އަންނަ މަހު 1 ވަނަ ދުވަހު ރިލީޒް ކުރާ، އައި ފިލްމްސް އިން ހަދާ ތިން ވަނަ ފިލްމު "ކަންބަޅި" ގެ ލަވައެއް ދައްކާލައިފި އެވެ.
"އާދޭ ދާން" ގެ ނަން ދީފައިވާ މި ލަވައިން ފެންނަނީ ފިލްމުގައި ދެމަފިރިންގެ ރޯލު ކުޅެފައިވާ ރަވީ ފާރޫގާއި ނުޒުހަތު ޝުއައިބް (ނުޒޫ) ގެ އިތުރުން އެ މީހުންގެ ދަރިފުޅާއި އެ މީހުންގެ ގުޅުމެވެ.
މި ލަވައިގެ އަޑުގެވެރިއަކީ މަރިޔަމް ސަލްވާ އެވެ. މި ހިތްގައިމު ރާގު ހެދީ ޝަހީދު ލިގެސީ އަދި ޢަބްދުލް ބާސިތު ޢަބްދުއްޞަމަދު އެވެ. މި ހިތްގައިމު ރާގަށް، ހިތްފަސޭހަ މިއުޒިކެއް ހަދާފައިވަނީވެސް ޝަހީދު އެވެ. ލިރިކްސް ހެދީ ޢަބްދުލް ބާސިތު ޢަބްދުއްޞަމަދު އެވެ.
"ކަންބަޅި" ޑައިރެކްޓް ކުރީ އިއްލެ އާއި ބަވަތި ފިލްމުގައި ލީޑް ރޯލެއް އަދާކޮށްފައިވާ އިފްނާޒް ފިރާގު ގުޅިގެންނެވެ. އައި ފިލްމްސް މިހާތަނަށް ވަނީ ކާމިޔާބު ދެ ފިލްމެއް ނެރެފަ އެވެ. އެއީ "ނީނާ" އާއި "ބަވަތި" އެވެ.
"ކަންބަޅީ" ގެ ކާސްޓަށް ބަލާ އިރު، ނުޒުހަތު ޝުއައިބް (ނުޒޫ)ގެ އިތުރުން ވާޝިޔާ މުހައްމަދު، އިފްނާޒް، ޝަރަފު އަބްދުﷲ، ތާތި އާދަމް، އިޝްފާން އަދި އަލީ ނަދީމު ހިމެނެ އެވެ. ފާހަގަކޮށްލެވޭ އިތުރު ތަރިންގެ ތެރޭގައި ތާތި އާދަމް، މުޙައްމަދު އަފްރާހް، މޫސާ އަލީފް، ހާޒިފް މުހައްމަދު، އަލަށް ތަޢާރަފުވާ މުހައްމަދު އިޝްފާން، އަލީ ނަދީހް (ޗަންނަ)، މުހައްމަދު ނަޖަހް އަހްމަދް ރައޫފް، ހުސައިން ސާމިހް މުހައްމަދު، ވިކީ، ފާތުމަތު ލަތީފާ، ދީނާ އަޙްމަދު (ޖެރީ) ހިމެނެއެވެ.
އާސިމް އަލީ އަދި އިލްޔާސް ވަހީދު ޕްރޮޑިއުސްކުރާ މި ފިލްމުގެ މިއުޒިކް ހަދަނީ ފިލްމު "ފްރީ ޑެލިވަރީ" ގެ ހިތްގައިމު މިއުޒިކް ހެދި ޝަހީދު ލިގެސީ އެވެ. ފިލްމުގެ ޕޯސްޓް ޕްރޮޑަކްޝަން މަސައްކަތްކުރަނީ އިއްލެގެ "ބަވަތި" އަދި "ނީނާ"ގެ ވެސް އެ މަސައްކަތްތައްކުރި އޯކޭޒް އިންކް އެވެ. ހަމަ އެހެންމެ ކެމެރާ ކުރަނީވެސް މި ބުނި ފިލްމުތައް ކެމެރާކުރި ތަޖުރިބާކާރު އަދި ޒުވާން ކެމެރާމަން ޝިވާޒް (މާސްކޭ) އެވެ.
