ރާއްޖޭގައި ފުރަތަމަ ފަހަރަށް ފުޓްސަލް އަދި ނެޓްބޯޅަ ކޮމްޕްލެކްސްއެއް އެޅުމަށް ހުޅުމާލެ އިން ދެ ބިން ކަނޑައަޅާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މި އަހަރަށް ރައްޔިތުންގެ މަޖިލިސް ހުޅުވުމަށް ރައީސް މުއިއްޒު އިއްވެވި އެމަނިކުފާނުގެ ފުރަތަމަ ރިޔާސީ ބަޔާނުގައި ވިދާޅުވީ ޒުވާނުންގެ ވާހަކަ ދައްކާއިރު، ދިވެހި ހުނަރުވެރި ގިނަ އެތުލީޓުން މިއަދު ތިބީ މާޔޫސްކަމުގައި ކަމަށެވެ. ހަމައެކަނި ދިވެހިން އެންމެ ލޯބިކުރާ ފުޓްބޯޅައަށް ނަޒަރު ހިންގާލާ އިރު ވެސް ސަރަހައްދީ މުބާރާތެއްގައި ދުވަހަކު ރާއްޖެ ނުދާހާ ދަށަށް ގޮސް، ކުޅިވަރު އެތުލީޓުންނަށް ކުޅިވަރު ކުޅުންތެރިންނަށް އިތުރު ތަމްރީނާއި އާމްދަނީގެ މަގުތައް ވެސް ހުރީ ބަންދުވެފައި ކަމަށާއި އެކަމާ ހިތާމަ ކުރައްވާ ކަމަށް ރައީސް ވިދާޅުވިއެވެ.
"އިރާދަކުރެއްވިއްޔާ، މިއަހަރު ކުޅިވަރު އެސޯސިއޭޝަންތަކަށް ކުރިއެރުމާ ހަރަކާތްތެރިކަން އަންނާނޭ މަގުތައް އަޅުގަނޑުމެން ފަހިކޮށްދޭނަން. ކުޅިވަރު މުބާރާތްތަކަށް ދިވެހި އެތުލީޓުންނާ ކުޅުންތެރީން ތަމްރީނުކުރުން ދުރު ރާސްތާގެ ދެމެހެއްޓެނިވި ކާމިޔާބީއަށް އަމާޒު ހިފައިގެން ފަށައިގަންނާނަން." ރައީސް ވިދާޅުވިއެވެ.
ރާއްޖޭގެ ބިމުގެ ޖާގައަށް ބަލާއިރު، ފަންގިފިލާތަކަށް މަތިމައްޗަށް ހެދިފައިވާ ކުޅިވަރުކުޅޭ ތަންތަން ގާއިމްކުރަންޖެހޭ ކަމަށާއި މިގޮތުން ފުރަތަމަ ފަހަރަށް މަލްޓިސްޓޯރީ "ފުޓްސަލް ކޮމްޕްލެކްސް" އަދި "ނެޓްބޯޅަ ކޮމްޕްލެކްސް"އެއް އެޅުމަށް ހުޅުމާލެއިން ދެ ބިން މިހާރުވަނީ ކަނޑައެޅިފައި ކަމަށް ރައީސް ވިދާޅުވިއެވެ.
މީގެއިތުރުން ކުޅިވަރުގެ ބޮޑެތި ކްލަބުތައް މާލީ އަނދަވަޅުތަކުން ސަލާމަތްކޮށް، ކުރިއަރާނެ ގޮތްތައް ފަހި ކުރަން ޖެހޭ ކަމަށާއި ކުޅުންތެރިންނަށް ތަމްރީނާއި އާމްދަނީގެ ފުރުސަތު އިތުރު ކުރަން ޖެހޭ ކަމަށް ވެސް ރައީސް ވިދާޅުވިއެވެ. މި ހުރިހާ ކަމެއްގައި ވެސް ދިވެހި ހުރިހާ އެތުލީޓުންނާ ކުޅުންތެރިންގެ އަޑު އަހައިގެން ކުޅިވަރު ކުރިއެރުވުމަށް ސަރުކާރުން ފުރިހަމަ އެއްބާރުލުން ދޭނެ ކަމުގެ ޔަގީންކަން އަރުވާ ކަމުގައި ރައީސް ވިދާޅުވިއެވެ.
ރައީސް ވިދާޅުވީ ގައުމީ ކުޅުންތެރިންގެ ފެންވަރު ރަނގަޅުކޮށް ކުރިއެރުވުމަށް ބޭނުންވާ "ހައި ޕާރފޯމަންސް ސެންޓަރ"ގެ މަސައްކަތް ފައްޓަވާނެ ކަމަށެވެ. އަދި ކުޅިވަރާއި ކަސްރަތުގެ މުހިންމުކަމާއި ގުޅޭގޮތުން ސްކޫލު ކުދިންނާއި އާންމު ރައްޔިތުން ހޭލުންތެރި ކުރުމަށް ރާއްޖޭގެ ހުރިހާ ރަށެއްގައި ޕްރޮގްރާމު ހިންގުމަށް ހަމަޖެހިފައިވާ ކަމަށް އެމަނިކުފާނު ވިދާޅުވިއެވެ. ހަމަ އެހެންމެ ސްޕޯޓްސް ސައިކޮލޮޖީ، ސްޕޯޓްސް ނިއުޓްރިޝަން އަދި ކުޅިވަރުގެ ރިވެތި އަހްލާގާ ގުޅޭގޮތުން ކުޅުންތެރިންނަށް މައުލޫމާތުދީ ހޭލުންތެރިކުރުމުގެ ޕްރޮގްރާމު ފެށިގެންދާނެ ކަމުގައި ރައީސް ވިދާޅުވިއެވެ.
"ހަމައެއާއެކު އަޅުގަނޑު ފާހަގަކުރަން. ދުނިޔެއަށް އަންނަ ބަދަލުތަކާއެކު، ދިވެހި ޒުވާނުންގެ ޝައުޤު އިތުރުވަމުންދާ، ރޭސިންގ، ސާރފިންގ، މޫދުކުޅިވަރު، އީ-ގޭމިން ފަދަ ކަންކަން ރާއްޖޭގައި ކުރިއަރުވާން ސަރުކާރުން އިރާދަކުރެއްވިއްޔާ މަސައްކަތް ފަށާނަން." ރައީސް ވިދާޅުވިއެވެ.
ރައީސް ވިދާޅުވި ގޮތުގައި ކުޅިވަރުގެ މައިދާނާއި ސިޔާސީ މަސައްކަތްތަކާއި ގައުމީ ހިދުމަތާއި އިޖުތިމާއީ ކަންކަމާއި މި ނޫން ހުރިހާ ކަމެއްގައި ވެސް ދެ ޖިންސަށް ވެސް ސަރުކާރުން ގެންގުޅޭނީ ހަމަހަމަ ސިޔާސަތެކެވެ. އަދި ކުރިއަށް ދިއުމުގައި ދެޖިންސަށް ހަމަހަމަ ފުރުސަތު މި ސަރުކާރުގައި އަބަދުވެސް އޮންނާނެ ކަމަށް ވިދާޅުވިއެވެ.
