ރައްޔިތުން ވަޒީރުންނާއި ކުރަން ބޭނުންވާ ސުވާލުތަކަށް ޖަވާބު ދެއްވުމަށް ބާއްވާ ވަޒީރުންގެ ފުރަތަމަ ޕަބްލިކް ފޯރަމް މިރޭ ބާއްވާގޮތަށް ހަމަޖައްސައިފިއެވެ.
ވަޒީރުންނާއި ސުވާލުކުރުމަށް ބާއްވާ ޕަބްލިކް ފޯރަމް ކުރިޔަށް ގެންދަނީ ރައީސް އޮފީހާއި ޕީއެސްއެމް ގުޅިގެންނެވެ. މި ސިލްސިލާގެ ފުރަތަމަ ފޯރަމް ބޭއްވުމަށް ހަމަޖެހިފައިވަނީ ހޮނިހިރު ދުވަހުގެރޭ 8:30 ގައެވެ. މި ސިލްސިލާގެ ފުރަތަމަ ފޯރަމްގައި 5 ވަޒީރަކު ބައިވެރިވެވަޑައިގަންނަވާނެއެވެ.
މި ފޯރަމް ކުރިޔަށް ގެންދާނީ "އަހާ"ގެ ނަމުގައި 2 ގަޑިއިރަށެވެ.
މި ފޯރަމްގެ ފުރަތަމަ އެޕޮސޯޑުގައި ބައިވެރިވެވަޑައިގަންނަވާނީ އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސަޢީދު، އިޤްތިޞާދީ ތަރައްގީ އާއި ވިޔަފާރިއާބެހޭ ވަޒީރު މުހައްމަދު ސައީދު، އިޖުތިމާއީ އަދި އާއިލީ ތަރައްގީއާބެހޭ ވަޒީރު: އާއިޝަތު ޝިހާމް، އިމާރާތްކުރުމާއި ބިނާރާބެހޭ ވަޒީރު ޑރ އަބްދުﷲ މުއްތަލިބްގެ އިތުރުން ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިއުއެވެ.
ފޯރަމް އޮންނަ ތަނަށް ގޮސް ސުވާލުކުރުމުގެ ފުރުސަތު ހުޅުވާލެވިފައިވާއިރު، ފޯން ކޯލްގެ އިތުރުމް އެސްއެމްއެސްގެ ޒަރިއްޔާއިން އަދި ސޯޝަލް މީޑިއާ މެދުވެރިކޮށްވެސް ވަޒީރުންނަށް ސުވާލު ފޮނުވޭނެއެވެ.
ވަޒީރުންނާއި ސުވާލުކުރުމަށް ބާއްވާ ޕަބްލިކް ފޯރަމް ބޭއްވުމަށް ހަމަޖެހިފައިވަނީ ދެމަހުން އެއްމަހުއެވެ. ކޮންމެ 3 މަހަކުން އެއްމަހު ފޯރަމްގައި ރައީސް ބައިވެރިވެވަޑައިގަންނަވާނެއެވެ.
