އެމެރިކާއިން އަވަހާރަ ކޮށްލާފައިވާ، އީރާނުގެ އަސްކަރިއްޔާގެ އިސް ޖެނެރަލް، ގައްސާމް ސުލައިމާނީގެ މަރުގެ ބަދަލު ހިފާނެކަމުގެ ވައުދު، އިރާނުގެ ރޫހާނީ ލީޑަރު، އަލީ ހުސެއިނީ ޚާމަނާއި އަލުން ތަކުރާރު ކުރައްވައިފިއެވެ.
ގައްސާމް ސުލައިމާނީގެ މަރުގެ ބަދަލު ހިފާނެ ކަމުގެ ވައުދު، ޚާމަނާއި ތަކުރާރު ކުރައްވާފައިވަނީ، ސުލައިމާނީ އަވަހާރަ ކޮށްލިތާ 1 އަހަރު ފުރެން ދެހަފްތާއަށް ވެފައިވަނިކޮށް، ޖެނެރަލް ސުލައިމާނީގެ އާއިލާގެ ބޭފުޅުންނާއެކީ ބޭއްވި ބައްދަލު ވުމެއްގައެވެ.
ޚާމަނާއީ ވިދާޅުވެފައިވަނީ، 2020 ވަނަ އަހަރުގެ ޖެނުއަރީމަހު 3 ވަނަދުވަހު، ބައުދާދުގެ އެއަރޕޯޓު ކައިރިން، އެމެރިކާގެ ރައީސްގެ އޯޑަރަށް ދެވުނު ޑްރޯން ހަމަލާއެއްގައި، ގައްސާމް ސުލައިމާނީ އަވަހާރަ ކޮށްލި ކޮށްލުމަށް އެމެރިކާއިން އަގު ދައްކަން ޖެހޭނެ ކަމަށެވެ.
ސުޕްރީމް ލީޑަރު ވިދާޅުވެފައިވަނީ، ސުލަައިމާނީ އަވަހާރަ ކޮށްލުމާދެކޮޅަށް އިރާނުގެ މަގުތަކަށް ނިކުމެ ޝުޢޫރު ފާޅުކުރި އެތައް މިލިއަން މީހުން، އެމެރިކާއަށް ވަރުގަދަ މެސެޖުތަކެއް ފޯރުކޮށް ދީފައިވާ ކަމުގައެވެ.
ޚާމަނާއީ ވިދާޅުވި ގޮތުގައި، ސުލައިމާނީގެ އަމިއްލަ އަވަށް ކަމުގައިވާ، ކާމަންގައި އޮތް ސުލައިމާނީގެ ޖަނާޒާއަށްފަހު، އިރާގުގައި ހުންނަ އެމެރިކާގެ ދެ މަރުކަޒަކަށް އިރާނުގެ ރިވޮލިއުޝަނަރީ ގާޑް ކޯޕްސްއިން ދީފައިވާ ވަރުގަދަ މިސައިލް ހަމަލާތަކަކީ، ސުލާއިމާނީގެ މަރުގެ ބަދަލު ހިފުމުގެ ގޮތުން އެމެރިކާގެ ކަންކަށިމަތީގައި ޖެހި އެއް އެތިފަހަރެކެވެ.
"އެހެންނަމަވެސް، އަސްލު ބަދަލު ހިފުމަކީ، އެމެރިކާގެ ދެކޮޅުވެރިކަމާ، ނުފޫޒުން އަބަދަށްޓަކާ މިންޖުވުން،" ސުލައިމާނީ އަވަހާރަ ކޮށްލިތާ އަހަރު ފުރުން ފާހަގަ ކުރުމުގެ އިންތިޒާމުތައް ހަމަޖައްސަމުންދާ ފަރާތްތައްވެސް ބައިވެރި ވާގޮތަށް ތެހެރާންގައި ބޭއްވި މި ބައްދަލުވުމުގައި ޚާމަނާއި ވިދާޅުވެފައި ވެއެވެ.
އަދި ވިދާޅުވީ، އެެމެރިކާގެ ނުފޫޒުން އެއްކިބާވުމަށް ކުރެވޭ މަސައްކަތަކީ، ގައްސާމް ސުލައިމާނީ އަވަހާރަކޮށްލުމަށް ހަމަލާ ދިން މީހުންނާއި އަދި އެހަމަލާ ދިނުމަށް އަމުރު ކުރި މީހުންގެ ކިބައި އިރާނުން ބަދަލު ހިފުމުގެ އިތުރުން ކުރަންޖެހޭ މަސައްކަތްތަކެއް ކަމުގައެވެ.
"އެމީހުން ދަންނަން ޖެހޭނެ، އެންމެ އެކަށީގެންވާ ވަގުތުގައި، ބަދަލު ހިފެން އޮތް ގޮތަކަށް އަހަރުމެން، ޖެނެރަލް ސުލައިމާނީގެ މަރުގެ ބަދަލު ހިފާނެކަން،" ޚާމަނާއި ވިދާޅުވެފައި ވެއެވެ.
Those who ordered the murder of General Soleimani as well as those who carried this out should be punished. This revenge will certainly happen at the right time.
— Khamenei.ir (@khamenei_ir) December 16, 2020
އިރާނުގެ ރިވޮލިއުޝަނަރީ ގާޑް ކޯޕްސްގެ، ގައުމުން ބޭރުގައި ހިގާ ހަރަކާތްތަކާ ބެހޭ ގޮފި، ޤުދުސް ފޯސްގެ ލީޑަރ ގައްސާމް ސުލައިމާނީ އަވަހާރަ ކޮށްލުމާއެކު، ޚާމަނާއީ ވަނީ، ސުލައިމާނީގެ މަރުގެ ބަދަލު އެމެރިކާގެ ކިބައިން ހިފާނެކަމުގެ އިންޒާރު ދީފައެވެ. އަދި އީރާނުގެ ރައީސް ހަސަން ރޫހާނީ ވިދާޅުވެފައިވަނީ، ސުލައިމާނީގެ މަރުގެ ޒިންމާ އުފުލަން ޖެހޭނީ ހަމައެކަނި އެމެރިކާގެ ރައީސް ޑޮނަލްޑް ޓްރަމްޕް ނޫން ކަމަށާއި، އެމަރުގެ ޒިންމާ މުޅި އެމެރިކާއިން އުފުލަން ޖެހޭނެ ކަމަށެވެ.
ފާއިތުވެދިޔަ ހަފްތާގައި، އެމެރިކާގެ ޖެނެރަލް ކޮމާންޑުން ބުނެފައިވަނީ، ޖެނެރަލް ސުލައިނާމީ އަވަހާރަ ކޮށްލުވުނުތާ އެއް އަހަރު ފުރޭ މުނާސަބަތާއި ގުޅުވައިގެން، އިރާނުން އެމަރުގެ ބަދަލު ހިފުމަށް މަސައްކަތް ކޮށްފާނެ ކަމަށްބަލާ، އެމެރިކާގެ ލުއިސިއާނާއި ބޭސްއިން، B-52 މަރުކާގެ ބޮން އަޅާ ދެ ފައިޓަރ ޖެޓް މިހާރުވަނީ، މެދުއިރު މައްޗަށް ފޮނުވާލެވިފައެވެ.
އަދި، އެމެރިކާގެ ބޮން އަޅާ މަތިންދާ ބޯޓެއް އިރާނުގެ ވައިގެ ސަރަހައްދަށް ވަދެއްޖެނަމަ، ވައްޓާލާނެ ކަމުގެ އިންޒާރު އިރާނުގެ އަސްކަރިއްޔާއިން ވަނީ ދީފައެވެ.
ގައްސާމް ސުލައިމާނީގެ އަންހެން ދަރިފުޅު، ޒައިނަބު ސުލައިމާނީ، އިގިރޭސިބަހުން މީޑީއާ އަކަށް ދިން ފުރަމަ އިންޓަވިއުގައި ބުނެފައިވަނީ، އެނާގެ ބައްޕަގެ މަރަކީ، ބައްޕަގެ ހަގިގީ ލެގަސީގެ ފެށުން ކަމުގައެވެ.
"އެމެރިކާއިން ހީކުރީ، އަހަރެން ބައްޕަ މަރާލުމުން، ހުރިހާކަމެއް ހަަމަޖެހިގެން ދިޔައީ ކަމަށް. އެއީ އެމީހުން ގަބޫލު ކުރީ ޖެނެރަލް ސުލައިމާނީ މަރާލެވުމުން މުޅި މެދުއިރުމަތީގެ ހަގީގީ ބާރު ނެތިގެން ދިޔައީ ކަމަށް،" ރަޝީއާ ޓުޑޭ އަށް ދިން ބަސްދީގަތުމެއްގައި ސުލައިމާނީގެ އަންހެން ދަރިފުޅު ބުނެފައި ވެއެވެ.
"އެހެންނަމަވެސް، އެމީހުންނަށް ކުރެވުނީ ގޯސް ހީއެއް. އެމީހުންނަށް ނުފެންނަ މަންޒަރަކީ، އީރާނުގެ ރައްޔިތުންގެ ހިތްތަކުގައިވާ ރުޅިވެރިކަމާ ނަފްރަތު. އިރާނުގެ ރައްޔިތުންގެ ލޯތަކުން އޮހޮރެމުންދާ ކަރުނަތައް. އެމީހުންގެ ކެކުޅުންތައް. އެހެންނަމަވެސް، ޖެނެރަލް ސުލައިމާނީގެ ހަގީގީ ލަޝްކަރަކީ އިރާނުގެ ރައްޔިތުން. އެމީހުން ޓްރަމްޕްގެ ކިބައިން ބަދަލު ހިފާނެ."
ޒައިންބު ބުނެފައިވަނީ، އެމެރިކާގެ އިންތިޚާބީ ރައީސް ޖޯ ބައިޑްންވެސް ސުލައިމާނީގެ މަރަށް ތާޢީދު ކޮށްފައިވާތީ، ބައިޑްންއާއި ޓްރަމްޕާވެސް އެއްވެސް ތަފާތެއް ނެތް ކަމުގައެވެ.
