ޕީއެންސީއާއި ކޯލިޝަން ހަދާފައިވާ އެމްއެންޕީގެ ލީޑަރ ކާނަލް ނާޒިމް ވާދަކުރައްވާ ދާއިރާގެ އިތުރުން، ޖުމުހުރީ ޕާޓީގެ ލީޑަރު ގާސިމް އިބުރާހީމްއާއި އެމްޑީއޭގެ ރައީސް ސިޔާމްގެ ގޮޑިއަށްވެސް ވާދަ ނުކުރަން ޕީއެންސީން ނިންމައިފިއެވެ.

މިކަން ހާމަކޮށްފައިވަނީ، މިއަދު ޕީއެންސީން ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޗެއަރޕާސަން އަބުދުއްރަހީމްއެވެ.

މިއަދުގެ ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ، އެމްއެންޕީގެ ލީޑަރު ކާނަލް ރިޓަޔަރޑް މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދު ވާދަކުރައްވާ މީދޫ ދާއިރާގެ ގޮނޑިއާއި، މާމިނގިލީ ދާއިރާގެ މެމްބަރު ޤާސިމް އިބްރާހިމަށް ވެސް އެދާއިރާ ދޫކޮށްލާން ޕީއެންސީން ނިންމާފައިވާ ކަމުގައެވެ.

އަޅުގަނޑުމެން ނިންމާފައި މިއޮތީ އެމްއެންޕީގެ ލީޑަރު ރިޓަޔާޑް ކާނަލް ނާޒިމް ވާދަކުރައްވާ ދާއިރާއަށް އަޅުގަނޑުމެން ޕްރައިމަރީއަކަށް ނުދާނަމޭ. އަޅުގަނޑުމެން އެޕާޓީގެ ލީޑަރަށް އިހުތިރާމް ކުރުމުގެ ގޮތުން އަޅުގަނޑުމެން ވާދަނުކޮށް، އެގޮނޑިއަށް ވާދަކުރުމުގެ ފުރުސަތު ނާޒިމަށް ދޭނީ.

އަދުރޭ ވިދާޅިވިއެވެ.

އަދުރޭ ވިދާޅުވީ އެ ދާއިރާތައް ދޫކޮށްލީ އެ ޕާޓީތަކުގެ ލީޑަރުންނަށް އިހުތިރާމް ކުރުމުގެ ކަމަށާއި، ޕީއެންސީގެ ވިސްނުމަކީ ދާއިރާތަކަށް ގުޅިގެން ވާދަކުރުން ކަމުގައެވެ.

އެހެން ވީމާ އެ ތިން ޕާޓީން ވެސް ވާދަކުރައްވާ. އަޅުގަނޑުމެން ކުރީގައި ވެސް ދަންނަވާފައި އޮންނާނެ ރައްޔިތުންގެ މަޖިލިސް އިންތިހާބުގައި ދެ ޕާޓީން ހުރިހާ ދާއިރާއަކަަށް ވާދަކުރާނެޔޭ.

ހުރިހާ ގޮނޑިއަކަށް ވާދަ ނުކުރުމަކީ މާކުރިން ނިންމާފައި އޮތް ނިންމުމެއްކަން ފާހަގަ ކުރައްވަމުން އަބްދުއްރަހީމް ވިދާޅުވިއެވެ.

އަންނަ ހޮނިހިރު ދުވަހު ބާއްވާ ޕީއެންސީގެ ޕްރައިމަރީގައި 283 ކެނޑިޑޭޓުން ވާދަކުރެއެވެ. އޭގެ ތެރެއިން 13 ކެނޑިޑޭޓުންނަކީ ޕްރައިމަރީއަކާނުލާ ޓިކެޓް ކަށަވަރުވެފައިވާ ކެނޑިޑޭޓުންނެވެ.