މާދަމާ ސިނާތަކަށް ދޫކޮށްލަން ތައްޔާރުވަމުން އަންނަ ރިތިކް ރޯޝަންގެ ފިލްމު "ފައިޓާ" ގަލްފުގެ ގައުމުތަކުގައި ދެއްކުން މަނާކޮށްފި އެވެ.
ބޮލީވުޑްގެ އޭ ލިސްޓްުގެ ދެ ތަރިން ކަމުގައިވާ ރިތިކް ރޯޝަން އާއި ދީޕިކާ ޕަދުކޯން އެކުގައި ފެނިގެންދާ ފުރަތަމަ ފިލްމް، ސިނަމާތަކަށް މާދަމާ އަންނައިރުގައި ފިލްމްގެ ޓްރެއިލާ ވެސް މިހާރު ވަނީ ދައްކައިލައިފައިއެވެ. މީގެ ޓްރެއިލާ މިއަދު ދައްކައިލި އިރުގައި ނޭވާ ހިފަހައްޓައިލަން ޖެހޭ ގިނަ މަންޒަރު ތަކެއް ވަނީ ދައްކައިލައިފައިއެވެ.
ރިޕޯޓްތައް ބުނި ގޮތުގައި، ގަލްފުގެ ގައުމުތަކުގެ ތެރެއިން މި ފިލްމު ދެއްކުމުގެ ހުއްދަ ލިބުނީ ޔޫއޭއީ އިން އެކަންޏެވެ. އަދި އެގޮތަށް ނިންމި މައިގަނޑު ސަބަބަކީ "ފައިޓާ" އަކީ އިންޑިއާ އަށް 2016 ގައި ޕާކިސްތާނަށް ނިސްބަތްވާ ކަމަށްވާ ބުނާ ޓެރަރިސްޓުންތަކެއް ދިން ޕުލްވާމާ ހަމަލާ އަށް ބިނާކޮށް ހަދާފައިވާ ފިލްމަށްވާ އިރު، ޕާކިސްތާނަށް ރައްދުވާ ގޮތަށް ފިލްމުގެ މައިގަނޑު ޕްލޮޓް އޮވެފައި، އެ ގައުމާ މެދު ނަފުރަތާއި ރުޅިވެރިކަން އުފެދޭ ގޮތަށް ފިލްމު ހަދާފައިވާތީ ކަމަށް ބުނެފައި އެވެ.
"ފައިޓާ" އަކީ ބޮލީވުޑްގެ ފުރަތަމަ އޭރިއަލް އެކްޝަން ތުރިލާ އެވެ. މި ފިލްމްގެ ވާހަކަ ބިނާކޮށްފައި ވަނީ އިންޑިއާގެ ވައިގެ އަސްކަރީ އޮފިސަރުންގެ ގައުމީ ހިދުމަތަށެވެ. އެހެންވެ ފައިޓަރޖެޓްގެ ވަރަށް ގިނަ ހާދިސާތަކެއް މިފިލްމުން ފެނިގެންދާނެއެވެ.
މި އަހަރު ގެނެސްދިން ޝާހްރުކް ޚާންގެ ކާމިޔާބު ފިލްމް "ޕަތާން" ގެ ޑައިރެކްޓަރު ސިދާތު އާނަންދު ގެނެސްދޭ "ފައިޓާ" އަކީ އިންޑިއާގެ ވައިގެ އަސްކަރިއްޔާ އަށް ޓްރިބިއުޓެއްގެ ގޮތުގައި ގެނެސްދޭ އެއްޗެކެވެ.
ދީޕިކާ އާއި ރިތިކް ލީޑުން ފެނިގެންދާ މި ފިލްމުގެ މުހިންމު ރޯލަކުން އަނިލް ކަޕޫރު ވެސް ފެނިގެން ދާނެއެވެ. ފިލްމުގެ ވާހަކަ ލިޔެފައި ވަނީ ވެސް ސިދާތެވެ. ފިލްމު ގެނެސްދެނީ އޭނަގެ ފިލްމު ކުންފުނި މާފްލިކްސް ޕިކްޗާސް އާއި ވަޔަކޮމް 18 ގުޅިގެންނެވެ.
