ޕީޖީ ޝަމީމްއަށް މަގުމަތިން މިއަދު ދިން ހަމަލާގެ މައުލޫމާތު ރައީސް ސާލިހުގެ އަރިހުން ސާފުކުރެއްވުމަށް، މިމައްސަލަ ތަހުގީގު ކުރަމުންދާ ފުލުހުންގެ ޓީމަށް އަންގަވާފައިވާ ކަމުގައި ހޯމް މިިނިސްޓަރު އަލީ އިހުސާން ވިދާޅުވެއްޖެއެވެ.
އަލީ އިހުސާން މިހެން ވިދާޅުވެފައިވަނީ، ޕީޖީ ޝަމީމަށް ދިން ހަމަލާ ފުލުހުން ތަހުގީގު ކުރަމުން ދަނިކޮށް، އެ ހަމަލާ ދީފައިވަނީ ސިޔާސީ މަގުސަދެއްގައި ކަމަށް ކުރީގެ ރައީސް ސާލިހުވެވަޑައިގަންނަވާނީ އެ ހަމަލާއާއި ގުޅުންހުރި މައުލޫމާތު އެމަނިކުފާނަށް އެނގިވަޑައިގަންނަވާތީކަމަށް ގަބޫލު ކުރައްވާ ކަމުގައެވެ.
މި މައްސަލަ މިހާރު ދަނީ ތަހުގީގު ކުރަމުންނެވެ. އެ ހަމަލާއަކީ ސިޔާސީ މަގްސަދެއްގައި ދިން ހަމަލާއެއް ކަމަށް ކުރީގެ ރައީސް އިއުލާނު ކުރެއްވުމުން ދޭހަވަނީ މި ހަމަލާގެ މަގްސަދާއި މީހުންނާ ބެހޭ އިތުބާރު ހުރި މައުލޫމާތެއް ކުރީގެ ރައީސަށް ލިބިފައިވާ ކަމެވެ. އެހެންވީމާ، އަޅުގަނޑު ކުރީގެ ރައީސުލްޖުމްހޫރިއްޔާގެ އަރިހުން އެދެން، މިތަނަށް މި ދެންނެވި އިތުބާރުހުރި މަޢުލޫމާތެއް މިހާރުން މިހާރަށް ފުލުހުންނާ ޙިއްޞާކޮށްދެއްވުމަށް. މިކަމުގައި ކުރީގެ ރައީސުންގެ އޮފީހާ އިދިކޮޅަށް ކޯޑިނޭޓް ކުރުމަށް އަޅުގަނޑު އިންވެސްޓިގޭޓަރުންނަށް ދެންނެވިން. ފުލުހުން މި މައްސަލަ އަކީ އެންމެ ބޮޑު އިސްކަމެއް ދީގެން ކުރިއަށް ގެންދާ މައްސަލައެއްގެ ގޮތުގައި ބަލަމުންދާ ކަމަށާއި އެކަން ކުރި ފަރާތްތައް އިންސާފުގެ ކުރިމައްޗަށް ގެންނާނެ.
އިހުސާންގެ އެކްސް ޕޯސްޓުގައި ވިދާޅުވެފައި ވެއެވެ.
ޕީޖީ ޝަމީމަށް މިއަދު ދިން ހަމަލާއަކީ ސިޔާސީ މަގްސަދެއްގައި ދިން ހަމަލައެއްކަމަށް ވިދާޅުވެ، އެ ހަމަލާ ކުރީގެ ރައީސް ސާލިހު މިއަދުވަނީ ކުށްވެރި ކުރައްވާފައެވެ.
ރައީސް ސާލިހު ކުރެއްވި އެކްސް ޕޯސްޓެއްގައި ވިދާޅުވީ ޕްރޮސެކިއުޓާ ޖެނެރަލް ހުސައިން ޝަމީމަށް މިއަދު ހެނދުނު ދިން ހަމަލާ ކުށްވެރިކުރާ ކަމަށާއި، ޕީޖީ ޝަމީމަށް އަވަސް ޝިފާއަކަށް އެދޭ ކަމުގައެވެ.
ޑިމޮކްރެޓިކް މުޖުތަމަޢެއްގައި ސިޔާސީ މަޤްޞަދުގައި ހިންގާ ހަމަނުޖެހުންތަކުގެ އެއްވެސް ޖާގައެއް ނޯންނާނެ ކަމަށާއި، އެކަން ކުރި ފަރާތްތައް އިންސާފުގެ ކުރިމައްޗަށް ގެނައުމުގައި އަވަސް ފިޔަވަޅުތަކެއް އެޅުމަށް އަޅުގަނޑު ސަރުކާރަށް ގޮވާލަން.
ރައީސް ސާލިހުގެ އެކްސް ޕޯސްޓުގައި ވިދާޅުވެފައި ވެއެވެ.
ޕީޖީ ޝަމީމްއަށް މަގުމަތިން މީހަކު ދިން ހަމަލާގައި ލިބިވަޑައިގެންނެވި އަނިޔާ ސީރިއަސް ނޫންކަމަށް މައުލޫމާތު ލިބިފައި ވެއެވެ. އެގޮތުން ސޯޝަލް މީޑިއާގައި މިހާރު ދައުރުވަމުންދާ ފޮޓޯތަކުން އެނގޭ ގޮތުގައި ޝަމީމަށް ދިން ހަމަލާގައި އަނިޔާވެފައިވަނި އޭނާ މުލައްދަނޑިއަށެވެ.
ޝަމީމަށް ފަރުވާ ދެމުންދާ އޭޑީކޭގެ ބައެއް ފަރާތްތަކާ ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި ޝަމީމަށް ހަމަލާ ދީފައިވަނީ ތޫނު އެއްޗަކުން ކަމަށް ބުނެފައިވި ނަމަވެސް، ފުލުހުން ބުނެފައިވަނީ ހަމަލާދީފައިވަނީ ތޫނު އެއްޗަކުން ނޫން ކަމަށް މިހާތަނަށް ބެލި ބެލުމުން އެނގިފައިވާ ކަމުގައެވެ.
ފޮޓޯތަކުން ފެންނަ ގޮތުގައި ޝަމީމް އަތުގައިވަނީ ބެންޑޭޖް އަޅާފައެވެ.
އޭނާއަށް ހަމަލާ ދީފައިވާކަމުގެ ރިޕޯޓ ލިބިފައިވާކަމަށްވެސް ފުލުުހުން ވަނީބުނެފައެވެެ.
ހަމަލާއަށްފަހު ޝަމީމް ފަރުވާ ހޯދާފައިވަނީ އޭޑީކޭ ހޮސްޕިޓަލުންނެވެ.
ފުލުހުން ދަނީ މިމައްސަލަ ތަހުގީގު ކުރަމުންނެވެ.
ޕްރޮސެކިއުޓާ ޖެނެރަލް ޙުސައިން ޝަމީމަށް މިއަދުގެ ހެނދުނު ވަގުތެއްގައި ހަމަލާދިނީ ދެމީހަކު ކަމަށާއި، އެމްއެންޑީއެފުން ޝަމީމަށް ދެމުން އަންނަ ސެކިއުރިޓީ ހަމަލާއާ ގުޅިގެން އިތުރަށް ވަރުގަދަކޮށްފައިވާކަމަށް ޕީޖީ އޮފީހުން ބުނެފައި ވެއެވެ.
