މިދިޔަ މަހު ރިލީޒްކުރި އިރުގައި ފިލްމް "ފައިޓާ" ގައި ނުހިމަނައި އޮތް ލަވައެއް މިއަދުން ފެށިގެން ފިލްމުގައި ހިމަނައިގެން ދައްކަން ފަށައިފި އެވެ.
ބޮލީވުޑްގެ އޭ ލިސްޓްުގެ ދެ ތަރިން ކަމުގައިވާ ރިތިކް ރޯޝަން އާއި ދީޕިކާ ޕަދުކޯން އެކުގައި ފެނިގެންދާ މި ފިލްމް އަކީ ބެލުންތެރިންގެ ބޮޑު ތަރުހީބެއް ލިބެމުން އަންނަ ފިލްމްއެކެވެ.
މިހާރު ޔޫ ޓިއުބަށް ވެސް ދޫކޮށްލާފައިވާ މި ލަވަ އަކީ ދެ ތަރިންގެ ހިތްގައިމު ކެމިސްޓްރީ އާއި ރީތި މަންޒަރުތަކެއް ފެނިގެންދާ "ބޭގަރާރު ދިލް" އެވެ. ވިޝާލް-ޝޭކަރް މިއުޒިކް ހެދި ލަވަ ކިޔާފައި ވަނީ އެ ދެ މީހުންނާއި ޝިލްޕާ ރާއޯގެ އިތުރުން ވިޝާލް މިޝްރާ އެވެ،
"ފައިޓާ" އަކީ ބޮލީވުޑްގެ ފުރަތަމަ އޭރިއަލް އެކްޝަން ތުރިލާ އެވެ. މި ފިލްމްގެ ވާހަކަ ބިނާކޮށްފައި ވަނީ އިންޑިއާގެ ވައިގެ އަސްކަރީ އޮފިސަރުންގެ ގައުމީ ހިދުމަތަށެވެ. އެހެންވެ ފައިޓަރޖެޓްގެ ވަރަށް ގިނަ ހާދިސާތަކެއް މިފިލްމުން ފެނިގެންދާނެއެވެ.
މިދިއަ އަހަރު ގެނެސްދިން ޝާހްރުކް ޚާންގެ ކާމިޔާބު ފިލްމް "ޕަތާން" ގެ ޑައިރެކްޓަރު ސިދާތު އާނަންދު ގެނެސްދޭ "ފައިޓާ" އަކީ އިންޑިއާގެ ވައިގެ އަސްކަރިއްޔާ އަށް ޓްރިބިއުޓެއްގެ ގޮތުގައި ގެނެސްދޭ އެއްޗެކެވެ.
