މި ސަރުކާރުގެ ވަޒީރުންނަށް ރުހުން ދިނުމަށް މިދިޔަ އާދިއްތަ ދުވަހު ރައްޔިތުންގެ މަޖިލިހުގައި ބޭއްވި ޖަލްސާގައި ހިންގި މާރާމާރީގެ މައްސަލަ ފުލުހުން ތަހުގީގު ކުރަން ފަށައިފިއެވެ.
އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް ޗީފް ސުޕްރިންޓެންޑެންޓް އަހްމަދު ނާފިޒު ވިދާޅުވީ މެންބަރުންގެ މެދުގައި ހިނގި މާރާމާރީގެ މައްސަލަ ރައްޔިތުންގެ މަޖިލީހުން ފުލުހަށް ހުށަހަޅާފައިވާ ކަމަށެވެ. އަދި އެ ހަމަނުޖެހުމުގައި އަނިޔާވި ބައެއް މެމްބަރުން ވެސް އެ މައްސަލަ ފުލުހުންގެ ސަމާލުކަމަށް ގެނެސްފައިވާ ކަމަށް ވެސް އޭނާ ވިދާޅުވިއެވެ.
އެ ދުވަހު ހިނގައިދިޔަ ކަންތައްތަކަށް ފަހު ބައެއް މެމްބަރުންނަށް އިންޒާރު ލިބެމުން އަންނާތީ އަޅަން ޖެހޭ ފިޔަވަޅުތައް އަޅަން ފަށާފައިވާ ކަމަށް ނާފިޒު ވިދާޅުވިއެވެ.
މަޖިލިހުގެ ތެރޭގައި އެންމެ ބޮޑު މާރާމާރީއެއް ހިނގީ ކެނދިކުޅުދޫ ދާއިރާގެ އެމްޑީޕީގެ މެމްބަރު އަހުމަދު އީސާ އާއި ކަނޑިތީމު ދާއިރާގެ ޕީއެންސީގެ މެމްބަރު އަބްދުﷲ ޝަހީމް އަބްދުލްހަކީމާ ދެމެދުގައެވެ. މެމްބަރު ޝަހީމް ވަނީ އީސަގެ ފައިގައި ހިފަހައްޓައި ވައްޓާލަން މަސައްކަތްކޮށްފައެވެ. އޭގެ ފަހުން އީސަ އާއި ޝަހީމް ވެސް ވެއްޓޭ މަންޒަރު ފެނެއެވެ. އެއާއެކީ އީސަ ވަނީ ޝަހީމްގެ ކަރާ ދިމާލުގައި ކަކުލުން ފިއްތާލައި ބޮޑު އަނިޔާއެއް ލިބޭ ކަހަލަ ގޮތަކަށް އަމަލު ކުރައްވައިފައެވެ.
މި ހަމަނުޖެހުންތަކުގައި ޝަހީމްގެ ބޮލަށާއި ކަރާ ދިމާލަށް ޒަހަމްވެ، އޭޑީކޭ ހޮސްޕިޓަލްގައި ފަރުވާ ދީފައިވެއެވެ.
އޭގެ އިތުރުން މަތިވެރި ދާއިރާގެ މެންބަރު ހަސަން ޒަރީރުގެ އިނގިލި ވެސް ވަނީ ވަރަށް ބޮޑަށް ޒަހަމްވެފައެވެ.
