އަންނަ މާޗް މަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލިހުގެ އިންތިހާބަށް ޕީޕީއެމް/ޕީއެންސީގެ ފަރާތުން ވާދަކުރާނެ ކެންޑިޑޭޓުން ހޮވުމަށް މިއަދު ބޭއްވި ޕްރައިމަރީގައި ކުރީގެ ފޮރިން މިނިސްޓަރު ދުންޔާ މައުމޫނަށް ބޮޑު ނާކާމިޔާބީއަކާ ކުރިމަތިލައްވަން ޖެހިވަޑައިގެންފިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ފޮރިން މިނިސްޓަރު ކަން ކުރެއްވި އަދި ފަހުން، މޯލްޑިވްސް ނެޝަނަލް ޕާޓީ (އެމްއެންޕީ) ގައި އިސް ދައުރެއް އަދާކުރެއްވި ދުންޔާ މައުމޫން ވާދަކުރެއްވީ ހުޅުމާލެ ދެކުނު ދާއިރާގެ ޕީޕީއެމް/ޕީއެންސީ ޕްރައިމަރީގައެވެ. އެ ޕްރައިމަރީގެ ނަތީޖާ ދައްކާ ގޮތުން އޭނާ ދިޔައީ ތިން ވަނައަށެވެ.
އެ ޕްރައިމަރީ ކާމިޔާބު ކުރެއްވީ ޝަނީޒް ހާޝިމް (ޝާންކޮ) އެވެ. އޭނާ އަށް 240 ވޯޓު ލިބުނެވެ. ދެ ވަނަ އަށް އެންމެ ގިނަ ވޯޓު ލިބުނީ ރަހުމަތުﷲ އަޝްރަފަށެވެ. އޭނާ އަށް 102 ވޯޓު ލިބުނެވެ. ތިން ވަނަ އަށް ދިޔަ ދުންޔާ އަށް ލިބިވަޑައިގަތީ އެންމެ 70 ވޯޓެވެ.
މިއީ ދުންޔާ އިންތިހާބެއްގައި ވާދަކުރެއްވި ފުރަތަމަ ފަހަރެވެ. އޭނާގެ ކެމްޕެއިންގައި ބައެއް ވަޒީރުން ވެސް ބައިވެރިވެވަޑައިގެންނެވިއެވެ. އަދި ދުންޔާގެ އެއްބަނޑު އެއްބަފާ ބޭބެ އަދި އެމްއާރުއެމްގެ ރައީސް ފާރިސް މައުމޫން ވެސް އަމަލީ ގޮތުން ކެމްޕެއިންގައި ބައިވެރިވެވަޑައިގެންނެވިއެވެ.
