާނެ ކަމެއް ނޫން ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި ކޯޓުތަކަކީ މިހާރު މިނިވަންކޮށް ހިނގަމުން އަންނަ ތަންތަނެވެ. އެ ތަންތަނަށް ސަރުކާރު ނުފޫޒު ނުފޯރުވާނެ ކަމުގައި ވިދާޅުވިއެވެ.
"ޝަރީއަތުގެ ތެރެއަށް ނުފޫޒު ނުފޯރުވާނެ ކަމަށް އަޅުގަނޑު ދެންނެވިން. ޖުޑިޝަރީ ހިނގަމުން އެ ދަނީ ފުރިހަމަ މިނިވަން ކަމާ އެކު. އެއްވެސް ވަޒީރަކު، އެއްވެސް ކުންފުންޏެއްގެ ވެރިއަކު، އެއްވެސް އެމްޕީއަކު، ސަރުކާރުގެ ތެރެއިން އެއްވެސް ބޭފުޅަކު ކޯޓުތަކަށް ނުފޫޒެއް ނުފޯރުވާނެ،" ރައީސް ވިދާޅުވިއެވެ.
ރައީސް ވިދާޅުވީ ގައުމަށް ހަމަޖެހުން އަންނާނީ ބަދަލު ހިފުމުގެ ރޫހު ދޫކޮށްލައިގެން ކަމަށާއި އެހެންވެ، އެ މަނިކުފާނަކީ ސިޔާސީ ބޭފުޅުން ހައްޔަރުކޮށް، ޖަލަށްލާނެ ބޭފުޅެއް ނޫން ކަމަށެވެ. އެ ހަމަޖެހުން ގައުމަށް ގެނައުމަށް ޔާމީނަށް އިންސާފު ލިބެން ޖެހޭ ކަމަށް ރައީސް ވިދާޅުވިއެވެ.
"އަޅުގަނޑު ގަބޫލު ކުރާގޮތުގައި މިހާ ދުވަސް ވެގެން ދިޔައިރުގައި ރައީސް ޔާމީނަށް އިންސާފު ލިބުން ލަސްވުމަކީ ގައުމަށް ހަމަޖެހުން ލިބޭނެ ގޮތެއް ނޫން، އެމަނިކުފާނަށްވެސް އިންސާފު ލިބެން ޖެހޭނެ،" ރައީސް ވިދާޅުވިއެވެ.
އިންސާފު ލަސްވުމަކީ އިންސާފު ނުލިބުން ކަމަށް ވެސް އެމަނިކުފާނު ވިދާޅުވިއެވެ.
"އެހެންވީމަ އިންސާފު ލިބި ޖަސްޓިސް ސާވްވުމަކީ މި ގައުމަށް އޮތް އެންމެ އިންސާފުވެރި އޮތް، އެމަނިފާނަށްވެސް އިންސާފުވެރި ގޮތް، އަޅުގަނޑު އުއްމީދު ކުރަނީ ޖުޑިޝަރީގެ ތެރެއިން އެމަނިކުފާނަށް ދާދި އަވަހަށް އިންސާފު ލިބިގެންދާނެ ކަމަށް،" ރައީސް ވިދާޅުވިއެވެ.
ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ހުކުމް ކުރީ ޑިސެމްބަރު 25، 2022 ގައެވެ. އެ ހުކުމް ހައި ކޯޓުގައި އިސްތިއުނާފްކޮށްފައި އޮންނަތާ އަހަރެއްވާން ދާ އިރު، އެ މައްސަލައިގައި ހުކުމަކާ ހަމައަށް އަދިވެސް ނާދެއެވެ. އެކަމަކު، މައްސަލައިގެ އަޑުއެހުންތައް ނިންމާލި ފަހުން ވެސް މިހާރު ތިން މަސް ވާން ވަނީ ކައިރިވެފައެވެ.
