މިދިޔަ ފަސް އަހަރު ރައްޔިތުން މުއްސަނދިވެފައި ނުވާ ކަމަށާއި ލޯންތައް ނަގައިގެން ރައްޔިތުންނަށް ލިބުނު ލާބަ އާއި މަންފާއެއް ނެތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އައްޑޫ ސިޓީ އަށް މިހާރު ކުރައްވަމުން ގެންދަވާ ދަތުރުފުޅުގައި މަރަދޫ އަދި މަރަދޫފޭދޫ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ މިދިޔަ ނޮވެމްބަރު 17 ގައި ސަރުކާރު ލިބިގެންދިޔަ އިރުގައި ގައުމު އޮތީ އިގްތިސާދީ ވަރަށް ބޮޑު އަނދަވަޅެއްގެ ތެރެއަށް ވެއްޓިފައި ކަމަށެވެ. އެގޮތުން 120 ބިލިއަން ރުފިޔާ އަށް ވުރެ ބޮޑު އަދަދެއްގެ ދަރަނި އޮތް ކަން ރައީސުލްޖުމްހޫރިއްޔާ ކަމުގެ ހުވާ ކުރެއްވުމަށް ފަހު ވެސް ފާހަގަ ކުރައްވާފައި ވާނެ ކަމަށް ރައީސް ވިދާޅުވިއެވެ.
"އެއީ އަޅުގަނޑުމެންނަށް ވާރުތަވެގެން އައި އިގްތިސާދީ ހާލަތު އޮތް ހިސާބު. މިހާރު އެކަން އެގޮތަށް ކުރި ފަރާތްތަކުން އެކަންކަން އެހެން ނެތް ކަމަށް ރައްޔިތުންނަށް ވިސްނައިދޭން އުޅޭ އުޅުން އެއީ ހައިރާން ވާން ޖެހޭ ކަމެއް. 120 ބިލިއަން ރުފިޔާގެ ބޮޑު ދަރަންޏެއް، މިއިން ޒަމާނަކު ރާއްޖޭގެ އިގްތިސާދު ނުވެއްޓޭހާ ބޮޑު އަނދަވަޅަކަށް ވެއްޓިފައި އޮތީ. އެތައް ސަތޭކަ ބިލިއަން ޑޮލަރެއްގެ ލޯން ކޮންމެ އަހަރަކު ނަގަމުން ދިޔައީ،" ރައީސް ވިދާޅުވިއެވެ.
ރައީސް ވިދާޅުވި ގޮތުގައި ލޯން ނެގުމަކީ މައްސަލައެއް ނޫނެވެ. މި ސަރުކާރަށް ވެސް މަސައްކަތް ކުރެވޭނީ އެކި ކަހަލަ ލޯނާއި ފެސިލިޓީތައް ހޯދައިގެން ކަމަށާއި މީގައި މައްސަލައަކަށް ވަނީ ކުރިން ނެގި ލޯންތަކުން ރައްޔިތުންނަށް ލިބުނު ފައިދާއެއް ނެތީމަ ކަމަށް ވެސް އެމަނިކުފާނު ވިދާޅުވިއެވެ.
"ރައްޔިތުންނަށް އެންމެ ލާބަ އާއި މަންފާ ލިބޭ ގޮތަށް އެކަން ކުރުމަކީ އަދި ތަފާތު ކަމެއް. މިދިޔަ ދުވަސްތަކުގައި ނެގިފައި ހުރި ލޯންތައް ނަގާފައި ހުރީކީ އެގޮތަކަށް ނޫން. އެ ނެގުނު ލޯންތަކުން ކުރަމުންދާ މަސައްކަތްތަކުން ރައްޔިތުންނަށް އެ މަޝްރޫއުތަކުން ވާ ފައިދާ ވަރަށް ކުޑަ،" ރައީސް ވިދާޅުވިއެވެ.
ޗައިނާ-މޯލްޑިވްސް ފްރެންޑްޝިޕް ބްރިޖުން މިސާލު ނަންގަވައި ރައީސް ވިދާޅުވީ އެ މަޝްރޫއަކީ ވެސް ލޯނާއި ހިލޭ އެހީގެ ތެރެއިން ހިންގުނު މަޝްރޫއެއް ކަމަށެވެ. އެކަމަކު، އެ މަޝްރޫއު ހިންގުނީމަ، ދިވެހި ރައްޔިތުން ދިޔައީ މުއްސަނދިވެގެން ކަމަށް ވެސް އެމަނިކުފާނު ވިދާޅުވިއެވެ.
"އޭގެ މެޓީރިއަލް ހޯދުން ކަމަށްވިޔަސް، ލޮޖިސްޓިކަލް މަސައްކަތް ވިޔަސް އެ މަސައްކަތަށް އައިސް އުޅުނު މުވައްޒަފުންނަށް ކާބޯތަކެތި ގަތުން ކަމަށް ވިޔަސް، ކުދި ކުދި ކަންކަމުން ގޮސް އެކިއެކި ކަންކަމުގައި ރައްޔިތުންނަށް، ރާއްޖޭގެ އެކި ކުންފުނިތަކަށް އެކަމުގައި އުޅެން ފުރުސަތު ލިބުނު މަޝްރޫއެއް އެއީ،" ރައީސް ވިދާޅުވިއެވެ.
ރައީސް ވިދާޅުވި ގޮތުގައި މިދިޔަ ފަސް އަހަރު ސިޔާސަތު އޮތީކީ އެގޮތަކަށް ނޫން ކަމަށެވެ. އެގޮތުން "މޮހޮރެއް" ވިޔަސް ގެންނަން ޖެހެނީ ލޯން ދޫކުރި ގައުމުން ކަމަށާއި ދިވެހި ރައްޔިތުންނަށް މަޝްރޫއުތަކުން ލިބުނު މުއްސަނދިކަމެއް ނެތް ކަމަށް ވެސް އެމަނިކުފާނު ވިދާޅުވިއެވެ.
"އެހެންވީމަ ރާއްޖޭގެ އިގްތިސާދަށް ފައިދާ ނުވި ތަނުގައި ރައްޔިތުން މުއްސަނދި ނުވި."
ރައީސް ވިދާޅުވި ގޮތުގައި މި ސަރުކާރުން ތަފާތުވާނެއެވެ. އެގޮތުން މަޝްރޫއުތައް ކުރިއަށް ގެންދާ އިރުގައި ނަގަން ޖެހޭ ލޯނެއް ވިއްޔާ ނަގަމުން ދާނީ ރައްޔިތުންނަށް މުއްސަނދިކަން ލިބޭ ގޮތަށް ކަމަށް ވެސް އެމަނިކުފާނު ވިދާޅުވިއެވެ. ލޯންތައް ނަގާނީ ރައްޔިތުންގެ ޖީބަށް ނަފާ ލިބޭ ގޮތަށާއި ކުދި ވިޔަފާރިތަކާއި މެދުފަންތީގެ ވިޔަފާރީތަކަށް އާރޯކަން ގެނެސްދެއްވާނެ ކަމަށް ވެސް އެމަނިކުފާނު ވިދާޅުވިއެވެ.
ދެވަނަ ކަމަކަށް އެ ނަގާ ލޯނެއް ވެއްޖެއްޔާ ނަގާނީ ދިގު މުއްދަތަކަށް ބަހާލައިގެން ވީހާވެސް ލުއި ގޮތަކަށް އިގްތިސާދަށް ކެތްވާ ވަރަކަށް ކަމަށް ވެސް ރައީސް ވިދާޅުވިއެވެ.
