ގައުމީ ބެންކް، ބެންކް އޮފް މޯލްޑިވްސްގެ އެއާޕޯޓް ބްރާންޗާއި، މާލޭ ބާޒާރު ބްރާންޗް ބަންދު ކުރުމަށް ނިންމައިފިއެވެ.
ބީއެމްއެލުން ބުނީ މިމަހުގެ 22 ވާ އަންގާރަ ދުވަހުން ފެށިގެން މި 2 ބްރާން ބަންދު ވާނެކަމަށެވެ. އެހެން ނަމަވެސް ދެ ބްރާންޗުންވެސް ދެމުންގެންދިޔަ އޭޓީއެމްގެ ހިދުމަތް ލިބެން ހުންނާނެ ކަމަށް ބެންކުން ބުނެއެވެ. މީގެ އިތުރުން އެއާޕޯޓުގެ ޑިޕާޗާ އާއި އެރައިވަލް ޓަރމިނަލްތަކުގައި ދެމުންގެންދާ ބޭރުފައިސާގެ ހިދުމަތްދޭ ކައުންޓަރުތައް މިހާރެކޭވެސް އެއްގޮތަށް ހުންނާނެ ކަމަށްވެސް ބެންކުން ބުނެއެވެ.
މީގެ އިތުރުން ބީއެމްއެލްގެ ބާޒާރު ބްރާންޗަކީ ކޮވިޑް-19ގެ ސަބަބުން މާޗު މަހުން ފެށިގެން ހިދުމަތް ހުއްޓާލާފައިވާ ބްރާންޗެކެވެ. ބީއެމްއެލުން ބުނީ ބާޒާރު ބްރާންޗްވެސް އެދުވަހުން ފެށިގެން އެއްކޮށް ބަންދު ކުރުމަށް ނިންމާފައިވާ ކަމަށެވެ.
ބެންކުގެ ހިދުމަތް ހޯދާ ފަރާތްތަކަށް ފަސޭހަ ކުރުމަށް އެ ބެންކުން އަންނަނީ ހިދުމަތްދޭ ގޮތްތަކަށް ބޮޑެތި ބަދަލުތަކެއް ގެންނަމުންނެވެ. އެގޮތުން މިދިޔަ އާދީއްތަ އިން ފެށިގެން ވަނީ އަމީނީމަގު ބްރާންޗުގެ ލޯނުސެންޓަރުން ދެމުންގެންދިޔަ ލޯނުގެ ހުރިހާ ހިދުމަތެއް ބެންކުގެ މަޖީދީމަގު ބްރާންޗަށް (ކުރީގެ ސްޓާރސިނަމާ އިމާރާތް) ބަދަލުކޮށްފަ އެވެ.
