2016 ގައި ރިތިކް ރޯޝަން ކަންގަނާގެ މައްޗަށް ފައިލް ކޮށްފައިވާ މައްސަލަ ކްރައިމް އިންޓެލިޖެންސް ޔުނިޓްއަށް ދާދި ފަހުން ވަނީ ޓްރާންސްފާކޮށްފައެވެ. ތިރިކް ވަނީ 2013 އާއި 2014 ވަނަ އަހަރު ކަންގަނާގެ އީމެއިލް އައިޑީން 100 އަށްވުރެ ގިނަ އީމެއިލް ލިބިފައިވާ ކަމަށް ބުނެ ސައިބަރ ސެލްއަށް މައްސަލައެއް ހުށައަޅާފައެވެ.
މި މައްސަލަ ޓްރާންސްފާ ކުރިކަން އެނގުނީ، ރިތިކްގެ ވަކީލުން މުމްބާއީ ޕޮލިހަށް، މި މައްސަލައިގެ އެއްވެސް ޚަބަރެއް ނުވާކަމަށްބުނެ ހަނދާންކޮށްދީ ސިޓީއެއް ފޮނުވުމުންނެވެ.
މި މައްސަލަ މިހާރު ބަލަމުން ގެންދަނީ ކްރައިމް އިންޓެލިޖެންސް ޔުނިޓުން ކަމަށް ޚަބަރު ލިބުމުން، ކަންގަނާ ވަނީ ޓުވީޓެއްގައި ރިތިކް ކައިރީގައި ވީ ހުރިހާކަމެއް ހަނދާން ނައްތާލާފައި ކުރިއަށް ދިއުމަށް ބުނެފައެވެ.
ކަންގަނާ ޓުވީޓުގައި ލިޔެފައިވަނީ ރިތިކް އާއި އޭނަގެ ގުޅުން ނިމިފައިވާކަމަށާއި އަދި މިހާރު ރިތިކް އޭނާގެ އަންހެނުން ވަރިވެސް ކޮށްފައިވާއިރު ދެންވެސް ވީ ކަންތައް ހަނދާން ނައްތާލުމަށެވެ. އެހެން އަންހެނަކާއި އެކު ގުޅުމެއް ބާއްވަން ބޭނުން ނުވާއިރުވެސް ކަންގަނާ ގެ އަމިއްލަ ދިރިއުޅުމުގައި ކަމެއް ފަށަން އުޅޭ ކޮންމެ ފަހަރަކު ރިތިކް ޑުރާމާ ކުޅެންފަށާ ކަމަށްވެސް ކަންގަނާ ވަނީ ބުނެފައެވެ.
His sob story starts again, so many years since our break up and his divorce but he refuses to move on, refuses to date any woman, just when I gather courage to find some hope in my personal life he starts the same drama again, @iHrithik kab tak royega ek chote se affair keliye? https://t.co/qh6pYkpsIP
— Kangana Ranaut (@KanganaTeam) December 14, 2020
މި މައްސަލަ އެދެމީހުންގެ މެދުގައި ހޫނުވީ، އިންޓަވިއުއެއްގައި ކަންގަނާ ރިތިކް އާއި ދިމާއަށް "ސިލީ އެކްސް" މިހެން ބުނުމުންނެވެ. މީގެ ސަބަބުން އެދެމީހުންވަނީ އެކަކު އަނެކަކަށް ލީގަލް ނޯޓިސް ވެސް ފޮނުވާފައެވެ.
ނަމަވެސް ރިތިކް ވަނީ އޭނާގެ ފިލްމު "ސުޕާ ތާޓީ" ރިލީސްކުރުމަށް ދިން އިންޓަވިއުއެއްގައި ކަންގަނާއާއި އޭނާއާއި އެއްވެސް ގުޅުމެއް މިހާރު ނޯންނާނެ ކަމަށާއި އަދި ކަންގަނާގެ މައްޗަށް ސީދާކޮށް ގާނޫނީ އެއްވެސް މައްސަލައެއް ހުށައަޅާފައި ނުވާނެ ކަމަށްވެސް ބުނެފައެވެ.
ރިތިކް ރޯޝަން އާއި ކަންގަނާ ރަނާވަތު ވަނީ "ކައިޓްސް" އަދި "ކްރިޝް 3″ އިން އެކުގައި ފެނިގެން ގޮސްފައެވެ.
