އެމަނިކުފާނުގެ ކެބިނެޓްގައި ހިމެނިވަޑައިގަންނަވާ ވަޒީރުންނާއި ސުވާލު ކުރެވޭނެ ގޮތަށް ފޯރަމްތަކެއް ބާއްވަވައި ރައްޔިތުންގެ ކުރިމައްޗަށް ވަޑައިގެން ކުރާ ކޮންމެ ސުވާލަކަށް ޖަވާބު ދެއްވަން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު މިރޭ އިއުލާން ކުރައްވައިފިއެވެ.
މާލޭގެ އާ މޭޔަރު އާދަމް އާޒިމާއި އާ ތިން ކައުންސިލަރުން މަގާމުގެ ހުވާ ކުރުމަށް ދަރުބާރުގޭގައި ބޭއްވި ޖަލްސާގައި ރައީސް މުއިއްޒު ވިދާޅުވީ ރައްޔިތުންގެ އިތުބާރާއި ތާއިދާއި އެކީގައި އިންތިހާބު ވެގެން އަންނަނީ ރައްޔިތުންނަށް ކުލުނާއި ލޯތްބާއެކީގައި ހިދުމަތް ކުރަން ކަމަށެވެ. އަދި ތަފާތު ކުރުމެއް ނެތި ހަމަހަމަކަމާއެކުގައި މަސައްކަތް ކުރަން އަންނަ އިރުގައި ސަރުކާރުން މަސައްކަތް ކުރަނީ އެ މަގުން ކަމަށް ރައީސް ވިދާޅުވިއެވެ.
"އަޅުގަނޑުމެން މަސައްކަތް ކުރަމުން ދާނީ އެގޮތަށް، އަޅުގަނޑު ވައުދުވެސްވިން، ވައުދު ނުވި ނަމަވެސް އަޅުގަނޑު ކަން ކުރާނެ ގޮތަކީވެސް ރައްޔިތުންނާއި ގާތަށް ދިއުން،" ރަައީސް ވިދާޅުވިއެވެ.
ރައީސް ވިދާޅުވީ، ރަށްރަށުގެ ރައްޔިތުންނާ ބައްދަލުކުރެއްވުމުގެ ދަތުރުފުޅުތައް އަންނަ ހަފުތާގައި ފައްޓަވައި ވަގުތު ލިބިވަޑައިގަންނަވާ ގޮތަކުން އެ ދަތުރުފުޅުތައް ތަކުރާރު ކުރައްވާނެ ކަމަށެވެ. އަދި ވީ ވަރަކުން މާލޭގެ ރައްޔިތުންނާ ވެސް ބައްދަލު ކުރައްވާނެ ކަމަށް އެމަނިކުފާނު ވިދާޅުވިއެވެ.
ސަރުކާރުން ކުރާ ކަންކަން ރައްޔިތުންނަށް އޮޅުން ފިލުވައި ދެއްވުމަށްޓަކައި ކޮންމެ ދެ މަހުން އެއް މަހު ވަޒީރުންގެ ފޯރަމް ބާއްވާނެ ކަމަށް ކެމްޕެއިންގައި ވައުދުވެވަޑައިގެންނެވި ގޮތަށް ފުރަތަމަ ފޯރަމް އަންނަ ހަފުތާގައި ބާއްވާނެ ކަަމަށް ވެސް ރައީސް ވިދާޅުވިއެވެ.
"އެއީ ޕަބްލިކް ފޯރަމެއް. އެ ފޯރަމްގައި ބޭނުން ސުވާލެއް އެ ފޯރަމްގައި އެ ވަގުތަކު ބައިވެރިވާ ވަޒީރުންގެ ދާއިރާތަކުން ކުރަން ފުރުސަތު ދޭނަން. ދެން އަނެއްކާ ދެ މަސް ފަހުން އަނެއް ބެޗް އޮފް ކެބިނެޓް މެމްބާސް ވަޑައިގަންނަވާނެ. ފަސް ބޭފުޅުން ފަސް ބޭފުޅުން ގޮތަށް ދެ މަހުން އެއް މަހުން ޕަބްލިކް ފޯރަމް ބާއްވާނަން،" ރައީސް ވިދާޅުވިއެވެ.
"ރައްޔިތުން ކުރަން ހުރި ސުވާލުތައް ލިބޭ ދެގަޑިއިރު ތެރޭގައި ކުރެވޭނެ،"
ރައީސް ޑރ. މުއިއްޒު ނިންމަވާފައި ވަނީ ސީދާ އެ މަނިކުފާނު ވެސް ކޮންމެ ތިން މަހަކުން އެއް މަހު އެފަދަ ފޯރަމެއް ބޭއްވުމަށެވެ. ފުރަތަމަ ފޯރަމް އަންނަ މަހު ބާއްވަވާނެ ކަމަށް އެމަނިކުފާނު އިއުލާން ކުރެއްވިއެވެ.
