ބޮލީވުޑްގެ އެކްޓަރު އަޖޭ ދޭވްގަން ފެނިގެންދާ ސުޕަނެޗްރަލް ތުރިލާ "ޝައިތާން" ގެ ފަސްޓްލުކް ޕޯސްޓަރު ދައްކައިލައިފިއެވެ.
މިދިޔަ އަހަރު ރިލީޒްކުރި ފިލްމު "ގަނަޕަތު"ގެ ޑައިރެކްޓަރުގެ މި ފިލްމަކީ، އާދަޔާ ޚިލާފު ބިރުވެރި ހާދިސާތަކެއް ކިޔައިދޭ ފިލްމެކެވެ. އަޖޭގެ އިތުރުން މި ފިލްމް އިން ފެނިގެންދާނީ އާރް މާދަވަން އެވެ.
View this post on Instagram
ޝޫޓިން ނިންމާލައި މިހާރު ޕޯސްޓް-ޕްރޮޑަކްޝަން މަރުހަލާގައި އޮތް މި ފިލްމަކީ މިދިޔަ އަހަރުގެ ފަހުކޮޅު ޓައިގާ ޝްރޮފްގެ "ގަނަޕަތު" ގެނެސްދިން ޑައިރެކްޓަރު ވިކާސް ބާލް ހަދާފައިވާ ފިލްމެކެވެ. "ޝައިތާން" އަކީ ވިކާސްއާ އެކީ އަޖޭ މަސައްކަތްކުރި ފުރަތަމަ ފިލްމެވެ.
މި ފިލްމްއަކީ މިދިޔަ އަހަރު ރިލީޒްކުރި ގުޖްރާތީ ފިލްމު "ވަޝް" އަސްލަކަށް ބަލައިގެން އުފައްދާ ފިލްމެކެވެ. ގުޖްރާތުގެ އެ ފިލްމަށް ލިބުނު ތަރުހީބާ އެކު "ޝައިތާން"ގެ ނަމުގައި ގެނެސްދޭން ނިންމީއެވެ.
މިދިޔަ އަހަރު ފިލްމު "ބޯލާ"އިން އެންމެ ފަހުން ބެލުންތެރިންނަށް ފެނުނު އެކްޓަރުގެ ފިލްމު "ޝައިތާން"އަށް ފަހު ބެލުންތެރިންނަށް އަޖޭ ފެންނާނީ މި އަހަރުގެ އޭޕްރިލް މަހުގެ 26 ވަނަ ދުވަހު ރިލީޒްކުރެވޭ ފިލްމު "އޯރޯ މޭ ކަހާ ދަމް ތާ"އިންނެވެ.
